OCIPAMA CELILONGISO 10

Ocisola Kuenda Olopandu ku Yehova vi Tuala Kepapatiso

“Nye ci nateka oku papatisiwa?”—OVIL. 8:36.

OCISUNGO 37 Oku Fendela Yehova Lutima Wosi

OVINA TU LILONGISAa

1-2. Ndomo ca tangiwa Ovilinga 8:27-31, 35-38, nye ca vetiya kalei u Etiopia oku papatisiwa?

ANGA hẽ ove o yongola oku papatisiwa oco o linge ondonge ya Kristu? Ocisola kuenda olopandu, via siata oku vetiya omanu valua oku nõla onjila yaco. Kũlĩhĩsa ulandu wa kalei umue wa talavaya la nasoma yo ko Etiopia.

² Kalei kaco u Etiopia wa kapako lonjanga ovina a lilongisa Vovisonehua. (Tanga Ovilinga 8:27-31, 35-38.) Nye co vetiya oku ci linga? Eye wa sola calua Ondaka ya Suku, omo okuti wa kala oku tanga ulandu umue watiamẽla kelivulu lia Isaya osimbu a kala oku endela vekãlu. Kuenje eci Filipu a vangula laye, ulume wa lekisa olopandu omo liovina Yesu o lingila. Pole, momo lie a endelele ko Yerusalãi? Momo wa kuatela ale ocisola Yehova. Tua ci kũlĩha ndati? Eye wa endaenda ale oku fendela Yehova ko Yerusalãi. Citava okuti kalei kaco wa silepo ale etavo liaye kuenda wa likongela kepata limue lia litumbikile ku Suku yocili. Ocisola a kuatela Yehova oco co vetiya oku eca enanga likuavo li kuete esilivilo okuti, oku papatisiwa oco a linge ondonge ya Kristu.—Mat. 28:19.

3. Nye ci pondola oku tateka omunu umue oku papatisiwa? (Tanga okakasia losapi hati: “Nye ci Kasi Vutima Wove?”)

³ Ocisola o kuetele Yehova ci pondola oku ku vetiya oku papatisiwa. Pole ocisola caco, ci pondolavo oku ku tateka oku ci linga. Ndamupi? Kũlĩhĩsa ovindekaise vimue. Ndeci, ove o pondola oku sola calua akamba kuenda epata okuti halombangiko via Yehova kuenje o kuata ohele yokuti nda wa papatisiwa ovo va ka ku suvuka. (Mat. 10:37) Handi vali, pamue o pondola oku sola ovina Suku a nyãle kuenje ka ci leluka kokuove oku siapo ovituwa viaco. (Osa. 97:10) Pamue wa siata oku ivaluka ovipito viatiamẽla ketavo liesanda. Ove o pondola oku sola ovina via kongela vovipito viaco wa lingaile kosimbu. Kuenje ci pondola oku tĩla kokuove oku siapo ovina viatiamẽla kovipito viaco. (1 Va Kor. 10:20, 21) Omo liaco, ove o sukila oku nõla: Helie, ale nye o sukila oku sola vali enene?

Nye ci Kasi Vutima Wove?

Yesu wa sokisa esapulo Liembimbiliya lombuto kuenda ovitima viomanu wa vi sokisa losi ya litepa. (Luka 8:4-8) Citava okuti o kasi oku lilongisa Embimbiliya Lolombangi Via Yehova vokuenda kuotembo yimue. Momo lie ku tangela elivulu lia Luka 8:11-15, loku lipula okuti: ‘Utima wange u sokisiwa losi yipi ya tukuiwa vocisonehua eci?’Onjila yiwa yoku amẽla ku Suku loku kũlĩha eci a yongola kokuetu, oku lilongisa Embimbiliya

