Setukula Ongangu ya Yesu Yoku Lekisa Ombili Kupange Woku Kunda

1. Nye ci tepisa afendeli va Yehova la vana va li tukula okuti Akristão?

OCINA cimue ci tepisa afendeli va Yehova pokati ka vana va li tukula okuti Akristão, ombilia ovo va lekisa kupange woku kunda. (Tito 2:14) Pole, olonjanja vimue ci tĩla calua oku lekisa ombili yoku enda kupange woku kunda. Pamue o kuata ovisimĩlo ndevi viukulu umue wekongelo ukuambili wa popia hati: “Kuli apuluvi amue okuti si kuata onjongole yoku kunda.”

2. Momo lie olonjanja vimue ca tĩlila calua oku kuata esanju lioku panga onepa kupange woku kunda?

² Citava okuti, ove o sanjukila vali calua oku linga ovopange akuavo a Yehova okuti, upange woku kunda ci sule. Momo lie? Momo eci tu panga onepa koku tunga, loku semũlula Onjango yimue Yusoma, tu kuatisa vana va lipita lovilunga loku pamisa vamanji. Vepuluvi liaco, ci leluka oku limbuka onima yalikolisilo etu. Handi vali, tu limbukavo ocisola lombembua vamanji va lekisa omo liupange tu linga kuenje ci tu ĩha ekolelo liokuti tua kapiwako omo liupange waco. Olonjanja vimue pamue tu kundila vocikanjo cimuamue vokuenda kuanyamo alua kuenda ci molẽha ndu okuti ka tu kuete onima yiwa, ale omanu va likala upange wetu woku kunda. Tua kũlĩhavo okuti osimbu tu panda kesulilo lioluali lulo, tu ka liyaka lalambalalo alua. (Mat. 10:22) Nye ci ka tu kuatisa oku amamako oku lekisa ale oku vokiya ombili yetu kupange woku kunda?

3. Ndomo ca tangiwa ku Luka 13:​6-9, nye tu lilongisila kombili Yesu a lekisa?

³ Tu pondola oku lilongisila kombili ya Yesu yoku kunda, poku konomuisa ulandu waye. Vokuenda kupange waye woku kunda, eye lalimue eteke a tepuluile ombili yaye yoku kundila omanu. Ocili okuti, vokuenda kuotembo eye wa likolisilako oku vokiya ombili yaye. (Tanga Luka 13:​6-9.) Volusapo lumue Yesu a ta, wa sokisa upange waye woku kunda lelikolisilo ulume umue ukuakutata ocumbo cayuva a linga. Ulume waco, wa pita anyamo atatu oku tata uti wukuyu, ka wa kaile oku eca epako. Cimuamue haico okuti, Yesu wa pita anyamo atatu oku kundila va Yudea, pole, valua ka va tavele kesapulo liaye. Ndeci ulume ka liwekelepo oku tata uti wukuyu, Yesu ka liwekelepovo oku kundila omanu, ale oku sumua kupange waye woku kunda. Pole, eye wa likolisilako calua oku kuatisa omanu oku tava kolondaka viwa.

4. Ovina vipi vikuãla tu lilongisila kongangu ya Yesu?

⁴ Vocipama cilo, tu lilongisa ndomo Yesu a lekisa ombili kupange woku kunda, ca piãla enene eci kua kambele olosãi epandu vioku sulila kupange waye woku kunda palo posi. (Luka 10:1) Oku lilongisa catiamẽla kovina Yesu a longisa kuenda oku setukula ongangu yaye, ci ka tu kuatisa oku amamako lombili yetu. Tu konomuisa ovina vikuãla tu lilongisila kongangu ya Yesu: (1) eye wa tiamisilile utima kocipango ca Yehova, (2) eye wa kũlĩhĩle ovitumasuku Viembimbiliya (3) eye wa kolelele kekuatiso lia Yehova kuenda (4) eye wa kuatele ocisimĩlo ca sunguluka coku kolela okuti, omanu vamue eteke limue va ko yeva.

