Vumba Yehova Lutima Wosi!

1-3. Nye ci lomboloka oku vumba Yehova “lutima wosi”? Tukula ulandu umue.

VOSI yetu ka tua lipuile kuenda tua siata oku lueya. Tu eca olopandu omo okuti Yehova wa linga eliangiliyo liocisembi oco a ecele akandu etu. Nda tua lekisa umbombe loku likekembela tu pondola oku pinga ongecelo. Tua kũlĩha okuti, Yehova ka lingi letu eci “ca soka lakandu etu.” (Osamo 103:10) Pole, tu sukila oku u ‘vumba lutima wetu wosi.’ (1 Asapulo 28:9) Tu pondola oku ci linga ndati ndaño okuti ka tua lipuile?

² Oco tu kuatisiwe, tu kũlĩhĩsi ulandu womuenyo wa Soma Asa kuenda wa Soma Amasiya. Olosoma viaco vivali, via enda oku linga ovina viwa pole, via endavo oku lueya omo okuti ka va lipuile. Pole, Embimbiliya li popia okuti, “Asa wa pua evelo koloneke viosi viomuenyo waye.” (2 Asapulo 15:16, 17; 25:1, 2; Olosapo 17:3) Olonjanja viosi wa sanda oku sanjuisa Yehova kuenda wa “litumbika kupange” waye lutima wosi. (1 Asapulo 28:9) Amasiya, ka vumbile Yehova “lutima wosi.” Noke yoku kundula ovanyãli va Suku, eye wa nena oviteka viavo kuenje va fetika oku vi fendela.—2 Asapulo 25:11-16.

³ Omunu wosi o vumba Yehova Suku “lutima wosi,” o sole Yehova kuenda u fendela otembo ka yi pui. Vembimbiliya ondaka “utima” olonjanja vialua yi lomboloka ndomo tua tuwa. Voku tuwa kuaco, mua kongela ovisimĩlo vietu, ocisola cetu, ovina tu sole oku linga komuenyo wetu kuenda esunga lieci tu lingila ovina viaco. Ndaño okuti ka tua lipuile pole, tu pondola oku vumba Yehova lutima wetu wosi. Etu tu vumba Yehova momo tu yongola oku ci linga pole, ka tu ci lingila lika omo liekisika ale omo liocituwa cetu.—2 Asapulo 19:9.

4. Nye tu konomuisa cilo?

⁴ Tu pondola oku kuata elomboloko lia suapo liatiamẽla koku vumba Suku lutima wosi, poku kũlĩhĩsa ulandu womuenyo wa Asa kumue lolosoma vikuavo vitatu vio ko Yuda. Olosoma viaco vievi: Yehosafata, Hesekiya kuenda Yosiya. Ndaño okuti, olosoma viaco vikuãla via enda oku lueya, pole, via sanjuisa Yehova. Eye wa limbukile okuti ovo vo vumba lutima wosi. Momo lie Suku a va tendela lonjila yaco kuenda tu setukula ndati ongangu yavo?

ASA WA “VUMBA YEHOVA LUTIMA WOSI”

5. Nye Asa a linga eci a tumbikiwa kusoma?

⁵ Asa wa kala osoma yatatu yo Yuda eci ofeka ya va Isareli ya tepiwa kusoma wa va Isareli kuenda kusoma wa va Yuda. Eci Asa a linga osoma ya va Yuda, eye wa nõlapo oku kundula efendelo liesanda kuenda wa nyõla evĩho liukahonga kuviali waye. Eye wa kundula oviteka vina omanu va enda oku fendela kuenda wa tundisa omanu vana va kala oku linga upuepue vonembele. Asa wa tundisa inakulu yaye “komangu yunasoma momo wa pangele ociteka.” (1 Olosoma 15:11-13) Asa wa vetiyavo omanu “oku sanda Yehova” kuenda oku pokola ‘kovihandeleko lolonumbi viaye.’ Asa wa likolisilako oku kuatisa omanu oku fendela Yehova.—2 Asapulo 14:4.

