Kolela Okuti Yehova o ka ku Lembeleka

1. Ekalo lia va Yudea lia kala ndati ko Bavuluno?

SOKOLOLA ndomo va Yudea vana va kala kumandekua ko Bavulono va liyeva. Ovo va mola ofeka yavo oku nyõliwa. Vokuenda kuanyamo alua ovo va sinĩlile Yehova kuenje eye wa ecelela okuti, va tualiwa kumandekua ko Bavulono. (2 Asa. 36:​15, 16, 20, 21) Ocili okuti, va Yudea ko Bavulono va kuatele elianjo limue lioku linga ovopange eteke leteke. (Yer. 29:​4-7) Pole, ndaño ndoco, ekalo ka lia lelukile kokuavo kuenda ocitumãlo caco hacoko ovo va yonguile oku kala. Oco hẽ ovo va liyevele ndati oku kala vekalo liaco? Kũlĩhĩsa eci umue pokati kavo a popia hati: “Tua tumãla ocipepi lolondui vio Bavulono. Tua lila eci tua ivaluka o Siono.” (Osa. 137:1) Va Yudea vaco va sumuile calua kuenda va sukilile elembeleko. Pi ovo va ponduile oku sanga elembeleko liaco?

2-3. (a) Nye Yehova a lingila va Yudea va kala kumandekua ko Bavulono? (b) Nye tu konomuisa vocipama cilo?

² Yehova, “Suku yelembeleko liosi.” (2 Va Kor. 1:3) Eye o sole calua afendeli vaye. Omo liaco, eye o sanjuka calua oku eca elembeleko ku vosi va yongola oku amela kokuaye. Yehova wa kũlĩhĩle okuti, va Yudea vamue va kala ko Bavuluno va laikele oku likekembela kuenda oku nõlapo oku vumba Yehova lonjila yimue ya sunguluka. (Isa. 59:20) Eli olio esunga lieci Yehova a pingila ku Isaya oku eca esapulo limue ku va Yudea, eci kua kambele 100 canyamo oco vambatiwe ko Bavulono. Esapulo liaco, elivulu lia Isaya. Elivulu lia Isaya lia ponduile oku va kuatisa ndati? Isaya wa lombolola hati: “‘Lembeleki, lembeleki omanu vange,’ oco ca popia Suku yene.” (Isa. 40:1) Pocakati covitumasuku Isaya a soneha, Yehova wa eca elembeleko lina va Yudea va sukilile.

³ Ndeci ca lipita la va Yudea, etu olonjanja vimue tu sukilavo elembeleko. Vocipama cilo, tu konomuisa ovina vitatu vi lekisa ndomo Yehova a lembeleka va Yudea ndeci: (1) Eye wa likuminyile oku ecela vana va likekembela, (2) wa eca elavoko kafendeli vaye kuenda (3) eye wa va kuatisa oco ka va ka kuate usumba. Poku konomuisa atosi aco atatu, limbuka ndomo tu pondolavo oku kuatisiwa lolondaka via Isaya.

YEHOVA UKUAHENDA KUENDA O TU ECELA

4. Yehova wa lekisa ndati okuti eye ukuahenda? (Isaya 55:7)

⁴ Yehova “Isia yohenda.” (2 Va Kor. 1:3) Eye wa lekisa okuti ukuahenda eci a likuminya oku ecela va Yudea vana va likekembela. (Tanga Isaya 55:7.) Eye hati: “Locisola ka ci pongoloka cina ci kala otembo ka yi pui, ndi ka lekisa ohenda kokuove.” (Isa. 54:8) Pole, Yehova wa lekisa ndati okuti ukuahenda? Ndaño okuti va Yudea va ponduile oku kala ko Bavulono vokuenda kuanyamo alua omo liesino liavo, Yehova wa va likuminyile okuti, ka va laikele oku kalako otembo yosi. Noke liotembo yimue va ponduile oku tundako. (Isa. 40:2) Olondaka evi via Isaya via lembeleka calua va Yudea vana va likekembela!