EYE WA TIAMISILA UTIMA KOKU LINGA OCIPANGO CA YEHOVA

5. Yesu wa lekisa ndati okuti wa tiamisilile utima koku linga ocipango ca Suku?

⁵ Yesu wa lekisa ombili koku kunda “olondaka viwa,” momo wa kũlĩhĩle okuti oco Suku a yonguile okuti eye o ci linga. (Luka 4:43) Ku Yesu upange woku kunda wa velelepo komuenyo waye. Toke muẽle kolosãi via sulako viupange waye woku kunda, eye wamamako oku “linga ungende volupale lolupale, vimbo limbo” oku longisa omanu. (Luka 13:22) Yesu wa pindisavo olondonge vikuavo oku kunda olondaka viwa ndeci eye.—Luka 10:1.

6. Upange woku kunda u kuete elitokeko lipi lovikele vikuavo? (Talavo ociluvialuvia.)

⁶ Koloneke vilo, oku kunda olondaka viwa, upange umue wa velapo vali calua, Yehova la Yesu va yongola okuti tu u linga. (Mat. 24:14; 28:​19, 20) Upange wosi tu lingila Yehova u kuete elitokeko lupange woku kunda. Ndeci, tua siata oku tunga Olonjango Viusoma oco okuti vana va lekisa onjongole va kuata apa va liongoluila oco va fendele Yehova. Handi vali, ovina viosi vi lingiwa ko Betele vi kuete ocimãho coku kuatisa kupange woku kunda. Upange woku kuatisa vana va lipita lovilunga, ka u kuatisa lika vamanji kasukila o ketimba, pole, u va kuatisavo oku endaenda vali kolohongele oku kongelamo kupange woku kunda. Kuenje eci tu ivaluka okuti upange woku kunda owo wa velapo vali Yehova a yongola okuti tu u linga, tu vetiyiwa oku lekisa ombili kupange waco. Manji Yánosh ukulu umue wekongelo ko Hungria wa popia hati: “Olonjanja viosi ndi seteka oku ivaluka okuti, ka kuli upange ukuavo tu lingila Yehova u piñainya upange woku kunda. Momo oco ocikele cetu ca velapo.”

7. Momo lie Yehova a yonguila okuti tuamamako oku kunda? (1 Timoteo 2:​3, 4)

⁷ Tu pondola oku vokiya ombili yetu kupange woku kunda, poku kuata ocisimĩlo ca Yehova catiamẽla komanu. Eye o yongola okuti etendelo lialua liomanu, li yeva loku tava kolondaka viwa oco va popeliwe. (Tanga 1 Timoteo 2:​3, 4.) Eli olio esunga lieci a tu kuatisila oku mioñolola uloño wetu woku kunda. Ocindekaise cimue ombrochura Sola Omanu—Linga Olondonge okuti, yi tu ĩha olonumbi ndomo tu fetika ombangulo locimãho coku linga alilongiso Embimbiliya. Ndaño okuti omanu cilo ka va tava oku vumba Yehova, citava okuti va ka kuata epuluvi lioku ci linga vokuenda kuohali ya piãla. Ovina tu va sapuila cilo citava okuti, kovaso yoloneke ci ka va vetiya oku nõlapo oku vumba Yehova. Pole, ci ka tẽliwa lika nda tuamamako oku kunda.

EYE WA KUATA ELOMBOLOKO LIOVITUMASUKU VIEMBIMBILIYA

8. Oku kũlĩha ovitumasuku Viembimbiliya ca kuatisa ndati Yesu oku talavaya ciwa lotembo?

⁸ Yesu wa kũlĩhĩle ndomo ovitumasuku Viembimbiliya via laikele oku tẽlisiwa. Ndeci, eye wa kũlĩhĩle okuti upange waye woku kunda wa laikele lika oku tumãla anyamo atatu lolosãi epandu. (Dan. 9:​26, 27) Eye wa kũlĩhĩlevo epuluvi a laikele oku fa kuenda ndomo ca ponduile oku pita. (Luka 18:​31-34) Omo liaco, wa talavaya ciwa lotembo yaye, poku lekisa ombili yoku kunda oco a tẽlise ocikele caye.

