Amamako Oku Endela Vekolelo

1. Momo lie upostolo Paulu a kuatela esanju poku ivaluka ovina via pita komuenyo waye?

UPOSTOLO Paulu wa kũlĩhĩle okuti kua kambele ño katito oco a pondiwe. Pole, poku sokolola ndomo eye ambatele omuenyo waye, eye wa kuata esanju lialua. Eye wa popia hati: “Nda mala oku yoloka, nda kuama ekolelo.” (2 Tim. 4:​6-8) Paulu wa nõlele onjila yimue yolondunge vomuenyo waye Wukristão kuenda wa kũlĩhĩle okuti wa kala oku sanjuisa utima wa Yehova. Etu tu yongolavo oku nõla olonjila viwa kuenda oku sanjuisa utima wa Yehova. Omo liaco, nye tu sukila oku linga?

2. Nye ci lomboloka oku endela vekolelo?

² Paulu wa popia eci catiamẽla kokuaye muẽle kuenda Kakristão vakuavo vakuekolelo hati: “Tu kasi oku endela vekolelo, haloku luluvalako kovina vi letiwe.” (2 Va Kor. 5:7) Nye Paulu a yonguile oku popia? Vembimbiliya ondaka oku “endela,” olonjanja vimue yi tiamisiwila komunu ndomo ambata omuenyo waye. Eci omunu umue a luluvala kovina vi letiwe, eye o nõla olonjila vi tiamisiwila kovina a pondola oku mola kuenda oku yeva. Handi vali, eci umue a endela vekolelo, eye o nõla olonjila vi likuata locipango ca Yehova. Ovilinga viaye vi lekisa okuti, wa kolela okuti Yehova o ko sumũlũisa kuenda alungulo aye tu sanga Vembimbiliya olonjanja viosi a tu kuatisa.—Osa. 119:66; Va Hev. 11:6.

3. Asumũlũho api tu kuata nda tu endela vekolelo? (2 Va Korindo 4:18)

³ Ocili okuti, vosi yetu tua siata oku nõla olonjila via kunamẽla kovina tu mola kuenda kovina tu yeva. Nda tua tiamisila lika utima kovina tu mola levi tu yeva, citava okuti tu kuata ovitangi. Momo lie? Momo halonjanja viosiko citava oku kolela kovina tu mola levi tu yeva. Nda tu endela lika kovina tu lete, citava okuti ka tu ka kapako ocipango ca Yehova kuenda olonumbi viaye. (Uku. 11:9; Mat. 24:​37-39) Pole, nda tu endela vekolelo, tu ka nõla onjila “yi sanjuisa Ñala.” (Va Efe. 5:10) Handi vali, oku kuama alungulo a Suku ci ka tu ĩha ombembua yovutima kuenda esanju liocili. (Osa. 16:​8, 9; Isa. 48:​17, 18) Nda okuti tuamamako oku endela vekolelo, tu ka kala otembo ka yi pui.—Tanga 2 Va Korindo 4:18.

4. Omunu umue o pondola oku limbuka ndati nda o kasi oku endela vekolelo ale kovina vi letiwe?

⁴ Tu kũlĩha ndati nda okuti tu kasi oku endela vekolelo ale kovina vi letiwe? Tu sukila oku lipula ndoco: Nye ndi sukila oku kapako poku nõla onjila yimue? Anga hẽ ndi sokolola lika kovina ndi tẽla oku mola? Ale poku nõla onjila yimue ndi kapako alungulo a Yehova? Vocipama cilo, tu konomuisa ndomo tu pondola oku amamako oku endela vekolelo volonepa vitatu vi kuete esilivilo ndeci: Poku nõla upange umue woku sanda eteku, poku nõla omunu o likuela laye kuenda poku tambula onumbi yimue vocisoko ca Yehova. Kolonepa evi, tu konomuisa eci tu sukila oku kapako oco tu nõle olonjila viwa.

