Apulilo A Lingiwa la Vakuakutanga

Noke lioku citiwa kua Yesu, momo lie Yosefe la Maria va kalela otembo yimue ko Beteleme okuti ka va tiukilile handi kimbo liavo ko Nasara?

Embimbiliya ka li ci lombolola. Pole, li tu sapuila ovina vimue vi komõhisa, vi lekisa esunga lieci va nõlelelepo okuti ka va tiukila handi ko Nasara.

Ungelo wa sapuilile Maria okuti, eye wa laikele oku mina kuenda oku cita oñaña. Eci ungelo a eca esapulo liaco, Yosefe la Maria va kala ko Nasara kimbo lia Yosefe ko Galilea. (Luka 1:26-31; 2:4) Noke, eci va tunda Kegito va tiukila ko Nasara. Yesu oko a kulila kuenje wa linga u Nasara. (Mat. 2:19-23) Eli olio esunga lieci okuti, eci ku tukuiwa Yesu, la Yosefe kuenda Maria, tu sokolola eci catiamẽla ko Nasara.

Maria wa kuatele umue ukuepata o tukuiwa Elisavete wa kala ko Yuda. Elisavete, wa kala ukãi wocitunda Sakariya kuenda weya oku linga ina ya Yoano Upapatisi. (Luka 1:5, 9, 13, 36) Maria wa ka nyulile Elisavete kuenje wa kala laye ci soka olosãi vitatu ko Yuda. Noke eye wa tiukila ko Nasara. (Luka 1:39, 40, 56) Kuenje Maria wa kũlĩhĩle ciwa ocikanjo co Yuda.

Noke vokuenda kuotembo Yosefe wa pokola kocihandeleko coku ‘lisonehisa.’ Kuenje Yosefe wa linga ungende oku tunda ko Nasara oku enda ko Beteleme okuti lua kala “olupale lua Daviti,” luna lua popiwile vocitumasuku hati, mua laikele oku citiwila Mesiya. (Luka 2:3, 4; 1 Sam. 17:15; 20:6; Mika 5:2) Noke lia Maria oku cita Yesu kocitumãlo caco, Yosefe ka ecelele okuti Maria o linga ungende unene woku tiukila ko Nasara loñaña ya citiwa ndopo. Ovo va kala ko Beteleme okuti ya kuata ocinala ci soka olokilometulu eceya lo Yerusalãi. Kuenje ca va ecelela oku ambata oñaña yavo vonembele kuenda oku eca ocilumba ca kisikiwile Vocihandeleko.—Ovis. 12:2, 6-8; Luka 2:22-24.

Ungelo wa Suku wa sapuilile ale Maria okuti omõla wa laikele oku tambula “ocalo ca Daviti,” kuenda oku “viala Ndosoma.” Anga hẽ Yosefe la Maria va sokolola okuti ca sungulukile Yesu oku citiwila volupale lua Daviti? (Luka 1:32, 33; 2:11, 17) Citava okuti ovo va sokolola okuti ca sungulukile oku amamako oku kala kocitumãlo caco kuenda oku talamẽla onumbi yikuavo ya Suku.

Ka tua kũlĩhĩle otembo ovo va kala ko Beteleme eci vamue vakuakukũlĩhĩsa olombungululu, va pitilako. Kotembo yaco, epata lia kala konjo yimue kuenda omõlavo handi, wa kala “okamõla.” (Mat. 2:11) Eci ca molẽhele okuti ovo ka va tiukilile handi ko Nasara, va kala ko Beteleme otembo yaco.

Herode wa tuma okuti ‘omãla vosi valume vo vo Beteleme oku upisa koloñaña toke vana va kuete anyamo avali,’ va sukilile oku pondiwa. (Mat. 2:16) Eci ungelo umue a sapuila Yosefe la Maria catiamẽla kondaka yaco, ovo va tilila Kegito la Yesu kuenje oko va kala toke eci Herode a fa. Noke Yosefe lepata liaye va enda ko Nasara. Momo lie ka va tiukilile ko Beteleme? Oco va tile Arkelau omõla a Herode wa kala oku viala vo Yudea kuenda oco va pokole kelungulo lia tunda ku Suku. Ko Nasara, Yosefe wa ponduile oku tekuilako Yesu ndufendeli wocili wa Suku.—Mat. 2:19-22; 13:55; Luka 2:39, 52.

Citava okuti, Yosefe wa fa osimbu Yesu handi ka ecele epuluvi liokuti vamue va enda kilu. Omo liaco, Yosefe o ka pindukila oku ka kala palo posi. Valua va ka kuata epuluvi lioku u kũlĩha kuenda oku lilongisa vali calua esunga lieci eye kumue la Maria va kalela ko Beteleme otembo yalua, noke lioku citiwa kua Yesu.