9. Momo lie oku kuata elomboloko liovitumasuku Viembimbiliya ci tu vetiyila oku lekisa ombili kupange woku kunda?

⁹ Oku kuata elomboloko liovitumasuku Viembimbiliya, ci tu vetiya oku lekisa ombili kupange woku kunda momo tua kũlĩha okuti, esulilo lioluali lulo ndopo liya. Tu kasi oku mola ovina vi kasi oku pita voluali kuenda ovituwa viomanu vi kasi oku tẽlisa ovitumasuku Viembimbiliya viatiamẽla koloneke via sulako. Tu letevo ukuse u kasi pokati Kuviali wa Velapo Voluali okuti, o Anglo-Amerikana kuenda o Rusia loloñame viavo okuti, va kasi oku tẽlisa ocitumasuku cokuti, osoma yo kombuelo kuenda yo konano, va laikele oku liyaka pokati “kotembo yesulilo.” (Dan. 11:40) Tu kuetevo elomboloko liokuti olomãhi viociñumañuma cocitumasuku ca tukuiwa ku Daniele 2:​43-45, ci situlula Uviali wa Velapo Voluali okuti o Anglo-Amerikana. Tua kolela okuti, ndopo muẽle Usoma wa Suku u ka kundula ovoviali osi omanu. Ovitumasuku viaco vi tu situluila otembo tu sangiwa kuenje tu sukila oku kunda olondaka viwa lonjanga yalua.

10. Kolonepa vipi vikuavo ovitumasuku Viembimbiliya vi tu vetiya oku kunda?

¹⁰ Ovitumasuku Viembimbiliya vi kuetevo esapulo lielavoko tu yongola calua oku sapuilako vakuetu. Manji Carrie o kasi oku vumbila ko Republika Dominikana wa popia hati: “Eci ndi sokolola kovina vi komõhisa Yehova a likuminya oku linga kovaso yoloneke, ndi yeva ombili yalua yoku sapuilako vakuetu. Omanu va kasi oku liyaka lovitangi vialua kuenda citava okuti, ovo va sukila oku kũlĩha olohuminyo via Yehova.” Handi vali, ovitumasuku Viembimbiliya vi tu lekisa okuti, Yehova olonjanja viosi o kasi oku tu kuatisa kupange waco. Manji Leila o kasi ko Hungria wa popia hati: “Ocisonehua ca Isaya 11:​6-9, ci ndivaluisa okuti omunu o pondola oku linga apongoloko lekuatiso lia Yehova. Omo liaco, ndi yongola oku sapuilako omanu vosi olondaka viwa ndaño muẽle ku vana va molẽha okuti ka va tava.” Manji Christopher woko Zambia, wa popiavo hati: “Elivulu lia Marko 13:10 li popia okuti olondaka viwa via laikele oku kundiwa koluali luosi kuenje esumũlũho limue linene oku kuatisa koku tẽlisiwa kuocitumasuku eci.” Kokuove ocitumasuku cipi Cembimbiliya ci ku vetiya oku amamako oku kunda?

EYE WA KOLELA KEKUATISO LIA YEHOVA

11. Momo lie Yesu a sukililile oku kolela kekuatiso lia Yehova oco amameko oku lekisa ombili kupange woku kunda? (Luka 12:​49, 53)

¹¹ Yesu wa kolelele okuti, Yehova wa laikele oku u kuatisa oku amamako oku lekisa ombili kupange woku kunda. Ndaño okuti Yesu wa enda oku vangula lesumbilo kuenda wa enda oku sokolola ciwa kueci a popia, eye wa kũlĩhĩle okuti olondaka viwa via laikele oku koka esuvu kuenda elambalalo. (Tanga Luka 12:​49, 53.) Omo liupange wa Yesu woku kunda, asongui vetavo olonjanja vialua va seteka oku u ponda. (Yoa. 8:59; 10:​31, 39) Ndaño ndoco Yesu wamamako oku kunda momo wa kũlĩhĩle okuti, Yehova wa kala laye. Yesu wa popia hati: “Si kasi lika liange, pole, Isia una wa numa o kasi lame. Eye ka njandulukile, momo ndi lingainga ovina viu sanjuisa.”—Yoa. 8:​16, 29.