Osi yi kasi konele yonjila: Yi lomboloka omunu una ka kuete otembo yoku pongiya elilongiso Liembimbiliya. Olonjana vialua o lisandela esunga oco ka ka linge elilongiso liaye Liembimbiliya, ale o pumba olohongele omo o kuete ovina vikuavo vioku linga.
Osi yocikakala: Yi lomboloka omunu una ecelela okuti elambalalo kuenda oku suvukiwa lakamba ale lepata cu tateka oku pokola Yehova kuenda oku kapako olonumbi Viaye.
Osi yocambanda: Yi lomboloka omunu una o sole ovina a lilongisa viatiamẽla ku Yehova, pole, o sima okuti olombongo kuenda ovina vikuavo viu nenela esanju loku kolapo. Olonjana vialua ka lingi elilongiso liaye Liembimbiliya omo okuti o talavaya calua kuenda o sole calua ovitalukilo.
Osi yiwa: Yi lomboloka omunu una okuti olonjanja viosi o tava oku linga elilongiso liaye Liembimbiliya kuenda oku kapako ovina a lilongisa. Wa velisapo oku sanjuisa Yehova. Ndaño lovitangi kuenda alambalalo, eye o pandikisa kuenda amamako oku sapuilako vakuavo ovina a kũlĩha viatiamẽla ku Yehova.

Kũlĩhĩsa eci ci kasi vutima wove. Ndeci osi ya litepa ya tukuiwa volusapo lua Yesu, utima wove wocindekaise u pondolavo oku yapuisiwa, oku nyõliwa kuenda oku mioñoluiwa, cimuamue haico okuti, o pondola oku nõla ovina o yongola oku velisapo. Ivaluka okuti, ove o nõla osi yutima o yongola.

OMUNU UNA TU SUKILA OKU SOLA CALUA

4. Ocina cipi ca velapo ci vetiya omunu oku papatisiwa?

⁴ Ove o kuete ovina vialua vioku sola loku eca olopandu. Ndeci, osimbu kua fetikile oku lilongisa Lolombangi Via Yehova, citava okuti wa sumbilile Embimbiliya kuenda wa solele Yesu. Cilo okuti wa kũlĩha Olombangi Via Yehova, o pondola oku linga lavo ukamba. Pole, oku sola ovina evi viwa ka ci lomboloka okuti ove wa nõlapo oku litumbika ku Yehova loku papatisiwa. Ocina ca velapo ci ku vetiya oku papatisiwa, ocisola o kuetele Yehova Suku. Nda wa sola calua Yehova okuti ovina vikuavo vi sule, lacimue ci ka ku tateka oku u vumba. Ove o pondola oku tenda ocisola o kuetele Yehova ndepuluvi li ku kuatisa oku papatisiwa kuenda ndocina cimue ci ku kuatisa oku amamako oku vumba Yehova.

5. Apulilo api tu konomuisa?

⁵ Yesu wa popia hati tu sukila oku sola Yehova lutima wetu wosi, lomuenyo wetu wosi, lolondunge vietu viosi kuenda longusu yetu yosi. (Mar. 12:30) Ove o pondola oku sola ndati calua Yehova loku u sumbila? Oku sokolola kocisola Yehova a tu kuetele, ci tu vetiya oku u solavo. (1 Yoa. 4:19) Ovina vipi vi yililako omo lioku u sola calua?b

6. Ndomo catangiwa ku va Roma 1:20, yipi onjila yimue tu pondola oku lilongisa catiamẽla ku Yehova?

⁶ Lilongisa eci catiamẽla ku Yehova pocakati covina via lulikiwa. (Tanga Va Roma 1:20; Esituluilo 4:11) Sokolola kovikũla kuenda kovinyama Yehova a lulika kuenda ndomo ovio vi eca uvangi wokuti eye o kuete uloño walua. Konomuisa ndomo etimba liove lia pangiwa lonjila yimue yi komõhisa. (Osa. 139:14) Sokololavo kongusu Yehova a kapa vekumbi loku ivaluka okuti ekumbi limuevo pokati kolohuluwa violombungululu vikuavo.c (Isa. 40:26) Nda wa sokolola kovina Yehova a lulika, esumbilo u kuetele li ka amamako oku livokiya. Oku kũlĩha okuti Yehova wa loñoloha calua kuenda o kuete unene walua, eci oco ociseveto ci ku kuatisa oku kuata ukamba laye. Oco ocisola o kuetele Yehova ci pame, o sukila oku kũlĩha ovina vikuavo viatiamẽla kokuaye.

