Wa Siata hẽ Oku Mola Eka Lia Yehova Komuenyo Wove?

1, 2. Nye omanu vamue va siata oku sima catiamẽla ku Suku?

OMANU valua va tava okuti Suku ka kapeleko ovina va siata oku linga. Ovo va sima okuti Suku ka kapeleko ovitangi va siata oku liyaka lavio. Kosãi ya Kuvala kunyamo wo 2013 eci volupale luo Filipina mua pita ehunguhungu limue lia nyõla onepa yimue yinene yolupale, nguluvulu yolupale luaco wa popia hati: “Citava okuti Suku o kasi kocitumãlo cimue cikuavo.”

² Omanu vakuavo va sima okuti Suku ka siatele oku mola ovina va linga. (Isaya 26:10, 11; 3 Yoano 11) Koloneke viupostolo Paulu omanu vamue va kuatelevo ovisimĩlo viaco. Eye wa popia eci catiamẽla kokuavo hati: “Ka va tavele oku kũlĩha Suku.” Momo va kala olondingaĩvi, vakuakunyana, kuenda va enda oku linga ovina via vĩha.​—Va Roma 1:28, 29.

3. (a) Nye tu sukila oku lipula? (b) Vembimbiliya ondaka “eka” lia Suku olonjanja vialua yi tiamisiwila pi?

³ Nye ci popiwa catiamẽla kokuetu? Tua kũlĩha okuti Yehova wa siata oku mola ovina viosi tu linga. Anga hẽ tu tava okuti Yehova wa tu kapako? Tua siata hẽ oku mola ndomo eka liaye li tu kuatisa komuenyo wetu? Vembimbiliya ondaka “eka” lia Suku olonjanja vialua yi tiamisiwila kunene waye. Lunene waye wa siata oku kuatisa afendeli vaye, kuenda oku yula ovanyãli vaye. (Tanga Esinumuĩlo 26:8.) Yesu wa popia hati omanu vamue va laikele oku “mola Suku.” (Mateo 5:8) Anga hẽ tua kongeliwa pokati komanu vaco? Tu pondola ndati oku “mola Suku”? Vocipama cilo tu lilongisa ovolandu Embimbiliya a lekisa omanu va mola eka lia Suku komuenyo wavo kuenda vana ka va li muile. Tu lilongisavo ndomo ekolelo li tu kuatisa oku mola eka lia Suku.

OVO VA LIKALA OKU MOLA EKA LIA SUKU

4. Momo lie ovanyãli va va Isareli va likalela oku mola eka lia Suku?

⁴ Kosimbu omanu valua va kuatele epuluvi lioku mola kuenda oku yeva ndomo Suku a kuatisa va Isareli. Yehova wa linga ovikomo oco a yovole afendeli vaye Kegito, kuenda oku yula olosoma vialua Vofeka Yohuminyo. (Yehosua 9:3, 9, 10) Ndaño okuti olosoma vikuavo via yeva kuenda via mola ndomo Yehova a popela afendeli vaye, “vosi va liongoluila pamosi lutima umuamue, ha va liyaki la Yehosua kuenda va Isareli.” (Yehosua 9:1, 2) Eci olosoma via liyaka la va Isareli, via kuata epuluvi lioku mola eka lia Yehova Suku. Omo liunene wa velapo wa Yehova, “ekumbi lia talama, kuenda osãi ya talama, toke omanu va fetuluinya ovanyãli vavo.” (Yehosua 10:13) Pole, Yehova wa ecelela okuti ovanyãli va va Isareli va ‘tĩlisa ovitima viavo,’ oco va linge lavo uyaki. (Yehosua 11:20) Kuenje, ovanyãli va va Isareli va yuliwa, momo ka va tavele oku limbuka okuti Yehova wa kala oku yakelako afendeli vaye.

5. Nye ca vetiya Soma Ahava una wa kala ondingaĩvi oku likala oku tava?

⁵ Soma Ahava una wa kala ondingaĩvi, wa kuata epuluvi lioku mola eka lia Suku olonjanja vialua. Omo liaco, Eliya wo sapuila hati: “ka ku kala olume ndaño ombela, te nda londaka yange.” (1 Olosoma 17:1) Olondaka evi via tẽlisiwa lika omo lieka lia Suku, pole Ahava wa likala oku tava kolondaka viaco. Noke, Eliya wa likutilila ku Yehova, kuenje Yehova wo tambulula poku tuma ondalu ya tunda kilu. Ahava wa mola ovina viaco. Noke, Eliya wa sapuila ku Ahava hati Yehova wa laikele oku malako ocitenya kuenje o tuma ombela yalua. (1 Olosoma 18:22-45) Ndaño okuti Ahava wa mola ovikomo viosi via lingiwa, pole ka tavele okuti wa mola unene wa Yehova. Nye tu pondola oku lilongisa kovolandu aco? Tu sukila oku mola eka lia Suku komuenyo wetu.