POKU NÕLA UPANGE UMUE WOKU SANDA ETEKU

5. Nye tu sukila oku kapako poku nõla upange umue woku sanda eteku?

⁵ Vosi yetu tu yongola oku sanda onjila yimue yoku litekula kuenda yoku kuata ovina epata lietu li sukila. (Uku. 7:12; 1 Tim. 5:8) Ovopange amue a kuete ofeto yalua okuti akuavo ci sule. Kuenje cecelela okuti, o landa ovina o sukila vieteke leteke kuenda oku soleka olombongo vimue vi pondola oku ku kuatisa kovaso yoloneke. Pole, ovopange akuavo, ofeto yaco yi tẽla lika oku tata asukila amue epata. Ocili okuti, poku nõla upange umue, catete tu sokolola kofeto yaco. Pole, nda tu kakatela lika kovina viaco, tu lekisa okuti tu kasi oku songuiwa lovina vi letiwe.

6. Poku nõla upange umue tu lekisa ndati okuti tu kasi oku endela vekolelo? (Va Heveru 13:5)

⁶ Nda tua endela vekolelo, tu ka sokololavo nda upange tua nõla u pondola oku pamisa, ale oku nyõla ukamba wetu la Yehova. Omo liaco, tu sukila oku lipula ndoco: ‘Kupange waco, ndi ka sukila hẽ oku linga ovina vimue Yehova a suvuka?’ (Olosap. 6:​16-19) ‘Anga hẽ ndi ka sukila oku pumba olohongele, ale oku kuata otembo yitito yoku kunda kuenda yoku tanga Embimbiliya? Anga hẽ ndi ka sukila oku kala otembo yalua ocipãla lepata liange?’ (Va Fil. 1:10) Nda etambululo pokati kapulilo a-a oco, hĩse oku likala upange waco, ndaño ka ca lelukile oku sanga upange. Omo lioku endela vekolelo, tua siata oku nõla olonjila vi lekisa okuti tuakolela okuti, Yehova o ka tu ĩha ovina tu sukila.—Mat. 6:33; tanga Va Heveru 13:5.

7-8. Manji umue woko Amerika du Sul wa lekisa ndati okuti o kasi oku endela vekolelo? (Tala ociluvialuvia.)

⁷ Kũlĩhĩsa eci ca kuatisa manji Javiera woko Amerika du Sul, oku limbuka esilivilo lioku endela vekolelo. Eye wa popia hati: “Nda seteka oku iñila kupange umue va ponduile oku nyĩha ofeto yalua yina ya laikele oku ndi sanjuisa calua.” Pole, manji Javier wa yonguilevo oku kala ukundi wotembo yosi. Eye wa popia hati: “Nda tẽla oku pulisiwa lusongui umue wupange vofeka. Osimbu sia pulisiwile nda likutilila oku pinga ekuatiso ku Yehova, momo nda kolelele okuti eye wa kũlĩha eci ciwa kokuange. Nda yonguile upange umue uwa haiwo va feta ciwa pole, haunako u nateka oku tẽlisa ovimãho viespiritu.”

⁸ Manji Javier wa popia hati: “Eci nda kala oku pulisiwa usongui wupange waco wa ndi sapuila okuti, nda sukilile oku talavaya olowola vialua otembo yosi. Lesumbilo lialua ame nda lombolola okuti, sia ponduile oku ci linga omo liefendelo liange ku Yehova.” Manji Javier wa nõlapo oku likala upange waco kuenje noke liolosemana vivali, wa linga ukundi wotembo yosi. Noke vuyamo waco, wa sanga upange umue u wecelela oku talavaya alivala amue veteke. Eye wamisako ndoco: “Yehova wa yeva olohutililo viange kuenda wa ñuatisa oku sanga upange umue u ngecelela oku kala ukundi wotembo yosi. Nda sanjuka calua omo okuti upange waco u nyĩha otembo yoku vumba Yehova kumue la vamaji.”