7. Oco o sole Yehova lutima wosi nye o sukila oku limbuka?

⁷ Ove o sukila oku limbuka okuti Yehova wa ku kapako calua. Anga hẽ ca ku tĩlila oku tava okuti Ululiki wa panga ilu losi, wa ku kapako kuenda oku sole calua? Ivaluka okuti Yehova “ka kasi ocipãla letu.” (Ovil. 17:26-28) Eye “o pendusola ovitima viosi” kuenda o likuminya kokuove olondaka Daviti a sapuila Salomone viokuti, “nda ove u sanda, eye o tava oku sangiwa love.” (1 Asa. 28:9) Ocili okuti, esunga lieci o lilongisila Embimbiliya momo okuti Yehova, o kasi oku ‘tongeka love.’ (Yer. 31:3) Osimbu amamako oku lekisa olopandu kovina Yehova a ku lingila, ocisola u kuetele ci livokiya.

8. Ndamupi o lekisa okuti wa sanjukila ocisola Yehova a ku kuetele?

⁸ Onjila yimue yoku lekisa okuti wa sanjukila ocisola Yehova a ku kuetele, poku sapela laye vohutililo. Ocisola o kuetele Suku ci ka livokiya osimbu o sapela laye catiamẽla kasakalalo ove kuenda kolopandu eca omo liovina a siata oku ku lingila. Kuenje ukamba wove la Yehova u livokiya osimbu o limbuka ndomo eye a tambulula olohutililo viove. (Osa. 116:1) Ove o ka kolela okuti Yehova wa ku kũlĩha ciwa. Pole, oco ukamba waco la Yehova wamameko, ove o sukila oku kũlĩha ovina a sole levi a nyãle. Handi vali, o sukila oku kũlĩha ovina a lavoka kokuove. Onjila ya velapo yoku kuata ukũlĩhĩso, oku lilongisa Ondaka yaye, Embimbiliya.

Manji umue ukãi eca ocicapa kufeko umue o landisa ovina viokepia pocitanda. — Onjila yiwa yoku amẽla ku Suku loku kũlĩha eci a yongola kokuetu, oku lilongisa Embimbiliya (Tala ocinimbu 9)d

9. Ndamupi o lekisa okuti wa kapako Embimbiliya?

⁹ Lilongisa oku sola Ondaka ya Suku, Embimbiliya. Embimbiliya, olio lika li lombolola ocili catiamẽla ku Yehova kuenda ovina eye a yongola kokuove. Ove o lekisa okuti o sole Embimbiliya poku li tanga eteke leteke, poku pongiya elilongiso liove Liembimbiliya kuenda poku kapako ovina o lilongisa. (Osa. 119:97, 99; Yoa. 17:17) Anga hẽ o kuete ale esokiyo lioku tanga Embimbiliya? Wa siata hẽ oku kuama esokiyo liaco, oco o kũlĩhe okuti o kasi oku tanga muẽle Embimbiliya eteke leteke?

10. Ocina cipi ci lekisa okuti Embimbiliya elivulu limue li likasi?

¹⁰ Ocina cimue ci lekisa okuti Embimbiliya li kala elivulu limue li likasi ceci okuti, mu sangiwa ovolandu omanu va imba uvangi watiamẽla ku Yesu. Embimbiliya olio lika li lombolola ovina Yesu a ku lingila. Osimbu amamako oku lilongisa ovina Yesu a popia levi a linga, ove o ka sanjukila oku linga ukamba laye.

