Ove o Nõla Ndomo Ekalo Liove Lio Kovaso Yoloneke li ka Kala

Ci soka 3.500 kanyamo a pita, Yehova Suku wa sapuila afendeli vaye ovina ovo va sukilile oku linga, oco va kuate ekalo lia kolapo kovaso yoloneke poku popia ndoco: “Nda kapa omuenyo loku fa kovaso yove, esumũlũho lesiñalo; kuenje o sukila oku nõla omuenyo oco o kale lomuenyo, ove kumue lovitumbulukila viove.”—Esinumuĩlo 30:19.

Oco va kuate ekalo lia kolapo kovaso yoloneke, afendeli vaco va sukilile oku nõla ciwa onjila va kuama. Koloneke vilo, tu sukilavo oku nõla ciwa onjila tu kuama. Embimbiliya li lombolola ndomo o nõla ekalo lia kolapo lio kovaso yoloneke okuti: “Poku sola Yehova Suku yove, loku yevelela ondaka yaye.”—Esinumuĩlo 30:20.

TU SOLA NDATI YEHOVA LOKU YEVELELA ONDAKA YAYE?

LILONGISA LEKUATISO LIEMBIMBILIYA: Oco o sole Yehova, tete o sukila oku lilongisa catiamẽla kokuaye pocakati Cembimbiliya. Osimbu amamako oku ci linga, o ka limbuka okuti, eye Osuku yimue ukuacisola kuenda wa kũlĩha eci ci pondola oku ku kuatisa. Eye o ku laleka oku likutilila kokuaye ‘momo eye o ku tata.’ (1 Petulu 5:7) Embimbiliya li likuminya okuti, nda wa likolisilako oku kuata ukamba laye, “eye amela kokuove.”—Tiago 4:8.

KAPAKO OVINA WA LILONGISA: Oku yevelela Suku, ci lomboloka oku kuama olonumbi viaye vi sangiwa Vembimbiliya. Osimbu o ci linga, “onjila yove yi ka sumũlũha kuenda o ka lekisa olondunge kovina viosi o linga.”—Yehosua 1:8.