9. Nye wa lilongisila kulandu wa manji Trésor?

⁹ Nye ci popiwa nda tua limbuka okuti upange wetu u tu tateka oku endela vekolelo? Kũlĩhĩsa eci ca lipita la manji umue wo ko Kongo o tukuiwa Trésor. Eye hati: “Nda kuatele upange umue nda lavokaile calua. Ame nda enda oku nganyala olombongo vialua oku ci sokisa lupange watete kuenda nda sumbiwile calua lomanu.” Pole, ocitangi ceci okuti manji Trésor wa enda oku pumba olohongele vimue momo wa sukilile oku vokiya kelivala liaye liupange. Eye wa enda oku vetiyiwavo oku kemba oco ka ka lombolole ovina ka via sungulukile via enda oku lingiwa kupange waco. Manji Trésor wa yonguile oku siapo upange waco, pole, eye wa kuata usumba woku sima okuti ka ponduile vali oku sanga upange ukuavo. Nye co kuatisa? Eye hati: Elivulu lia “Havakuki 3:​17-19 lia ñuatisa oku limbuka okuti Yehova olonjanja viosi o ka ndi tata, ndaño nda siapo upange waco loku nganyala olombongo vitito. Kuenje nda pinga oku siapo upange waco.” Eye o lombolola hati: “Valua va sima okuti olonalavayi viavo via likapelako oku linga cosi oco va nganyale olombongo vialua, oku kongelamo oku siapo otembo yoku kala lepata liavo kuenda lioku vumba Suku. Ame nda sanjuka calua omo nda teyuila ukamba wange la Yehova kuenda lepata liange. Noke liunyamo umosi, Yehova wa ñuatisa oku sanga upange umue uwa. Ame ndi nganyala olombongo vi tẽla oku landa ovina epata liange li sukila kuenda ñuete otembo yalua yoku vumba Yehova. Ocili okuti, ndaño tu pitisa Yehova kovaso, handi tu pondola oku liyaka lekambo liolombongo. Pole, Yehova olonjanja viosi o tu tata!” Nda tua kolela kalungulo kuenda kolohuminyo via Yehova, tu kamamako oku endela vekolelo, kuenje eye o ka tu sumũlũisa.

POKU NÕLA OMUNU O LIKUELA LAYE

10. Omunu umue o pondola oku songuiwa ndati lovina vi letiwe poku nõla u a likuela laye?

¹⁰ Olohuela ombanjaile yimue ya Yehova kuenda ka cĩviko oku kuata onjongole yoku kuela. Manji umue ufeko poku nõla omunu a likuela laye, pamue o kũlĩhĩsa ekalo liamanji yaco, emolẽho liaye, ovituwa viaye, onjila ndomo a tata olombongo, ovikele a kuete vepata kuenda nda eye o pondola oku u sanjuisa.b Ovina viosi evi vi kuete esilivilo. Pole, nda eye o sokolola lika kovina viaco, o kasi oku songuiwa lovina vi letiwe.

11. Nye tu sukila oku linga oco tu endele vekolelo poku nõla u tu likuela laye? (1 Va Korindo 7:39)

¹¹ Yehova o sanjuka calua eci vamanji alume lakãi, va kuama alungulo aye poku nõla una va likuela laye! Ndeci, ovo va kapako calua onumbi yoku talamẽla toke eci va “pitahãla vumalẽhe” osimbu ka va fetikile oku namũlala. (1 Va Kor. 7:36) Ovo va likolisilako oku kũlĩhĩsa okuti omunu va yongola oku likuela laye, o kuata ovituwa Yehova a yonguila kulume ale kukãi uwa. (Olosap. 31:​10-13, 26-28; Va Efe. 5:33; 1 Tim. 5:8) Handi vali, ovo ka va namũlala lomunu una okuti Hambangiko ya Yehova. Pole, va kuama elungulo lioku kuelela “lika vu Ñala” li sangiwa kukanda 1 Va Korindo 7:39. (Tanga.) Ovo vamamako oku endela vekolelo kuenda oku kolela okuti, Yehova olonjanja viosi o ka va tata ciwa kovisimĩlo okuti omunu ukuavo ci sule.—Osa. 55:22.

