Lipi Emolẽho Lieliapu?

Etambululo Liembimbiliya

Eliapu, ale Satana ociluvo cimue cespiritu ka ci muiwa. Eci ci lomboloka okuti, eye ka kuete etimba limue tu pondola oku mola.—Va Efeso 6:11, 12.

Elomboluilo omanu va siata oku linga Lieliapu ndociluvo cimue ca setahãla ocitupi cimue, lolombinga, lucĩla umue kuenda longalufu yimue.

Olonjanja vialua, Eliapu li lekisiwa ndociluvo cimue ca setahãla ocitupi cimue, lolombinga, lucĩla umue kuenda longalufu yimue. Vamue va tava okuti, elomboluilo liemolẽho lietimba Lieliapu, lia sovuiwa la vakuakutaya oviluvialuvia vo kosimbu okuti pamue va vetiyiwa lovisimĩlo kuenda lovolandu esanda a lomboluiwa lomanu.

Embimbiliya li lombolola ndati emolẽho Leliapu?

Embimbiliya li tukula Eliapu volonjila via litepa poku linga asokiso alua. Pole, alomboluilo aco, a tu kuatisa oku kuata elomboloko liovituwa vialio okuti, emolẽho halioko. Tala amue pokati kasokiso aco:

Ungelo wocinyi. Eye eca komanu ocina cimue ci molẽha ndu okuti ciwa, oco ovo va linge eci eye a yongola okuti, ka va pokola ku Suku.—2 Va Korindo 11:14.
Ohosi yi koma. Eye ongangala kuenda o ñualelapo vana va yongola oku vumba Suku.—1 Petulu 5:8.
Ocinyõha cinene. Eye o kokisa usumba, o kuete unene walua kuenda o koka enyõleho lialua.—Esituluilo 12:9.

Ovinimbu Viembimbiliya vi popia catiamẽla Keliapu

2 Va Korindo 11:14: “Satana o li luvikiya eye muẽle ndungelo wocinyi.”

Elomboloko: Satana o liviaviaya ndu okuti uwa, oco a yapuise omanu oku linga eci eye a yongola okuti, ka va pokola ku Suku.
Va Efeso 6:11: “Wali ovimalẽho viosi via eciwa la Suku oco okuti, vu tẽla oku talama ngõ katutu Eliapu.”

Elomboloko: Eliapu lia siata oku linga asokiyo ãvi, oco li vetiye omanu oku sinĩla Suku.
Tiago 4:7: “Pokoli ku Suku; puãi tamalãli Leliapu kuenje olio liu tili.”

Elomboloko: Omunu umue o pondola oku yula Satana poku pokola ku Suku.
1 Petulu 5:8: “Unyãli wene Eliapu, o ñuala ñuala ndohosi yi koma, oku sandiliya u a lia.”

Elomboloko: Eliapu li nyãle vana va pokola ku Suku kuenda li yongola oku nyõla ukamba wavo Laye.