5. Momo lie tu kuetele esunga lialua lioku eca olopandu kohenda ya Yehova okuti va Yudea ci sule?

⁵ Nye tu lilongisilako? Yehova wa likapelako oku ecela afendeli vaye lutima wosi. Koloneke vilo, tu kuete vali esunga lialua lioku eca olopandu ku Yehova okuti va Yudea ci sule. Momo lie? Momo tu kuete elomboloko liovina viosi Yehova a linga oco a ecele akandu etu. Noke lianyamo alua tunde eci kua sonehiwa ocitumasuku celivulu lia Isaya, Yehova wa tuma omõlaye o soliwe palo posi oco a ece omuenyo waye ndocisembi coku yovola kekandu lia vosi va likekembela. Omo lieci Yesu a linga, Yehova imũla akandu etu ale o tu ecela lutima wosi. (Ovil. 3:19; Isa. 1:18; Va Efe. 1:7) Ka kuli atatahãi okuti, tu kasi oku vumba Suku umue ukuahenda!

6. Tu lembelekiwa ndati poku sokolola kohenda ya Yehova? (Talavo ociluvialuvia.)

⁶ Nda okuti ove olonjanja vimue o livetela evelo omo liakulueya amue wa linga kosimbu, olondaka Yehova a tuma oku soneha vi sangiwa ku Isaya 55:​7, vi pondola oku ku lembeleka. Vamue pokati ketu tua siata oku livetela evelo, ndaño muẽle noke lioku likekembela. Ca piãla enene nda tu kasi oku tala ohali omo lielinga lietu lĩvi. Pole, nda wa likekembela akandu ove kuenda wa siapo oku linga eci cĩvi, kolela okuti Yehova wa ku ecela. (Sokisa la Yeremiya 31:34.) Nda Yehova ka ivaluka akulueya tua linga kosimbu, etu ka tu sukilavo oku amamako oku sokolola kovina viaco. Ku Yehova eci ca velapo ceci tu kasi oku linga cilo okuti, ovina vĩvi tua linga kosimbu havioko. (Esek. 33:​14-16) Ndopo, Isietu ukuahenda o ka imũlako otembo ka yi pui ohali yosi tu kasi oku tala; omo liakulueya etu.

7. Nye ci tu vetiya oku sanda ekuatiso liakulu vekongelo nda tua linga ekandu limue linene?

⁷ Nye tu sukila oku linga nda tua sumua kuenda owanji wutima u tu pisa omo lioku seleka ekandu limue linene? Embimbiliya li tu vetiya oku sanda ekuatiso liakulu vekongelo. (Tia. 5:​14, 15) Ocili okuti, ka ca lelukile oku sapuila kokuavo ovina tua linga. Ocina cimue ci pondola oku tu kuatisa, oku sokolola okuti Yehova wa nõla alume vaco oco va tu kuatise kuenda va ka tu tatavo lohenda ndeci ci linga Yehova. Nda tu ivaluka ovina viaco kuenda tu likekembela, ci ka leluka calua oku vangula lakulu vekongelo. Kũlĩhĩsa ulandu umue. Manji umue o tukuiwa Arthur, a owanji waye wutima wa kala oku u vetela evelo omo lioku linga ekandu limue. Pole, wa lembelekiwa lohenda ya Yehova. Eye wa lombolola ndoco: “Vokuenda kunyamo nda enda oku tala omanu va kasi epolõla haivo va linga ukahonga. Noke lioku yevelela ohundo yimue ya lombolola catiamẽla kowanji wutima, nda sapuila kukãi wange kuenda kakulu vekongelo ovina nda enda oku linga. Noke lioku ci linga nda liyeva ciwa. Pole, owanji wutima wa kala oku mbetela evelo omo lieci nda linga. Akulu vekongelo va ndi ivaluisa okuti Yehova handi ka ndi yandulukile. Eye wa nyĩha epindiso liwa omo a ndi sole. Olondaka viakulu vekongelo via vetiya utima wange kuenda via ñuatisa oku limbuka okuti Yehova wa ngecela muẽle.” Cilo manji Arthur ukundi wotembo yosi kuenda oñuatisi yekongelo. Ci lembeleka calua oku kũlĩha okuti, Yehova wa likapelako oku tu ecela nda tu likekembela!

