Nye Embimbiliya li Popia Catiamẽla Kolohuela?

Etambululo Liembimbiliya

Noke lioku lulika ulume watete kuenda ukãi watete, Suku wa tokekisa olohuela viavo. Eye wa sokiya olohuela oco vi kale omunga yimue yilikasi okuti, ulume lukãi, oco ovo va kuate epata.—Efetikilo 1:27, 28; 2:18.

Suku o yongola okuti, olohueli vi kuata esanju. (Olosapo 5:18) Pocakati Cembimbiliya, eye o lekisa ndomo olohuela vi sukila oku kala kuenda ecavo olonumbi vi kuatisa olohueli oku kuata esanju.

Vocipama cilo

Olohuela vi sukila oku kala ndati?

Tunde kefetikilo liulandu womanu, Suku wa sokiya olohuela oco vi kale omunga yimue yilikasi okuti, ulume lukãi. (Efetikilo 2:24) Suku ka tava oluvale, ovilinga viomanu vakuavimatamata vimuamue ndaño olohueli vi kasi ño kumosi okuti ka via tokekisile olohuela. (1 Va Tesalonike 4:3) Yesu wa longisa olondonge viaye oku pokola kolonumbi Suku a tumbika viatiamẽla kolohuela.—Marko 10:6-8.

Ku Suku, olohuela omunga yimue yi kala otembo ka yi pui. Eci ulume lukãi va kuela, ovo va likuminya oku li kolela omunu lukuavo, loku kala kumosi osimbu va kasi lomuenyo. Suku o lavoka okuti, ovo va tẽlisa ohuminyo eyi.—Marko 10:9.

Nye ci popiwa catiamẽla koku litepa loku linyãla?

Citava okuti ohueli yimue yi kala ocipãla lohueli yaye. Pamue umue pokati kavo, o sukila oku linga ungende oco a ka potolole ocitangi cimue conjanga cepata. Pole, Embimbiliya ka li popi okuti olohueli vi sukila oku litepa omo liovitangi volohuela. Olio li vetiya olohueli oku likolisilako oku vi potolola.—1 Va Korindo 7:10.

Ukahokolo, owo lika Embimbiliya li ecelela olohueli oku linyãla. (Mateo 19:9) Omo liaco, ndomo Embimbiliya li popia, nda olohueli vimue vi nõlapo oku litepa ale oku linyãla omo liesunga limue okuti hukahokoloko, lomue pokati kavo o kuete elianjo lioku namulãla, ale oku likuela lomunu ukuavo.—Mateo 5:32; 1 Va Korindo 7:11.

Anga hẽ olohueli vi sukila oku lisonehisa kombiali oco olohuela viavo vi taviwe la Suku?

Suku o lavoka okuti, Akristão va pokola kovihandeleko violombiali viatiamẽla kolohuela. (Tito 3:1) Nda kuli onjila yimue yoku tokekisa olohuela viavo ndomo ci likuata locihandeleko okuti, ovo va ci linga, vi lekisa esumbilo kolombiali kuenda ku Suku una o tenda olohuela ndohuminyo yi kala otembo yosi.a

Nye Embimbiliya li popia catiamẽla kocikele culume leci cukãi?

Ceci kavali kavo va sukila oku linga. Ulume lukãi waye va sukila oku li tata locisola kuenda lesumbilo. (Va Efeso 5:33) Ovo va sukila oku tẽlisa olonjongole viavo vioku lipekela omunu lukuavo locisola loku yuvula ekambo liekolelo. (1 Va Korindo 7:3; Va Heveru 13:4) Nda va kuete omãla, ocikele coku va tekula culume lukãi.—Olosapo 6:20.

Embimbiliya ka li lombolola ovina vialua viatiamẽla konjila ndomo olohueli vi nõla upange woku sanda eteku lovopange o vonjo. Olonjali vi sukila oku kũlĩhĩsila kumosi kuenda oku nõla eci ci kuatisa epata.
Ceci ulume a sukila oku linga. Embimbiliya li popia okuti, “ulume eye utue wukãi waye.” (Va Efeso 5:23) Ulume eye utue omo okuti, eye o kuete ocikele coku songuila epata, oku nõla olonjila vi kuatisa ukãi kuenda omãla vaye.

