Apulilo A Lingiwa La Vakuakutanga

Olondaka vi sangiwa vukanda wa Va Heveru 4:12 viokuti, “ondaka ya Suku yi kasi lomuenyo kuenda yi kuete unene” vi lomboloka nye?

Olondaka evi vi tu kuatisa oku kuata elomboloko liokuti Paulu wa kala oku popia esapulo lia tiamẽla kocipango ca Suku, ndomo ca lekisiwa Vembimbiliya.

Olonjanja vialua tua siata oku tukula valivulu etu ukanda wa Va Heveru 4:12 oco tu lekise okuti Embimbiliya li kuete unene wo ku pongolola ovimuenyo viomanu ndomo tua siata oku ci mola. Pole, ci kuete esilivilo oku kuata elomboloko lieci Paulu a kala oku popia eci a soneha olondaka vi sangiwa vukanda wa Va Heveru 4:12. Eye wa kala oku vetiya Akristão va Heveru oco va kuatise koku tẽlisiwa kuocipango ca Suku. Vialua pokati kovipango viaco vi sangiwa Vembimbiliya. Paulu wa tukula ulandu wa va Isareli vana Suku a yovola Kengito. Ovo va kuata elavoko lioku iñila vofeka yo huminyo “yi tumõha asenjele lowiki,” muna va laikele oku kuata epuyuko liocili.​—Etundilo 3:8; Esinumuĩlo 12:9, 10.

Eci oco ca kala ocipango ca Suku. Pole va Isareli va likala omoko ya Yehova kuenda ka va lekisile ekolelo. Eli olio esunga lieci okuti valua pokati kavo ka va iñilile vepuyuko liaco. (Atendelo 14:30; Yehosua 14:6-10) Pole Paulu wa amisako loku popia hati, handi kua kamba “ohuminyo yoku iñila vepuyuko [lia Suku].” (Va Heveru 3:16-19; 4:1) “Ohuminyo” yaco onepa yimue Suku a lekisa okuti yi panga onepa kocipango caye. Tu pondolavo oku tanga kuenda oku kuatisa kocipango caco ndeci Akristão va Heveru va linga. Oco Paulu a lekise okuti ohuminyo yaco yatiamẽla Kovisonehua, eye wa tukula olondaka vi sangiwa velivulu Liefetikilo 2:2 kuenda Osamo 95:11.

Oku kũlĩha okuti “kua kamba ohuminyo yoku iñila vepuyuko [lia Suku]” ci vetiye utima wetu. Tua kolela okuti eci Embimbiliya li longisa catiamẽla koku iñila vepuyuko lia Suku ocili, kuenda tua siata oku likolisilako oco tu iñile vepuyuko liaco. Ka tu lingi ovina viaco poku kuama ocihandeleko ca eciwile ku Mose, ale oku linga ovina vimue viwa oco tu taviwe la Suku. Pole, omo liekolelo tu kuetele Suku, tu kuete esanju lioku kuatisa kocipango caye kuenda oku amamako oku ci linga. Omanu valua voluali luosi, va siatavo oku lilongisa Embimbiliya kuenda oku lilongisa kovina Yehova a siata oku situlula viatiamẽla kocipango caye. Eci ca vetiya omanu valua oku linga apongoloko komuenyo wavo, oku pamisa ekolelo liavo kuenda va papatisiwa. Apongoloko va siata oku linga komuenyo wavo, weca uvangi wokuti, “ondaka ya Suku yi kasi lomuenyo kuenda yi kuete unene.” Ovina Suku a situlula Vembimbiliya viatiamẽla kocipango caye via siata oku tu kuatisa komuenyo wetu kuenda vi ka amamako oku kuata unene kokuetu.