“Amẽli ku Suku kuenje eye amẽla kokuene.”—Tiago 4:8

Anga hẽ Suku o Yevelela Olohutililo Vietu?

Ove hẽ wa kala ale latatahãi nda Suku o yevelela olohutililo viove eci o likutilila? Nda oco, haveko lika. Omanu valua va likutilila ku Suku catiamẽla kocitangi cimue, pole, ocitangi ca kala oku amamako. Anga hẽ eci ci lekisa okuti, Suku ka kapeleko olohutililo vietu? Sio! Embimbiliya li popia okuti, Suku o yevelela olohutililo vietu eci tu likutilila kokuaye lonjila ya sunguluka. Tu kũlĩhĩsi eci Embimbiliya li popia.

SUKU UKUAKUYEVELELA.

“Ove, okuakuyeva ohutililo, kokuove ku kokela omanu vosi.”—Osamo 65:2.

Omanu vamue va likutilila omo va popia okuti, va liyeva ciwa ndaño ka va kolelele okuti, kuli umue o va yevelela muẽle. Pole, ohutililo hacina cimueko tu linga oco tu liyeve ciwa kuenje tu tẽla oku liyaka lovitangi vietu. Embimbiliya li tu likuminya okuti, “Yehovaa o kasi ocipepi la vosi vo vilikiya, okuti vo vilikiya ocili. . . . O yeva uteto wavo, o va popela.”—Osamo 145:18, 19.

Kuenje tu pondola oku kolela okuti Yehova Suku o yevelela olohutililo viafendeli vaye. Locisola eye hati: “Vu mbilikiya; wiyi oku likutilila kokuange, kuenje ndu yevi.”—Yeremiya 29:12.

**SUKU O YONGOLA OKUTI OVE O LIKUTILILA KOKUAYE.**

Isia umue wa tumala ocipepi lomõlaye osimbu a papala lovikuata vimue

“Pandikisi lolohutililo.”—Va Roma 12:12.

Vembimbiliya tu vetiyiwa oku ‘likutilila olonjanja viosi’ kuenda oku ‘likutilila kapuluvi osi.’ Yehova Suku o yongola okuti, tu likutilila kokuaye.—Mateo 26:41; Va Efeso 6:18.

Momo lie Suku a yonguila okuti, tu likutilila kokuaye? Kũlĩhĩsa: Isia umue o sanjuka eci omõlaye o pinga ekuatiso. Ocili, isia citava okuti wa kũlĩha ale eci omõlaye a sukila, ale ceci a yevite, pole, eci eye a yeva omõlaye oku u pinga ekuatiso, ci lekisa okuti, omõlaye wo kolela kuenda va likuetele ukamba. Cimuamue haico, eci tu likutilila ku Yehova Suku, tu lekisa kokuaye okuti tuo kolela kuenda tu yongola oku kala akamba vaye.—Olosapo 15:8; Tiago 4:8.

SUKU O KU TATA.

Ulume umue ukualomĩlo wa sumua, wa tumala vondondelo yosapalalo. Okasia yimue muli ovina vio voseketa yaye yi kasi ponele yaye.

“Yeki kokuaye ovilemo viene viosi, momo eye o vu tati.”—1 Petulu 5:7.

Suku o yongola okuti tu likutilila kokuaye, momo eye o tu sole kuenda o tu tata. Eye wa kũlĩha ovitangi vietu kuenda asakalalo etu kuenje, o yongola oku tu kuatisa.

Soma Daviti vokuenda kuomuenyo waye, wa likutilila ku Yehova Suku oku pinga ekuatiso, loku u lomboluila ovisimĩlo viaye. (Osamo 23:1-6) Suku wa tendele ndati Daviti? Suku wa solele Daviti kuenda wa yevelela olohutililo viaye. (Ovilinga 13:22) Cimuamue haico, Suku o yevelela olohutililo vietu, momo eye o tu tata.

“SOLE YEHOVA OMO A YEVA YEVA ONDAKA YANGE”

Olondaka evi, via umue wa soneha osamo yimue Vembimbiliya. Eye wa kolelele okuti, Suku o yevelela olohutililo viaye kuenda co kuatisa calua. Eye wamela ku Suku kuenda wa sanga ongusu yoku liyaka lovitangi viomuenyo waye kuenda esumuo.—Osamo 116:1-9.

Nda tua kolela okuti Suku o yevelela olohutililo vietu, tu kamamako oku likutilila kokuaye. Kũlĩhĩsa ulandu wa Pedro, o kasi konano yofeka yo Espanya. Eye wa fisa omõlaye wa kuatele 19 kanyamo kocilunga cimue. Levalo liaye, Pedro wa situlula utima waye ku Suku kuenda wa likutilila olonjanja vialua oku pinga elembeleko kuenda ekuatiso. Nye ceya oku pita? Pedro wa popia hati: “Yehova wa tambulula olohutililo viange pocakati celembeleko kuenda ekuatiso ame lukãi wange tua tambula ku vamanji.”

Ulume wa sumua o kuate elitalatu limue osimbu vamue akamba vaye vo lembeleka. — Atambululo olohutililo vietu, eyilila pocakati celembeleko kuenda ekuatiso liakamba vetu

Ndaño okuti omõla a Pedro handi ka pinduiwile, pole, olohutililo via kuatisa calua Pedro kuenda epata liaye. Ukãi waye María Carmen, wa popia hati: “Olohutililo via ñuatisa oku pandikisa kohali. Nda kũlĩha okuti, Yehova Suku wa ñapako, momo eci ndi likutilila kokuaye, ndi kuata ombembua loku tula utima.”

Embimbiliya kuenda ovolandu omanu, a lekisa okuti Suku o yevelela olohutililo. Pole, Suku ka yevelela olohutililo viosi. Momo lie Suku a tambuluila olohutililo vimue, pole, vikuavo sio?

a Yehova oyo onduko ya Suku.—Osamo 83:18.