Wa ci Kũlĩha?
Momo lie alume vana okuti ka vakaile va Isareli va pangelele onepa kolohoka via Soma Daviti?
POKATI kolohoka via Soma Daviti pa kala alume vamue ka va kaile va Isareli ndeci: Seleki u Amoni, Uriya u Hiti, kuenda Yitima u Moavi.a (1 Asa. 11:39, 41, 46) Pokati kolohoka viaco, pa kalavo “va Kereti, va Peleti kuenda va Giti.” (2 Sam. 15:18) Va Kereti, kuenda va Peleti va kuatele ukamba la va Filisiti. (Esek. 25:16) Va Giti va kala olonungi violupale lua va Filisiti ko Gati—Yeh. 13:2, 3; 1 Sam. 6:17, 18.
Momo lie Daviti a ecelela okuti alume vaco va panga onepa kolohoka viaye? Eye wa kolelele okuti ovo va kala vakuacili, ca piãla enene ku Yehova. Ndeci, catiamẽla ku va Kereti kuenda va Peleti, ondisionaliu yimue Yembimbiliya ya popia ndoco: “Ovo vamamako oku kala vakuacili ku Daviti vekalo limue lia tĩlile calua vokuenda kuviali waye.” Ndamupi va ci linga? Eci “alume vosi vo ko Isareli” va yanduluka Soma Daviti, oco va ‘kuame Sieva,’ va Kereti, kuenda va Peleti, vamamako oku kala vakuacili ku Daviti loku u kuatisa oku imula usuanji wa fetikiwa la Sieva. (2 Sam. 20:1, 2, 7) Vepuluvi likuavo, omõla a Soma Daviti okuti Adoniya wa seteka oku tambula uviali una wa laikele oku eciwa ku Salomone. Yimue vali onjanja va Kereti kuenda va Peleti, vamamako oku kala vakuacili ku Daviti kuenda vokuatisa oku waveka Salomone, una Yehova a nõlele oco a kale kapiñala ka Soma Daviti.—1 Olos. 1:24-27, 38, 39.
Ulume ukuavo okuti wamamako oku kala ukuacili ku Daviti, Itai u Giti. Itai kumue lasualali vaye va soka 600, va kuatisa Soma Daviti eci omõlaye Avisalome o lingila usuanji kuenda oku tamba ovitima via va Isareli oco vo kuame. Kefetikilo Daviti wa sapuila Itai oco ka ka ende laye kuyaki omo lioku kala ocingendeleyi. Pole, Itai wa tambulula ndoco: “Ndeci Yehova a kasi lomuenyo kuenda ndeci ñala yange soma a kasi lomuenyo, kuosi ñala yange soma a endela, ci kaile koku fa ale komuenyo, ukuenje wove o ka kalakovo!”—2 Sam. 15:6, 18-21.
Itai wa kala ukuacili ku Soma Daviti, ombuavekua ya Yehova
Ndaño okuti va Kereti, va Peleti kuenda va Giti ka va kaile va Isareli, pole, ovo va kuatelele esumbilo lialua Yehova Suku yocili kuenda ombuavekua yaye Daviti. Daviti wa eca olopandu vialua poku kala lalume vaco vakuacili konele yaye.
a Ocihandeleko ca Suku ci sangiwa kelivulu Liesinumuĩlo 23:3-6, ca popele okuti va Amoni kuenda va Moavi ka ca tavele oku iñila vekongelo lia va Isareli. Citava okuti ocihandeleko caco ca tiamisiwilile lika kofeka yo Isareli. Oco ka ca pisile omanu vana ka kaile va Isareli oku kala pokati kafendeli va Suku. Tala velivulu Estudo Perspicaz das Escrituras, volume 2 kemẽla 370.