11. O pondola oku sola ndati Yehova?

¹¹ Lilongisa oku sola Yesu kuenje ocisola o kuetele Yehova ci ka livokiya. Momo lie? Momo Yesu wa setukala ciwa ovituwa via Isiaye. (Yoa. 14:9) Osimbu ove amamako oku lilongisa catiamẽla ku Yesu, o ka kũlĩha ciwa Yehova kuenda o ko sola calua. Sokolola ohenda Yesu a lekisa ku vana ka va kapiwileko la vakuavo ndeci, olohukũi, olombei kuenda vana va honguele. Sokololavo kolonumbi eye a siata oku eca kokuove kuenda ndomo omuenyo wove wa pongoloka omo lioku kapako olonumbi viaco.—Mat. 5:1-11; 7:24-27.

12. Osimbu o lilongisa catiamẽla ku Yesu, o pondola oku vetiyiwa oku linga nye?

¹² Ocisola o kuetele Yesu ci ka pamisiwa osimbu o sokolola lutate kocilumba eye a eca, oco akandu etu a eceliwe. (Mat. 20:28) Eci o kuata elomboloko liokuti Yesu wa lieca olumue oco a ku file, o ka vetiyiwa oku likekembela loku sanda ongecelo ya Yehova. (Ovil. 3:19, 20; 1 Yoa. 1:9) Handi vali, osimbu amamako oku sola Yesu la Yehova, o ka vetiyiwa oku linga ukamba la vana va solevo Yesu la Yehova.

13. Ovina vipi Yehova a eca kokuove?

¹³ Lilongisa oku sola vana Yehova a sole. Epata liove okuti halombangiko via Yehova kuenda akamba vove, pamue ka va kuata eloboloko lieci ove o litumbikila ku Yehova. Citava okuti va ku lambalala. Yehova o pondola oku ku kuatisa poku sanga epata likuavo kespiritu. Nda wa linga lavo ukamba, o ka sanga ocisola kuenda ekuatiso o sukila. (Mar. 10:29, 30; Va Hev. 10:24, 25) Vokuenda kuotembo, citava okuti vamue pokati kepata liove va ka likongela kokuove oku vumba Yehova kuenda oku pokola kolonumbi viaye.—1 Pet. 2:12.

14. Ndomo ca tukuiwa kukanda 1 Yoano 5:3, ovina vipi wa limbuka viatiamẽla kolonumbi via Yehova?

¹⁴ Lilongisa oku sumbila kuenda oku kapako olonumbi via Yehova. Osimbu kua kũlĩhile Yehova, ove wa kuamẽle olonumbi viove muẽle, pole, cilo o limbuka okuti olonumbi via Yehova via velapo. (Osa. 1:1-3; tanga 1 Yoano 5:3.) Sokolola kolonumbi Viembimbiliya viatiamẽla kalume, kakãi, kolonjali kuenda komãla. (Va Efe. 5:22–6:4) Osimbu o kapako olonumbi viaco, o limbuka hẽ okuti ekalo liepata liove li kasi oku mioñoloha? Osimbu o pokola kolonumbi via Yehova viatiamẽla koku nõla akamba vove lolondunge, o limbuka hẽ okuti ovituwa viove vi kasi oku mioñoloha? Ove hẽ, wumunu umue wa sanjuka? (Olosap. 13:20; 1 Va Kor. 15:33) Citava okuti atambululo apulilo a-a, oco.

15. Nye ci pondola oku ku kuatisa oku limbuka ndomo o kapako olonumbi Viembimbiliya?

¹⁵ Pamue ci ku tĩlila oku limbuka ndomo o kapako olonumbi Viembimbiliya o kasi oku lilongisa. Pole, Yehova pocakati cocisoko caye eca kokuove alivulu a kunamẽla Vembimbiliya, oco a ku kuatise oku limbuka eci ciwa leci cĩvi. (Va Hev. 5:13, 14) Kuenje eci o tanga alivulu aco loku a lilongisa, ove o ka limbuka okuti ci kuatisa kuenda ci kuete esilivilo oku ci linga kuenje citava okuti o ka vetiyiwa oku tiamẽla kocisoko ca Yehova.