Eye o sukila oku kũlĩhĩsa okuti, epata li kuete ovina vi sukiliwa konepa yetimba, kekalo liwa liovutima kuenda kespiritu. (1 Timoteo 5:8) Ulume o lekisa okuti wa kapako ovituwa viwa viukãi waye lovina a tẽla oku linga, poku likuatisa kuenda poku kapako ovisimĩlo viaye osimbu ka nõlele onjila yimue. (Olosapo 31:11, 28) Embimbiliya li popia okuti, ulume o sukila oku tata ovikele viaye locisola.—Va Kolosai 3:19.
Ceci ukãi a sukila oku linga. Embimbiliya li popia okuti “ukãi o sukila oku lekisa esumbilo liocili kulume waye.” (Va Efeso 5:33) Suku o sanjuka calua eci a limbuka okuti, ukãi wa sumbila ocikele eye a eca kulume.

Ocikele cukãi, oku kuatisa ulume oku nõla olonjila viwa, loku u kuatisavo kocikele caye coku songola. (Efetikilo 2:18) Embimbiliya li pandiya ukãi o tẽlisa ciwa ocikele a kuete volohuela.—Olosapo 31:10.

Koloneke vilo, Suku o kisika hẽ okuti olohueli vi cita omãla?

Sio. Kosimbu Suku wa sapuila vamue afendeli vaye okuti va sukilile oku cita omãla. (Efetikilo 1:28; 9:1) Pole, ocihandeleko eci, ka ci kisikiwa Kakristão. Yesu lalimue eteke a handelekele olondonge viaye oku cita omãla. Akristão vatete, ka va popelevo okuti olohueli via sukilile oku cita omãla. Ohueli lohueli, oyo yi nõla nda yi cita omãla, ale sio.

Embimbiliya li kuatisa ndati olohuela viange?

Olonumbi Viembimbiliya vi pondola oku kuatisa olohueli oku fetika ciwa olohuela viavo, oku yuvula loku yula ovitangi.

Olonumbi Viembimbiliya vi kuatisa olohueli oku . . .

lekisa ocisola cocili.—1 Va Korindo 13:4-7; Va Kolosai 3:14.
liyaka letepiso li kasi pokati kavo.—1 Va Korindo 10:24.
kala vakuakuyevelela ciwa.—Tiago 1:19.
lekisa esumbilo.—Va Roma 12:10.
ecela.—1 Petulu 4:8.
kala vakuacili.—Marko 10:9.
kala vakuepandi.—Va Efeso 4:2, 3.
talavaya ndocimunga.—Ukundi 4:9.
pamisa ohuminyo yene.—Ocisungo ca Salomone 8:7.

a Oco o kũlĩhe ndomo Embimbiliya li tenda olohuela vi lingiwa lepata, ale viocikoti cepata, tanga Utala Wondavululi 1 ya Kuvala 2006 kem. 15 ocin. 12.

Ovinimbu Viembimbiliya viatiamẽla kolohuela

Olosapo 18:22: “Una o sanga ukãi umue uwa, wa sanga ocina cimue ciwa.”

Elomboloko liaco: Embimbiliya li popia lonjila ya sunguluka catiamẽla kolohuela.

Malakiya 2:15: “Ko ka sepuli akãi vene vombutulua.”

Elomboloko liaco: Suku o yongola okuti, ulume lukãi waye va li kolela loku li tata ciwa lesumbilo, ndaño va kuela ale osimbu.

Marko 10:9: “Eci ca tokekisa Suku, lomue ka ka ci tepe.”

Elomboloko liaco: Ocipango ca Suku ceci okuti, olohuela vi kala omunga yamamako yomanu vavali va li kuetele ocisola.

Va Heveru 13:4: “Olohuela vi sumbiwe pokati ka vosi.”

Elomboloko liaco: Olohueli vi sukila oku kapako calua olohuela viavo, loku likolisilako oku vi teyuila.

1 Va Korindo 7:28: ‘Vana va [laika] oku kuela va ka tala ohali ketimba.’

Elomboloko liaco: Ka kuli olohuela via lipua; olohueli vi sukila oku likolisilako oku tetulula ovitangi, oco vi yulile kumosi.