Helie wa kala Maria Magadala?
Etambululo Liembimbiliya
Maria Magadala wa kala ondonge ukuekolelo ya Yesu Kristu. Onduko yaye Magadala ya tunda volupale luo Magdala (ale pamue Magadan), lua kala ocipepi Lokalunga ko Galilea. Citava okuti, Maria o ko a kala.
Maria Magadala wa kala umue pokati kakãi valua va linga ungende la Yesu lolondonge viaye kuenda wa eca ekuatiso kokuavo. (Luka 8:1-3) Eye wa mola eci Yesu a kala oku pondiwa kuenda wa kala umue pokati komanu vatete va mola Yesu eci a pinduiwa.—Marko 15:40; Yoano 20:11-18.
Anga hẽ Maria Magadala wa kala ocipuepue?
Embimbiliya ka li popi okuti, Maria Magadala wa kala ocipuepue. Eci Embimbiliya li popia catiamẽla komuenyo waye ceci okuti, Yesu wa tundisa olondele epanduvali vokuaye.—Luka 8:2.
Ocisimilo cokuti eye wa kala ocipuepue ca tunda pi? Noke yoku pita anyamo alua tunde eci Maria a fa, omanu vamue va popia okuti, eye wa kala ukãi una Embimbiliya ka li tukula onduko yaye (ndocipuepue) okuti, wa sukula olomãhi via Yesu lasuẽlẽla aye kuenda wo puenya lesinga liaye. (Luka 7:36-38) Pole, ka kuli Ocisonehua ci tu vetiya oku tava kondaka yaco.
Anga hẽ Maria Magadala wa kala ‘upostolo wovapostolo’?
Sio. Etavo Liokatolika li tukula Maria hati, “Maria Magadala o Kola” kuenda ‘upostolo wovapostolo,’ momo eye wa kala omunu watete wa nena kovapostolo olondaka viwa viatiamẽla kepinduko lia Yesu. (Yoano 20:18) Pole, eci ka co lingisile upostolo. Kuenje Embimbiliya ka li tukula Maria okuti, wa kala upostolo.—Luka 6:12-16.
Oku sonehiwa Kuembimbiliya kua malusuiwa ocipepi lunyamo 100 K.K. Noke lianyamo alua, olombiali vietavo via nõlapo oku kemãlisa Maria Magadala. Vovisonehua vimue vio kocita cavali leci catatu vina okuti ka vi sangiwa Vembimbiliya, ovapostolo vamue va Yesu vi tukuiwa okuti, via kuatele esepa la Maria Magadala. Ovolandu aco ka a-a kunamẽlele Vovisonehua.
Anga hẽ Maria Magadala wa kala ukãi wa Yesu Kristu?
Sio. Embimbiliya li popia okuti, Yesu wamamako okuti, ka kuelele.a