6. Nye Asa a yeva vutima eci va Etiopia va kundula o Yuda?

⁶ Vokuenda kuekũi lianyamo atete wuviali wa Asa, kuviali wo ko Yuda ka kua kaile ovoyaki. Noke va Etiopia veya leci ci soka ohuluwa yasualali kuenda ovita vitatu kakãlu vuyaki oco va liyake la va Yuda. (2 Asapulo 14:1, 6, 9, 10) Nye Asa a linga? Eye ka kuatele atatahãi okuti Yehova o pondola oku kuatisa afendeli vaye. Omo liaco, eye wa likutilila ku Yehova oco a va kuatise oku yula uyaki waco. (Tanga 2 Asapulo 14:11.) Olonjanja vimue, Yehova wa nõla afendeli vaye oco va yule ovanyali vavo, ndaño okuti olosoma viaco ka via kolelele kokuaye. Eye wa ci linga oco a lekise okuti eye Suku yocili. (1 Olosoma 20:13, 26-30) Olonjanja vimue, Yehova wa kuatisa afendeli vaye momo Asa wa kolelele kokuaye. Yehova wa tambulula ohutililo ya Asa kuenda ovo va yula uyaki. (2 Asapulo 14:12, 13) Noke Asa wa linga ekandu linene poku pinga ekuatiso kosoma ya va Asuria, okuti ku Yehova hakoko. (1 Olosoma 15:16-22) Ndaño lekandu liaco, Yehova wa limbuka okuti Asa u kuetele ocisola. Utima waye wa “sungulukila Yehova oloneke viaye viosi.” Tu pondola oku setukula ndati ongangu yiwa ya Asa?—1 Olosoma 15:14.

7, 8. O pondola oku kuama ndati ongangu ya Asa?

⁷ Tua kũlĩha ndati okuti tu kasi oku linga upange wa Yehova lutima wosi? Tu pondola oku li pula ndoco: ‘Ndi pokola hẽ ku Yehova ndaño okuti ka ca lelukile? Nda nõlapo hẽ oku amamako oku yelisa efendelo liocili?’ Sokolola utõi Asa a lekisa poku upa inakulu yaye ocikele coku kala nasoma! Olonjanja vimue ove o sukilavo oku kuata utõi ndeci Asa a linga. Nye o nõlapo oku linga nda umue ngandiove ale ekamba liove lia linga ekandu pole ka likekembela kuenje o tundisiwa vekongelo? O nõlapo hẽ oku yuvula oku kuata ukamba lomunu waco? Utima wove u ku vetiya oku linga nye?

⁸ Ndeci ca pita la Asa, pamue tu limbuka okuti omanu vosi va tu ñualelapo. Citava okuti, omanu o tangela lavo kosikola ale alongisi vove, va ku pembula omo okuti ove Umbangi ya Yehova. Ale citava okuti, omanu o talavaya lavo va sima okuti ove wa topa omo lioku laña kupange oco ende kohongele yimbo ale oku likala oku talavaya olowola vialua. Nda o kasi oku liyaka locitangi caco, pinga ekuatiso ku Yehova Suku ndeci Asa a linga. Likutilila ku Yehova oco o kuate utõi loku amamako oku linga eci ca sunguluka. Ivaluka okuti Yehova Suku wa kolisa Asa kuenda eye o pondolavo oku ku kolisa.

9. Tu sanjuisa ndati Yehova kupange woku kunda?

⁹ Asa ka pitisile lika kovaso ovisimĩlo viaye muẽle, eye wa vetiya omanu vakuavo oku “sanda Yehova.” Tua siatavo oku kuatisa omanu oco va fendele Yehova. Eye o ci limbuka eci tu sapela lomanu catiamẽla kokuaye. Yehova o sanjukavo calua eci a limbuka ovina tu kasi oku linga omo liocisola tu u kuetele kuenda omo okuti tua sakalala lekalo liomanu lio kovaso yoloneke!

YEHOSAFATA WA SANDA YEHOVA

10, 11. Tu setukula ndati Yehosafata?