OVO VA MOLA EKA LIA YEHOVA

6, 7. Nye va Giveone kumue la Rahava va limbuka?

⁶ Va Giveone va kala omanu vamue va litepa lomanu vakualofeka va kala ocipepi lavo. Ovo va mola eka lia Suku. Omo okuti va Giveone ka va yonguile oku liyaka la va Isareli va linga ombembua lavo. Momo lie? Momo va yeva eci catiamẽla ku Yehova kuenda ovina viosi a linga. (Yehosua 9:3, 9, 10) Poku limbuka okuti Yehova eye wa kala oku yakelako va Isareli, va lekisa olondunge.

⁷ Rahava wa molavo eka lia Yehova. Ndaño okuti ka pangele onepa kepata lia va Isareli, pole wa yeva ndomo Yehova a yovola afendeli vaye Kegito. Eci olondavululi vivali via pitĩla kokuaye, wa vi sapuila hati: “Nda kũlĩha okuti Yehova [o] wĩhi ofeka.” Rahava wa kolelele okuti Yehova wa laikele oku u popela kumue lepata liaye. Eye wa lekisa ekolelo ku Yehova, ndaño wa kũlĩhĩle okuti ovina a kala oku linga vi kapa kohele omuenyo waye.​—Yehosua 2:9-13; 4:23, 24.

8. Va Isareli vamue va limbuka ndati eka lia Suku?

⁸ Soma Ahava una wa kala ondingaĩvi ka limbukile okuti Suku eye wa linga ocikomo caco. Pole, va Isareli vamue omo lioku mola ondalu ya tunda kilu eci ohutililo ya Eliya ya tambuluiwa va limbuka okuti, Suku eye wa linga ocikomo caco. Omo liaco, va kaluka vati: “Yehova eye Suku [yocili]!” (1 Olosoma 18:39) Ocili okuti va mola unene wa Suku.

9. Koloneke vilo, tu pondola oku mola ndati Yehova kuenda eka liaye?

⁹ Tua konomuisa ovolandu awa kuenda ovolandu ãvi a tu kuatisa oku kuata elomboloko lioku “mola Suku” ale oku mola eka liaye. Osimbu tu amamako oku kũlĩha Yehova kuenda ovituwa viaye, tu mola eka liaye ‘lovaso utima’ wetu. (Va Efeso 1:18) Ovina viaco vi tu vetiya oku setukula ekolelo liomanu vo kosimbu kuenda vo koloneke vilo okuti, va mola ndomo Yehova a siata oku kuatisa afendeli vaye. Anga hẽ kuli uvangi u lekisa okuti Yehova o kasi oku kuatisa omanu koloneke vilo?

UVANGI U LEKISA EKA LIA SUKU KOLONEKE VILO

10. Uvangi upi tu kuete u lekisa okuti Yehova o kasi oku kuatisa omanu koloneke vilo? (Tala elitalatu kefetikilo liocipama cilo.)

¹⁰ Tu kuete ovovangi alua a lekisa okuti Yehova o kasi oku amamako oku kuatisa omanu koloneke vilo. Tua siata oku yeva ovolandu omanu va pinga ekuatiso ku Suku volohutililo, kuenje olohutililo viaco via tambuluiwa. (Osamo 53:2) Manji umue o tukuiwa hati Allan, osimbu a kala oku kundila kocifuka cimue citito kofeka yo Filipina, wa sanga ukãi umue wa fetika oku lila eci o mola. Eye wa popia hati: “Eteke liaco komẽle, ukãi waco wa likutilila oco Olombangi Via Yehova viu sange.” Eci a kala umalẽhe, wa enda oku lilongisa Embimbiliya Lolombangi Via Yehova, pole eci a kueliwa wa ilukila kocifuka cimue, kuenje wa liwekapo oku lilongisa Embimbiliya. Omo okuti Suku wa tambulula lonjanga ohutililo yaye, co nenela esanju. Osimbu ka tẽlisile unyamo, wa litumbika ku Yehova.