12. Yesu wa pongiya ndati olondonge viaye oco viamameko oku kunda ndaño ceci via ponduile oku lambalaliwa?

¹² Yesu wa ivaluisavo olondonge viaye okuti, via ponduile oku kolela kekuatiso lia Yehova. Olonjanja vialua wa vi sapuila okuti, Yehova wa laikele oku vi kuatisa, ndaño ceci via laikele oku lambalaliwa. (Mat. 10:​18-20; Luka 12:​11, 12) Yesu wa vi lungulavo oco vi lekise utate. (Mat. 10:16; Luka 10:3) Eye wa vi sapuila oco ka vi ka kisike omunu umue oku tava kesapulo Liusoma. (Luka 10:​10, 11) Wa vi sapuilavo oco vi tile nda ci sukiliwa. (Mat. 10:23) Ndaño okuti Yesu wa kala ukuambili koku kunda kuenda wa kolelele ku Yehova, eye ka kapele kohele omuenyo waye nda ka kuli esunga liaco.—Yoa. 11:​53, 54.

13. Momo lie o kolelela okuti Yehova o ka ku kuatisa?

¹³ Koloneke vilo, tu sukilavo ekuatiso lia Yehova oco tu lekise ombili koku kunda eci tu liyaka lalambalalo. (Esit. 12:17) Momo lie o kolelela okuti Yehova o ka ku kuatisa? Momo liovina Yesu a pinga vohutililo yimue yi sangiwa ku Yoano ocipama 17. Vohutililo yaco Yesu wa pinga ku Yehova oco a tate ovapostolo kuenje eye wa tava epingilo liaco. Elivulu Liovilinga li lekisa ndomo Yehova a kuatisa ovapostolo oku lekisa ombili poku kunda ndaño lalambalalo. Vohutililo yaco, Yesu wa pingavo ku Yehova oco a kuatise vana va laikele oku tava kesapulo liovapostolo. Ove wa kongeliwamovo. Yehova toke cilo o kasi oku amamako oku tambulula ohutililo yaco. Omo liaco, Eye o ka ku kuatisa ndeci a kuatisa ovapostolo.—Yoa. 17:​11, 15, 20.

14. Tua kũlĩha ndati okuti tu ka tẽla oku amamako oku lekisa ombili yoku kunda ndaño kotembo yovitangi? (Talavo ociluvialuvia.)

¹⁴ Osimbu tu panda kesulilo, citava okuti ci tĩla oku lekisa ombili kupange woku kunda, pole, Yesu wa tu likuminya okuti tu ka kuata ekuatiso liosi tu sukila. (Luka 21:​12-15) Ndeci Yesu lolondonge va linga, tu eceleli okuti, omanu ovo va nõla nda va yeva ale sio pole ka tu ka lihoyi lavo. Kovitumãlo vina okuti upange wetu u kasi oku tatekiwa, vamanjetu va kasi oku kunda olondaka viwa omo va kolela ku Yehova okuti, kongusu yavo sio. Ndeci Yehova a pamisa afendeli vaye kosimbu, koloneke vilo eye o tu ĩhavo unene oco tu “kunde ciwa olondaka viwa,” ndomo ci likuata locipango caye. (2 Tim. 4:17) Omo liaco, kolela ku Yehova kuenje eye o ka ku kuatisa oku amamako oku kuata ombili kupange woku kunda.