¹⁰ Omõla a Asa, Yehosafata “Wa endaila vonjila ya isiaye Asa.” (2 Asapulo 20:31, 32) Wa ci linga ndati? Yehosafata wa kuama ongangu ya isiaye poku vetiya omanu oku amamako oku vumba Yehova. Eye wa tuma alume oku enda kalupale o ko Yuda oco va longise omanu “lelivulu liovihandeleko via Yehova.” (2 Asapulo 17:7-10) Eye wa enda kocikanjo cokutakelo cuviali wo ko Isareli, noke wa endavo komanu va kala kolomunda vio ko Efarimi oco a va ‘tiuwiye ku Yehova.’ (2 Asapulo 19:4) Yehosafata wa kala osoma yimue okuti “wa sandele Yehova lutima waye wosi.”—2 Asapulo 22:9.

¹¹ Koloneke vilo, Yehova o yongola okuti omanu voluali luosi va longisiwa eci catiamẽla kokuaye, kuenda vosi yetu tu pondola oku kuatisa kupange waco. Anga hẽ ocimãho cove oku kuatisa kupange waco olosãi viosi? Ange hẽ o yongola oku longisa Embimbiliya komanu vakuavo oco va fetikevo oku fendela Yehova? Anga hẽ wa siata oku likutilila catiamẽla kupange waco? Nda wa li kolisilako, Yehova o ka ku kuatisa oku longisa Embimbiliya komunu umue. Wa nõlapo hẽ oku lilongisa Embimbiliya lomunu umue poku sokiya otembo yove eci o kasi kepuyuko? Tu likolisilako oku kuatisa omanu oku fetika vali oku vumba Yehova, ndeci Yehosafata a linga. Tu kuatisivo vana va liwekapo oku kunda loku endaenda kolohongele. Handi vali, akulu vekongelo va sukila oku linga esokiyo lioku nyula loku kuatisa vana va tundisiwa vekongelo, va sangiwa vocikanjo cavo, okuti va liwekapo oku linga ovina ka via sungulukile.

12, 13. (a) Momo lie Yehosafata a kuatela usumba kuenda nye a nõlapo oku linga? (b) Momo lie tu sukilila oku kuama ongangu ya Yehosafata?

¹² Eci asualali va pama veya oku liyaka lo Yuda, Yehosafata wa kolela ku Yehova ndeci isiaye Asa a linga. (Tanga 2 Asapulo 20:2-4.) Eye wa kuata usumba walua kuenje wa pinga ekuatiso ku Yehova. Vohutililo a linga wa limbuka okuti, eye nda ka telẽle oku yula ovanyali. Handi vali, wa popiavo okuti eye kumue lomanu vaye, ka va kũlĩhĩle eci va sukilile oku linga. Yehosafata ka kuatele atatahãi okuti, Yehova wa ponduile oku va kuatisa. Eye wa popia hati: “Tu imba ovaso kokuove.”—2 Asapulo 20:12.

¹³ Olonjanja vimue, ka tu ka tẽla ndomo tu ka tetulula ocitangi cimue kuenda citava okuti tu kuata usumba. (2 Va Korindo 4:8, 9) Ivaluka eci Yehosafata a linga. Eye wa likutilila ku Yehova loku u sapuila ndomo va hongua kuenda wa ci linga kovaso omanu vosi. (2 Asapulo 20:5) Asongui vepata va pondola oku setukula ongangu ya Yehosafata. Omo liaco, pinga ku Yehova oco a ku kuatise kumue lepata liove, oco vu tẽle oku liyaka lovitangi loku kũlĩha ovina u sukila oku linga. Ku ka kuate osõi yokuti epata liove li yevelela olohutililo viaco. Ovo va ka limbuka ndomo ove wa kolela ku Yehova. Eye wa kuatisa Yehosafata kuenda o ka ku kuatisavo.

HESEKIYA WA AMAMAKO OKU LINGA OVINA VIWA

14, 15. Hesekiya wa kolelele ndati ku Suku lutima wosi?

¹⁴ Hesekiya wa kala osoma yikuavo ya “kakatela Yehova.” Eye wa ci linga, ndaño okuti isiaye wa linga ovina vĩvi kuenda wa fendela oviteka. Hesekiya “wa tetola oviñumañuma, wa timbula Asera, wa nyanyola onyoha yosipi yina Mose a tungile,” momo va Isareli va kala oku vi fendela. Hesekiya wa litumbikile kupange wa Yehova lutima wosi. ‘Eye wa amamako oku lava ovihandeleko vina, Yehova a handelekele ku Mose.’—2 Olosoma 18:1–6.