12. Nye wa lilongisila kulandu wa manji Rosa?

¹² Kũlĩhĩsa eci ca lipita la manji umue ukundi wotembo yosi wo ko Kolombia o tukuiwa Rosa. Omo liupange waye, eye wa enda oku sapela calua lulume umue okuti ka kaile Ombangi ya Yehova kuenda ulume waco wa yonguile oku namũlala laye. Kuenje manji Rosa wa fetika oku u sola. Eye wa popia hati: “Ulume waco wa molẽhele ndu okuti uwa calua. Eye wa lingaile ovopange oku lieca olumue kuenda wa kala omunu umue wa sungulukile calua. Handi vali, wa endavo oku ndi tata ciwa. Eye wa kuatele cosi nda kala oku sanda kulume umue nda yonguile oku kuela laye, pole, ocitangi ceci okuti, eye ka kaile Ombangi ya Yehova.” Manji Rosa wamisako hati: “Kotembo yaco, nda liyevaile ulika kuenda nda yonguile oku kuela, pole, sia sangele laumue vocisoko ca Yehova oco ndi likuele laye. Omo liaco, ca tĩlile calua kokuange oku sapuila ulume waco okuti siu yongola, momo ca kala ocina cimue nda yonguile calua.” Ndaño ndoco, manji Rosa ka yapuisiwile lovina viaco kuenda ka ecelele oku songuiwa lovina vi letiwe lovaso. Eye wa talama loku sokolola eci ca laikele oku lipita lukamba a kuatele la Yehova, nda wa tavele ulume waco. Kuenje eye wa nõlapo oku tepa ukamba wosi laye kuenda wa tiamisila calua utima koku linga upange wa Yehova. Noke wa lalekiwa oco a pindisiwe Kosikola Yakundi Vusoma kuenda cilo o kasi oku talavaya ndukundi olikasi. Manji Rosa wa popia hati: “Utima wange weyuka lesaju omo liasumũlũho Yehova a nyiha.” Ocili okuti, olonjanja vimue ka ca lelukile oku endela vekolelo, nda tu kasi oku liyaka lovina vi vetiya olonjongole vietu. Pole, nda tu ecelela oku songuiwa la Yehova tu kuatisiwa calua.

CECI TU TAMBULA ONUMBI YIMUE VOCISOKO CA YEHOVA

13. Pamue tu liyeva ndati eci tu tambula onumbi yimue yeciwa locisoko?

¹³ Olonjanja vimue tua siata oku tambula olonumbi vimue viocisoko ca Yehova, vi pondola oku tu kuatisa oku u vumba lonjila yiwa. Olonumbi viaco vi pondola oku eciwa lakulu vekongelo, la vamanji va nyula akongelo, lo Betele ale Losungu Yolombangi Via Yehova. Pole, nye ci popiwa nda tua tambula onumbi yimue okuti ka tu kuete elomboloko liaco? Pamue tu kuata atatahãi nda onumbi yaco yiwa muẽle ale sio. Kuenje tu fetika oku kakatela kakulueya a vamanji va eca olonumbi viaco.

14. Nye ci ka tu kuatisa oku endela vekolelo eci tu tambula onumbi yimue vocisoko ca Yehova? (Va Heveru 13:17)

¹⁴ Eci tu endela vekolelo, tu kolela okuti Yehova eye o kasi oku songuila ocisoko caye kuenda wa kũlĩha ekalo liomunu lomunu pokati ketu. Omo liaco, tu pokola lonjanga olonumbi kuenda tu ci linga locituwa ca sunguluka. (Tanga Va Heveru 13:17.) Tua kũlĩha okuti epokolo lietu li kuatisa koku likuata omunga vekongelo. (Va Efe. 4:​2, 3) Ndaño okuti vamanji va songola ka va lipuile, tua kolela okuti Yehova o ka tu sumũlũisa nda tu lekisa epokolo. (1 Sam. 15:22) Nda ci sukila epongoloko konumbi yimue ya eciwa, Yehova o ka ci linga votembo ya sokiyiwa.—Mika 7:7.