EYE WA KUATA OCISIMĨLO CA SUNGULUKA

15. Tua kũlĩha ndati okuti Yesu wa kuatele ocisimĩlo ca sunguluka catiamẽla kupange woku kunda?

¹⁵ Yesu wa kuatele ocisimĩlo ca sunguluka catiamẽla kupange woku kunda. Kuenje eci co kuatisa oku amamako oku kuata esanju kuenda oku likolisilako kupange waco woku kunda. Ndeci, noke lioku pita unyamo umosi tunde eci Yesu a fetika oku kunda, eye wa limbuka okuti omanu valua va kuatele onjongole yoku yeva olondaka viwa. Eye wa sokisa omanu vaco lovapia a yelela oku ungula. (Yoa. 4:35) Noke liunyamo umosi, eye wa sapuila olondonge viaye hati: “Oku ungula kualua.” (Mat. 9:​37, 38) Noke wa va sapuila vali hati: “Oku ungula kualua, . . . Pingi ku Cime coku ungula oco a tume olonalavayi koku ungula kuaye.” (Luka 10:2) Yesu wamamako oku kolela okuti, omanu va ka tava kolondaka viwa. Eye wa yeva esanju lialua eci omanu va tava.—Luka 10:21.

16. Alusapo a Yesu a kuatisa ndati olondonge oku kuata ovisimĩlo via sunguluka viatiamẽla kupange woku kunda? (Luka 13:​18-21) (Talavo ociluvialuvia.)

¹⁶ Oco Yesu a kuatise olondonge viaye okuti ka va tepulula ombili yavo, wa lekisa ndomo esapulo va kala oku kunda lia laikele oku kuata onima yiwa. Ndeci, konomuisa alusapo avali eye a tukula. (Tanga Luka 13:​18-21.) Amue pokati kalusapo Yesu a tukula, ombuto yulemba, oco a longise okuti, esapulo Liusoma lia laikele oku kula lonjila yimue yi komõhisa kuenda lacimue ca ponduile oku tateka oku kula kualio. Olusapo lukuavo Yesu a tukula, etumbisa oco a longise okuti, esapulo Liusoma lia laikele oku lisandula kuenda oku koka apongoloko ku vana va tava ndaño okuti, cambata otembo oku ci limbuka. Kuenje Yesu wa kuatisa olondonge viaye oku limbuka okuti, esapulo va kala oku kunda li ka kuatisa omanu valua.

17. Momo lie tu sukilila oku amamako oku kuata ocisimĩlo ca sunguluka catiamẽla kupange woku kunda?

¹⁷ Etu tu vetiyiwa calua oku amamako oku lekisa ombili kupange woku kunda, eci tu sokolola ndomo upange wetu woku kunda u kasi oku kuatisa omanu valua koluali luosi. Anyamo osi, olohuluwa viomanu va lekisa onjongole, va siata oku kala Kocipito Condalelo yolofa via Yesu kuenda va lilongisa Embimbiliya letu. Handi vali, owiñi walua wa siata oku papatisiwa kuenda oku likongela kokuetu kupange woku kunda. Ka tua kũlĩhĩle handi nda vañami va ka tava kesapulo lietu. Eci tua kũlĩha ceci okuti, Yehova o kasi oku ongolola owiñi wakahandangala u ka puluka kohali ya piãla. (Esit. 7:​9, 14) Yehova Cime coku ungula, wa kũlĩha okuti handi valua va laika oku tava kolondaka viwa. Omo liaco, tu kuete asunga alua oku amamako oku kunda.

18. Nye tu yongola okuti oco omanu va limbuka kokuetu?

¹⁸ Ocina cimue ca siata oku situlula olondonge viocili via Yesu, ombili ovo va kuete kupange woku kunda. Ndeci, ovapostolo va kunda lutõi walua kuenda lombili kuenje omanu ‘va limbuka okuti ovo va enda oku kala la Yesu.’ (Ovil. 4:13) Kuenje koloneke vilo, eci omanu va tu mola kupange woku kunda, tu yongola okuti ovo va limbuka okuti tu kasivo oku setukula ombili ya Yesu yoku kunda olondaka viwa.