YEHOVA O TU ĨHA ELAVOKO

8. (a) Elavoko lipi Yehova a eca ku va Yudea? (b) Ndomo ca lekisiwa ku Isaya 40:​29-31, elavoko lia va kuatisa ndati?

⁸ Kocisimĩlo comanu, va Yudea va kala ko Bavulono va molẽhele ndu okuti, lalimue eteke va laikele oku tiukila kofeka yavo. Momo o Bavulono ya kũlĩhĩwile okuti lalimue eteke ya yovuile olomandekua. (Isa. 14:17) Pole, Yehova wa ecele elavoko kafendeli vaye. Eye wa likuminyile oku va yovola. Lacimue ca ponduile oku u tateka. (Isa. 44:26; 55:12) Kovaso a Yehova o Bavulono ya kala ño ndoneketela yimue. (Isa. 40:15) Kuenje lofela yimue yitito oyo yi taka. Elavoko liaco, lia kuatisa ndati va Yudea? Ovo va lembelekiwa calua lelavoko liaco kuenda ca va nenelavo esanju. Isaya wa soneha ndoco: “Vana va lavoka ku Yehova, va ka kuata vali ongusu.” (Tanga Isaya 40:​29-31.) Elavoko lia kokela va Yudea oku liyeva okuti va kolapo. Ovo va liyeva ndu okuti va “palãla kupãla ndolongonga.”

9. Asunga api a kokela va Yudea oku kolela kolohuminyo via Yehova?

⁹ Yehova wa lekisavo ku va Yudea ovovangi amue oco va kolele kolohuminyo viaye. Ndamupi? Sokolola kovitumasuku vina va Yudea va mola oku tẽlisiwa kuavio. Ovo va mola va Asuria oku yula usoma wo Isareli kuenda oku ambata omanu kumandekua. (Isa. 8:4) Ovo va molavo va Bavulono oku nyõla o Yerusalãi loku ambata olonungi viaco kumandekua. (Isa. 39:​5-7) Va molavo osoma yo Bavulono oku tofola ovaso a Sedekiya loku ambatiwa kumandekua. (Yer. 39:7; Esek. 12:​12, 13) Ovina viaco viosi via pita ndomo Yehova a ci popele. (Isa. 42:9; 46:10) Va Yudea oku sokolola ovina evi viosi, ca pamisa ekolelo liavo liokuti, ohuminyo Yehova a lingile kokuavo ya laikelevo oku tẽlisiwa!

10. Nye ci pondola oku tu kuatisa oku amamako lelavoko lia pama koloneke vilo via sulako?

¹⁰ Nye tu lilongisilako? Eci tu yeva esumuo, elavoko li pondola oku tu lembeleka kuenda li tu kuatisa oku kuata vali ongusu. Etu tu kasi kotembo yimue ya tĩla calua, handi vali, tu kasi oku liyaka lunyãli umue ukuonene. Pole, ka tu sukila oku pua elavoko. Yehova o tu ĩha elavoko limue liwa okuti omuenyo ko pui lombembua kuenda oku kolapo. Tu sukila oku pamisa elavoko lietu vovisimĩlo kuenda vutima wetu. Nda ka tua ci lingile elavoko lietu li ka kala ndusenge umue wa posoka, pole, wa vuvala momo tu kasi oku u muila ponjanela yimue ya liña. Tu yelisa ndati “onjanela” yaco yocindekaise kuenda oku amamako lelavoko lia pama? Tu sukila oku sokiya otembo yoku sokolola ndomo omuenyo voluali luokaliye u ka kala. Tu sukilavo oku tanga ovipama, oku tala olovideo kuenda oku yevelela ovisikilo vi lombolola catiamẽla kelavoko. Handi vali, tu pondola oku sapela la Yehova catiamẽla kolohuminyo tu yongola oku mola oku tẽlisiwa kuavio.