11, 12. (a) Yehova wa siata oku kuatisa ndati afendeli vaye? (b) Lombolola ndomo Yehova a kuatisa manji umue ukãi.

¹¹ Afendeli valua va Yehova va siata oku mola ekuatiso lieka liaye omo lioku siapo ovituwa vimue vĩvi ndeci: Oku sipa, oku nyua olodroga, ale oku tala omanu va kasi epolõla haivo va linga ovina viumbondo. Omanu vamue va popia vati va siata oku seteka oco va liwekepo oku linga ovina viaco, pole ka va kasi oku yula ocitangi caco. Omo liaco, nda va pinga ekuatiso ku Yehova, eye eca kokuavo “unene wa piãla,” kuenje va liwekapo oku kuata ovituwa ka via sungulukile.​—2 Va Korindo 4:7; Osamo 37:23, 24.

¹² Yehova wa siatavo oku kuatisa afendeli vaye oco va pandikise kovitangi. Manji umue ukãi o tukuiwa hati Amy wa pitavo lulandu waco. Eye wa tambuile ocikele coku ka kuatisa kupange woku tunga Onjango yimue Yusoma kuenda onjo yolomisionaliu vocifuka cimue citito vo Oseanu Pasifiku. Omanu va kasi vocifuka caco va kuatele ovituwa via litepa levi viaye, momo olonjanja vimue ka va endele oku kuata olusu ale ovava, atapalo a enda oku yuka ovava, wa kuatela ongeva epata liaye, kuenda wa kala vohondo yimue yitito vowotele. Eteke limue wa kelohãla manji umue ukãi a kala oku talavaya laye. Noke wa yeva esumuo omo lieci a linga. Eci a tiukila vohondo yaye ka mua kuatele olusu, wa likutilila ku Yehova oco o kuatise. Eci olusu yeya wa tanga ocipama cimue Vutala Wondavululi catiamẽla ku vamanji va pindisiwa kosikola yo Gileada. Ocipama caco ca lombolola ocitangi a kala oku liyaka laco. Eye wa popia hati: “Nda kala ndu okuti Yehova wa sapela lame kuteke waco. Kuenje ca ndi vetiya oku amamako oku tẽlisa ocikele nda tambula.”​—Osamo 44:25, 26; Isaya 41:10, 13.

13. Uvangi upi tu kuete u lekisa okuti Yehova wa siata oku kuatisa afendeli vaye oku teyuila omoko yavo yoku kunda?

¹³ Yehova wa siata oku kuatisa afendeli vaye oco va teyuile olondaka viwa kuenda omoko yavo yoku linga upange waco. (Va Filipoi 1:7) Eci olombiali vimue via seteka oku tateka upange woku kunda tua liteyuila kombonge. Tunde kunyamo wo 2.000, tua yula eci ci soka 268 kovitangi kombonge ya velapo, kuenda 24 kovitangi Kekanga Linene Kombala yo Europa yi Teyuila Omanu. Ocili okuti, lomue o pondola oku tateka eka lia Suku.​—Isaya 54:17; tanga Isaya 59:1.

14. Uvangi upi ukuavo tu kuete u lekisa okuti Yehova wa siata oku kuatisa afendeli vaye?

¹⁴ Oku kundiwa kuolondaka viwa voluali luosi ku eca uvangi wekuatiso lieka lia Suku. (Mateo 24:14; Ovilinga 1:8) Elitokeko li sangiwa pokati kafendeli va Yehova kolofeka viosi, li kasi oku tẽliwa lika lekuatiso lia Yehova. Elitokeko liaco lilikasi! Ndaño omanu vana ka va fendela Yehova va tavavo okuti, ‘Suku o kasi pokati ketu.’ (1 Va Korindo 14:25) Tu kuete uvangi u lekisa okuti Suku o kasi lomanu vaye. (Tanga Isaya 66:14.) Nye ci popiwa catiamẽla kokuove? Wa siata hẽ oku mola eka lia Yehova komuenyo wove?

WA SIATA HẼ OKU MOLA EKA LIA YEHOVA KOMUENYO WOVE?