15-16. Nye ca kuatisa manji umue oku endela vekolelo ndaño wa kuata atatahãi konumbi yimue ya eciwa locisoko? (Talavo ociluvialuvia.)

¹⁵ Kũlĩhĩsa ulandu umue u lekisa esilivilo lioku endela vekolelo kuenda oku pokola kolonumbi vi eciwa locisoko ca Yehova. Ko Peru, valua va vangula elimi lio Espanyole, pole, vakuavo va vangula alimi o pocitumãlo. Limue pokati kalimi aco o Quéchua. Vokuenda kuanyamo alua vamanji va siata oku sanda omanu va vangula elimi liaco. Pole, oco ku kapiweko olonumbi viombiali, kua lingiwa apongoloko konjila ndomo ku sangiwa omanu. (Va Rom. 13:1) Kuenje vamanji vamue va fetika oku lipula nda apongoloko aco a laikele oku tateka upange kelimi liaco. Omo okuti vamanji va pokola konumbi yaco, Yehova wa sumũlũisa alikolisilo avo oku sanga omanu va vangula o Quéchua.

¹⁶ Manji Kevin ukulu wekongelo okuti o kasi oku vumbila vekongelo lielimi lio Quéchua, umue pokati kava va lekisa esakalalo. Eye wa lombolola hati: “Lepongoloko eli, ‘tu ka sanga ndati omanu va vangula o Quéchua?’” Nye manji Kevin a linga? Eye wa popia hati: “Nda sokolola kolondaka vi sangiwa Kolosapo 3:5 kuenda kongangu ya Mose. Yehova wa ecele ku Mose olonumbi via molẽhele ndu okuti ka vi kuete elomboloko. Eci va Isareli va kala oku tunda Kegito, Yehova wa sapuila Mose oco a songuile omanu konjila ya loña Kokalunga ka Kusuka. Ca molẽhele ndu okuti ka va ka puluka peka lia va Egito, momo ovo va kala ocipepi lavo. Ndaño ndoco, Mose wa pokola kuenda Yehova wa sumũlũisa va Isareli poku linga ocikomo cimue ci komõhisa oco a va yovole.” (Etu. 14:​1, 2, 9-11, 21, 22) Manji Kevin ndaño wa sakalalele, eye wa nõlapo oku pongolola onjila yaye yoku kunda. Onima yipi yeyililako? Eye hati: “Ci komõhisa calua oku mola ndomo Yehova a tu sumũlũisa. Kefetikilo tua lingaile ungende walua vocikanjo kuenda tua enda oku sanga lika omunu umosi ale vavali. Kaliye tu tiamisila vali utima kocitumãlo kuna kuli omanu valua va vangula elimi lio Quéchua. Lonjila eyi tu pondola oku sapela lomanu valua loku linga apasu alua kuenda alilongiso Embimbiliya. Handi vali, etendelo liomanu va kasi oku endaenda kolohongele lia livokiya.” Ka kuli atatahãi, eci tu endela vekolelo olonjanja viosi tu sumũlũisiwa la Yehova.

17. Nye wa lilongisa vocipama cilo?

¹⁷ Tua kũlĩhĩsa ndomo tu amamako oku endela vekolelo kovina vitatu vi kuete esilivilo. Pole, tu sukila oku amamako oku endela vekolelo kolonepa viosi viomuenyo wetu ndeci, eci tu nõla ovitalukilo ale olomapalo, poku nõla elilongiso lio kosikola ale epindiso limue kuenda eci catiamẽla koku tekula omãla. Kovina viosi tu nõla komuenyo tu sukila oku yuvula oku songuiwa lovina tu lete, pole, tu sukila oku kapako ukamba wetu la Yehova, alungulo aye kuenda ohuminyo yaye yoku tu tata olonjanja viosi. Nda tua ci linga, tu ka “endela vonduko ya Yehova Suku yetu, otembo ka yi pui.”—Mika 4:5.