11. Nye ca siata oku kuatisa manji Joy oku liyeva okuti wa pama?

¹¹ Kũlĩhĩsa ndomo elavoko lia siata oku lembeleka manji Joy okuti o kuete ovitangi vialua viuhayele. Eye wa popia hati: “Eci ndi lemẽlelua calua omo liovitangi, ndi sapuila Yehova cosi ndi yevite kuenda nda kũlĩha okuti wa kapako ocitangi cange. Vapuluvi aco, ndi liyeva okuti Yehova o nyĩha ‘unene wa piãla.’” (2 Va Kor. 4:7) Manji Joy wa siatavo oku sokolola ndomo omuenyo waye u ka kala voluali luokaliye eci “layimue onungi yi ka popia yiti: ‘Ndi vela.’” (Isa. 33:24) Etu tu pondolavo oku kuata vali ongusu, nda tu situlula utima wetu ku Yehova kuenda oku tiamisila utima kelavoko lietu.

12. Asunga api tu kuete oku kolela kolohuminyo via Yehova? (Talavo ociluvialuvia.)

¹² Ndeci Yehova a linga la va Yudea, eye o tu ĩhavo asunga alua oku kolela kolohuminyo viaye. Sokolola kovitumasuku tu lete oku tẽlisiwa kuavio. Ndeci, tu lete uviali umue woluali luosi okuti ‘nẽli wa pama nẽli wa leñela.’ (Dan. 2:​42, 43) Tua siatavo oku yeva asapulo ‘ovilemawe kocitumãlo locitumãlo’ kuenda oku panga onepa kupange woku kundila omanu vo “kolofeka viosi.” (Mat. 24:​7, 14) Ovitumasuku evi kuenda vikuavo vi pamisa ekolelo lietu liokuti, olohuminyo vi lembeleka via Yehova vi ka tẽlisiwa.

YEHOVA O TU KUATISA ECI TU KUATA USUMBA

13. (a) Ovitangi vipi va Yudea va laikele oku liyaka lavio osimbu ka va yovuiwile? (b) Ndomo ca tangiwa kelivulu lia Isaya 41:​10-13, Yehova wa lembeleka ndati va Yudea?

¹³ Ndaño okuti Yehova wa lembelekele va Yudea lelavoko li komõhisa, eye wa kũlĩhĩle okuti handi va laikele oku liyaka lovitangi poku tunda ko Bavulono. Yehova wa popele okuti, oku panda kesulilo liumandekua wa va Yudea, osoma yimue yikuavo ya pama ya laikele oku katukila olofeka via kala ocipepi lo Bavulono loku va saluisamo. (Isa. 41:​2-5) Anga hẽ va Yudea va sukilile oku kuata usumba? Sio, momo eci kua kambele anyamo alua osimbu ovina viaco ka via pitĩlile Yehova wa lembeleka afendeli vaye poku popia hati: “Ku ka kuate usumba momo ndi kasi love. Ku ka sakalale momo ndi Suku yove.” (Tanga Isaya 41:​10-13.) Nye Yehova a yonguile oku popia lolondaka viokuti: “Ndi Suku yove?” Eye ka kaile oku ivaluisa va Yudea okuti va sukilile oku u fendela, momo ovo va ci kũlĩhĩle ale. Pole, Yehova wa kala oku ivaluisa va Yudea okuti eye handi wa laikele oku va kuatisa.—Osa. 118:6.