15. Momo lie olonjanja vimue ka tua siatelele oku mola eka lia Yehova komuenyo wetu?

¹⁵ Olonjanja vimue ka tu pondola oku mola eka lia Suku komuenyo wetu. Momo lie? Eci tu liyaka lovitangi vialua, pamue tu ivalako okuti Yehova kosimbu wa tu kuatisa. Eci oco ca pita la Eliya. Ndaño okuti wa kuatele utõi, pole eci Nasoma Isevele a yonguile oku u ponda, wa kuata usumba. Vepuluvi liaco, wa ivalako ndomo Yehova o kuatisile kosimbu. Embimbiliya li popia hati Eliya wa yonguile oku fa. (1 Olosoma 19:1-4) Pi a sukilile oku sanga ekuatiso kuenda utõi? Wa sukilile oku kolela ku Yehova.​—1 Olosoma 19:14-18.

16. Tu pondola oku mola ndati Suku eci tu liyaka lovitangi?

¹⁶ Omo okuti Yovi wa tiamisilile calua utima kovitangi viaye, ka limbukile ndomo Yehova a tendele ovitangi viaye. (Yovi 42:3-6) Olonjanja vimue tu simavo okuti ka ca lelukile oku mola Suku omo liovitangi tua siata oku liyaka lavio. Nye ci pondola oku tu kuatisa oku mola ovina Suku a siata oku tu lingila? Tu sukila oku sokolola ovina Embimbiliya li popia viatiamẽla kovitangi vietu. Kuenje, tu kũlĩha ciwa Yehova kuenda tu popia tuti: “Letũi nda ku yeva yeva, cilo puãi iso liange lia ku mõla.”

17, 18. (a) O pondola oku mola ndati eka lia Yehova komuenyo wove? (b) Lombolola ulandu umue u lekisa ndomo Suku a siata oku tu kuatisa koloneke vilo.

¹⁷ O pondola oku mola ndati eka lia Yehova komuenyo wove? Tu konomuisi atosi atãlo. Liatete, pamue o limbuka okuti Yehova wa ku kuatisa oku sanga ocili. Liavali, citava okuti ivaluka eci wa endele kohongele yimue Yakristão vocili oku yevelela ohundo yimue, kuenje wa popia ndoco: “Eci oco nda sukilile!” Liatatu, pamue wa limbuka ndomo Yehova a tambulula olohutililo viove. Liakuãla, citava okuti o yongola oku likolisilako oku linga upange wa Yehova, noke o mola ndomo a ku kuatisa oku tẽlisa ocimãho caco. Liatãlo, pamue wa siapo upange wove woku sanda eteku omo okuti wa kala oku ku tateka oku tẽlisa ciwa upange wa Yehova Suku. Noke, wa limbuka okuti Eye wa tẽlisa ohuminyo yaye yokuti: “Lalimue eteke hu yanduluka.” (Va Heveru 13:5) Nda ukamba wetu la Yehova wa pamisiwa, ci leluka oku mola eka liaye komuenyo wetu.

¹⁸ Manji umue o tukuiwa hati Sarah wo kofeka yo Kenia wa popia hati: “Nda kongela vohutililo yange omunu nda enda oku longisa Embimbiliya eci nda limbuka okuti ka kuete onjongole yoku lilongisa Embimbiliya. Nda pinga ku Yehova nda citava okuti ndi liwekapo oku u longisa. Eci nda mala oku popia siti: ‘Amene,’ o telefone yange ya fetika oku vilikiya. Kuenje, omunu nda enda oku longisa Embimbiliya wa ndi pula nda citava okuti enda lame kohongele! Nda komõha calua vepuluvi liaco!” Nda tua sokolola ovina Suku a siata oku tu lingila tu mola ekuatiso lieka liaye. Manji umue ukãi o tukuiwa hati Rhonna o kasi vocifuka co Asia, wa popia hati, olonjanja vimue pa pita otembo yalua oco tu limbuke ndomo Yehova a siata oku tu kuatisa komuenyo wetu. Eye wa amisako hati: “Tu komõha calua poku limbuka ndomo a kapako omunu lomunu pokati!”

19. Nye tu sukila oku linga oco tu mole Suku?

¹⁹ Yesu wa popia hati omanu va ka “mola Suku,” va sukila oku “yela vutima.” (Mateo 5:8) Eci ci lomboloka nye? Ci lomboloka okuti tu sukila oku amamako oku kuata ovisimĩlo via sunguluka kuenda oku liwekapo oku linga ovina ka via sungulukile. (Tanga 2 Va Korindo 4:2.) Vocipama cilo, tua lilongisa okuti oco tu mole Suku, tu sukila oku amamako oku pamisa ukamba wetu laye. Vocipama ci kuaĩmo, tu ka konomuisa ndomo ekolelo li pondola oku tu kuatisa oku mola eka lia Yehova lonjila yimue ya leluka komuenyo wetu.