16. Esokiyo lipi Yehova a siata oku lingila afendeli vaye?

¹⁶ Lilongisa oku sola kuenda oku kuatisa ocisoko ca Yehova. Yehova wa siata oku sokiya afendeli vaye, pocakati cakongelo. Omõlaye Yesu eye utue wakongelo aco osi. (Va Efe. 1:22; 5:23) Yesu wa nõla ocimunga cimue citito calumue olombuavekua, oco va songuile upange eye a yongola okuti u lingiwa koloneke vilo. Eye wa tukula ocimunga caco okuti, “ukuenje wa kolelua haeye wa lunguka kuenje ovo va kuete ocikele cinene coku ku tekula kespiritu kuenda oku ku teyuila. (Mat. 24:45-47) Onjila yimue ukuenje wa kolelua a kuama oco a ku kuatise, poku ecelela okuti akulu vekongelo va loñoloha va nõliwa, oco va ku songuile. (Isa. 32:1, 2; Va Hev. 13:17; 1 Pet. 5:2, 3) Akulu vekongelo va linga cosi citava, oco va ku pamise kuenda oku ku kuatisa oku vokiya ukamba wove la Yehova. Pole, ocina ca velapo va pondola oku ku lingila, oku ku kuatisa oco o longise vakuene catiamẽla ku Yehova.—Va Efe. 4:11-13.

17. Ndomo ca tangiwa ku va Roma 10:10, 13, 14, momo lie tu sapuila komanu catiamẽla ku Yehova?

¹⁷ Kuatisa vakuene oku sola Yehova. Yesu wa tuma olondonge viaye oco vi longise vakuavo catiamẽla ku Yehova. (Mat. 28:19, 20) Tu pokola kocikundi caco omo tua kũlĩha okuti eci ocikele cetu. Pole, nda ocisola cove camamako, o ka liyeva ndeci upostolo Petulu la Yoano va popia hati: “Ka citava oku liwekako oku vangula ovina tua mola levi tua yeva.” (Ovil. 4:20) Ka kuli ocina cikuavo ci nena vali esanju, okuti oku kuatisa umue oku vumba Yehova ci sule. Sokolola esanju lialua ukundi Filipu a kuata, poku kuatisa kalei u Etiopia oku lilongisa ocili ci sangiwa Vovisonehua loku papatisiwa! Nda wa setukula Filipu loku pokola kocikundi ca Yesu coku kunda, ove o ka lekisa okuti o yongola oku kala Ombangi ya Yehova. (Tanga Va Roma 10:10, 13, 14.) Kuenje citava okuti o ka lingavo epulilo ndeli kalei a linga liokuti: “Nye ci nateka oku papatisiwa?”—Ovil. 8:36.

18. Nye tu ka konomuisa vocipama cikuãimo?

¹⁸ Eci o nõlapo oku papatisiwa, ove eca enanga lia velapo vomuenyo wove. Omo okuti eli enanga limue li kuete esilivilo lialua, o sukila oku sokolola lutate ovina via kongelamo. Nye o sukila oku kũlĩha catiamẽla kepapatiso? Nye o sukila oku linga osimbu kua papatisiwile? Apulilo a-a, a ka tambuluiwa vocipama cikuãimo.

OCISUNGO 2 Yehova Oyo Onduko Yove

a Vamue va sole Yehova, va kuete atatãhi nda va liangiliyila oku papatisiwa oco va linge Olombangi Via Yehova. Nda o sima ndoco, ocipama cilo ci ka ku kuatisa oku kũlĩha ovina vimue o pondola oku linga, oco o papatisiwe.

b Omo okuti omanu va litepa, citava okuti vamue va kapako olonumbi via tukuiwa vocipama cilo ndomo vi kasi, pole, vakuavo va vi kapako lonjila yimue ya litepa.

c Oco o kũlĩhe olonumbi vikuavo, tanga ombrochura losapi hati, A Vida—Teve um Criador? Kuenda ombrochura losapi hati, A origem da vida—Cinco perguntas que merecem resposta.

d ELOMBOLUILO YOCILUVIALUVIA: Manji umue ukãi eca ocicapa cimue kufeko umue va lisanga pocitanda.