14. Nye Yehova a linga oco a kuatise va Yudea okuti ka va kuata usumba?

¹⁴ Yehova wa tulumuisavo va Yudea vana va kala lusumba, poku va ivaluisa unene kuenda ukũlĩhĩso walua eye a kuete. Eye wa pinga ku va Yudea oco va vanje kolombungululu. Eye wa va sapuila okuti ka lulikile lika olombungululu, pole, wa vi kũlĩhavo kolonduko. (Isa. 40:​25-28) Nda Yehova wa kũlĩha olombungululu viosi kolonduko, ocili okuti eye wa kũlĩhĩlevo olonduko viafendeli vaye vosi. Nda okuti Yehova wa kuata unene woku lulika olombungululu, o kuetevo unene woku kuatisa afendeli vaye. Ocili okuti, va Yudea vana va kala kumandekua ka va kuatele esunga lioku yokoka ale oku kuata usumba.

15. Yehova wa pongiya ndati va Yudea kovina via laikele okuiya kovaso?

¹⁵ Yehova wa pongiyavo afendeli vaye kovina via laikele okuiya kovaso. Eci kua kambele otembo yimue, kelivulu lia Isaya, Suku wa sapuilile afendeli vaye hati: “Iñili volohondo viene, kuenda yiki apito konyima yene. Lisalami vokuenda kuokatembo kamue toke eci onyeño yi pita.” (Isa. 26:20) Citava okuti, olondaka evi via tẽlisiwa eci Kuro a yula o Bavulono. Ulume umue ukuovolandu okuti u Helasi wa popia hati, eci Soma Kuro a iñila vo Bavuluno, “wa handeleka olohoka viaye oku ponda vosi vana va sangiwile kosamua yolonjo viavo.” Sokolola ndomo omanu ko Bavulono va kala lusumba! Citava okuti va Yudea va tẽla oku yovuiwa, omo va pokola kolonumbi via Yehova.

16. Momo lie ka tu sukilila oku li sakalaisa calua lovina vi ka pita kovaso yoloneke? (Talavo ociluvialuvia.)

¹⁶ Nye tu lilongisilako? Ndopo tu ka liyaka lohali ya piãla, yina okuti ka ya la pita voluali. Eci oyo yi ka fetika, omanu valua va ka kuata atatahãi kuenda esakalalo. Pole, afendeli va Yehova ka va ka kuata. Etu tua kũlĩha okuti Yehova, eye Suku yetu. Tu kamamako lekolelo omo lioku kũlĩha okuti “eyovo [lietu] li kasi ocipepi.” (Luka 21:28) Ndaño muẽle ceci ocimunga cimue colofeka Embimbiliya li tukula hati Goge ci ka tu katukila, etu tu kamamako lutõi poku kolela ku Yehova. Yehova o ka tuma ovangelo oco va tu teyuile kuenda o ka eca olonumbi vina vi ka popela omuenyo wetu. Tu ka tambula ndati olonumbi viaco? Tu sukila oku talamẽla oco tu ka ci mole. Citava okuti tu ka vi tambula pocakati cakongelo. Konepa yimue, akongelo a ka kala “ndolohondo” muna okuti tu ka kolapo. Tu lipongiyila ndati ovina vi laika oku iya kovaso? Tu sukila oku likuata omunga la vamanji, oku pokola kolonumbi vi eciwa locisoko kuenda oku kolela lutima wosi okuti, Yehova eye o kasi oku songuila ocisoko caye.—Va Hev. 10:​24, 25; 13:17.

17. O sanda ndati elembeleko ku Yehova?

¹⁷ Ndaño okuti, omuenyo ka wa lelukile ku va Yudea va kala ko Bavulono, Yehova wa va ĩha elembeleko ovo va sukilile. Cimuamue haico Yehova a ka linga letu. Kovina viosi ove o ka pita lavio kovaso yoloneke, amamako oku sanda elembeleko ku Yehova. Omo liaco, kolela kohenda ya piãla ya Yehova, loku kakatela kelavoko liove kuenda ivaluka okuti, omo Yehova eye Suku yove, ku kuete lacimue o yokokela.