¹⁵ Osimbu Hesekiya a kala osoma, asualali va pama va Asuria va nyõla o Yuda kuenda va yonguilevo oku nyõla o Yerusalãi. Soma ya va Asuria, Senakeriva, wa pembula Yehova kuenda wa yonguile okuti Hesekiya o li eca peka liaye. Vokuenda kuotembo yaco yovitangi, Hesekiya wa kolelele Yehova lutima wosi kuenda wa likutilila oco o kuatise. Eye wa kũlĩhĩle okuti, Suku wa velapo okuti va Asuria ci sule kuenda eye wa ponduile oku teyuila afendeli vaye. (Tanga Isaya 37:15-20.) Suku wa tambulula ohutililo yaye poku tuma ungelo umue wa ponda ci soka 185.000 kasualali va Asuria.—Isaya 37:36, 37.

16, 17. O pondola oku setukula ndati Hesekiya?

¹⁶ Vokuenda kuotembo, Hesekiya wa vela kuenda wa kala oku panda kolofa. Vokuenda kuotembo yaco yovitangi, eye wa pinga oco Yehova a ivaluke ekolelo liaye kuenda oco o kuatise. (Tanga 2 Olosoma 20:1-3.) Yehova wa yevelela ohutililo ya Hesekiya kuenje wo sakula. Lekuatiso Liembimbiliya tua kũlĩha okuti koloneke vilo Suku ka pondola oku linga ocikomo coku tu sakula ale oku vokiya oloneke viomuenyo wetu. Tu pondola oku kolela okuti Yehova o pondola oku tu kuatisa ndeci a linga la Hesekiya. Tu pondola oku popia ndoco: “A Yehova, nda likutilila kokuove. Ivaluka ndeci nda endaile kovaso ove locili kuenda lutima wa sunguluka.” Anga hẽ wa kolela okuti olonjanja viosi Yehova o ku kuatisa, ndaño ceci o kasi oku vela?—Osamo 41:3.

¹⁷ Kovina vipi vikuavo tu pondola oku setukula Hesekiya? Pamue, kuli ocina cimue ci yongola oku tateka ukamba wetu la Yehova ale ka tu kasi oku kuata otembo yalua yoku u vumba. Omanu valua koloneke vilo va tenda omanu vakuavo ndoviteka. Ovo va komõha eci va mola omanu va kemãla kuenda vana ka va kũlĩhĩle. Omanu valua va siata oku pesela otembo yalua poku tanga ovolandu atiamẽla komanu vaco loku tala alitalatu avo. Omanu vaco, olonjanja vialua va siata oku talavaya lovingungu viasapulo ale ovimalẽho vikuavo oco va sapele lomanu vo Internet. Ocili okuti tu kuata esanju lialua eci tu sapela la vangandietu ale akamba lekuatiso liovimalẽho viaco. Pole, tu pondola oku pesela otembo yalua kovina viaco. Citava okuti, tu pondola oku lekisa epela nda omanu valua va popia vati, va sole calua alitalatu etu ale olonumbi tua soneha vo Internet. Handi vali, nda tua limbuka okuti omanu vamue va liwekapo oku tala alitalatu etu ale oku tanga olonumbi tua kapa vo internet tu pondola oku sumua. Tu pondola oku lilongisa kongangu yupostolo Paulu, ya Akuila kuenda ya Prisila. Osima hẽ okuti oloneke viosi ovo va enda oku pesela otembo oco va kũlĩhe ovina omanu vakuavo va siata oku linga, capiãla enene vana ka va vumbi Yehava? Embimbiliya li popia okuti, ‘Paulu wa litumbikile koku kunda ondaka.’ Prisila kuenda Akuila va litumbikile kupange woku kunda loku lombolola “ciwa onjila ya Suku” komanu vakuavo. (Ovilinga 18:4, 5, 26) Tu pondola oku li pula ndoco: ‘Anga hẽ nda siata oku lekisa utate oco si ka tende omanu ndoviteka? Anga hẽ nda siata oku yuvula oku pesela otembo yalua koku linga ovina ka vi kuete esilivilo lia velapo?’—Tanga Va Efeso 5:15, 16.

YOSIYA WA POKOLA KOVIHANDELEKO VIA YEHOVA

18, 19. Tu pondola oku setukula ndati Yosiya?

¹⁸ Soma Yosiya wa pokolavo kovihandeleko via Yehova “lutima waye wosi.” (2 Asapulo 34:31) Yosiya wa kala oneka ya Hesekiya. Osimbu handi a kala umalẽhe, “oco a fetika oku sandiliya Suku ya Isiaye Daviti.” Eci a kuata 20 kanyamo, wa fetika oku upa oviteka vo Yuda. (Tanga 2 Asapulo 34:1-3.) Pokati kolosoma viosi vio Yuda, Yosiya eye wa li kolisilako vali calua oku sanjuisa Yehova. Eteke limue ocitunda cinene ca sanga vonembele, elivulu Liovihandeleko via Suku. Citava okuti elivulu liaco, lia sonehiwa la Mose! Eci usonehi a tanga elivulu liaco kovaso a Yosiya, eye wa limbuka okuti wa sukilile oku linga ovina vikuavo oco a vumbe Yehova lutima wosi. Yosiya wa vetiyavo omanu vakuavo oku ci linga. Poku ci linga, omanu “ka va pambukile poku kuama Yehova” osimbu Yosiya a kala komuenyo.—2 Asapulo 34:27, 33.

¹⁹ Nda ove umalẽhe o pondola oku setukula ongangu ya Yosiya oco o kuate ukamba uwa la Yehova. Citava okuti, Yosiya wa lilongisa la sekulu yaye Soma Manase una wa likekembela, okuti Yehova ukuakuecela. O pondolavo oku lilongisa lakulu vepata liove kuenda vekongelo. Ovo va pondola oku ku sapuila eci catiamẽla kovina viwa Yehova a va lingila. Handi vali, ivaluka eci Yosiya a yeva vutima poku lilongisa ovina Ovisonehua vi popia. Eye wa yonguile oku sanjuisa Yehova kuenje wa linga apongoloko. Poku tanga Ovisonehua, citava okuti ci ka ku vetiya oku amamako oku pokola ku Yehova. Nda wa ci linga, ukamba wove laye u ka pamisiwa kuenda o ka sanjuka. O ka kuatavo onjongole yoku sapela lomanu vakuavo catiamẽla ku Yehova. (Tanga 2 Asapulo 34:18, 19.) Eci o lilongisa Embimbiliya, o ka limbuka ovina o sukila oku mioñolõla kekalo liove lioku vumba Suku. Nda wa limbuka ovina o sukila oku mioñolola, linga apongoloko aco ndeci Yosiya a linga.

VUMBA YEHOVA LUTIMA WOSI!

20, 21. (a) Ovina vipi olosoma vikuãla via linga? (b) Nye tu ka konomuisa vocipama cikuãimo?

²⁰ Nye tu pondola oku lilongisa kulandu wolosoma vikuãla va vumba Yehova lutima wosi? Alume vaco va nolẽlepo oku sanjuisa Yehova kuenda oku u fendela komuenyo wavo wosi. Ovo va kolelele kokuaye eci ovanyali va pama va yonguile oku liyaka lavo. Ca velapo ceci okuti, ovo va vumba Yehova omo liocisola vo kuetele.

²¹ Ndaño okuti olosoma viaco vikuãla ka via lipuile kuenda va lueyelevo, Yehova wa va sanjukila. Eye wa mõla ovina via kala vovitima viavo kuenda wa limbuka okuti ovo vo solele lutima wosi. Etu ka tua lipuile kuenda tua siatavo oku lueya. Pole, Yehova o ka kuatavo esanju eci a limbuka okuti tu kasivo oku u vumba lutima wosi. Vocipama cikuãimo, tu ka konomuisa eci tu pondola oku lilongisa kakulueya olosoma viaco.