Ndi Pondola Oku Sapela Ndati Ciwa Lomanu?

Vocipama cilo

• Momo lie ci kuetele esilivilo oku sapela polo la polo?

• Ku fetikiwa ndati ombangulo yimue?

• Ceci amalẽhe vakuavo va popia

Momo lie ci kuetele esilivilo oku sapela polo la polo?

Omanu vamue va sima okuti oku sapela polo la polo ka calelukile kuenda ci nena esakalalo, kokuavo ca leluka vali oku sapela pocakati casapulo.

“Eci omanu va sapela polo la polo ci nena esakalalo momo kacitava oku sokolola ale imapo eci wa vangula.”—Anna

“Oku sapela pocakati casapulo ci kasi ndovideo yimue yangalavaliwa, pole eci ndi kasi oku sapela polo la polo ci kala ndu okuti ndi kasi kovaso yomanu valua va kasi oku ndi yevelela. Eci ndi kasi oku vangula ndi sokolola lika hati: ‘Ku ka vangule ovina ka via sungulukile!’”—Jean.

Pole, ku ka kala otembo yimue okuti ove o ka sukila oku sapela lomanu. Ndeci, oku vangula ci ka ku kuatisa oku linga akamba vokaliye, oku sanda upange umue loku amamako lupange waco. Kuenda eci o ka pitĩla vutunga woku namulala, ocituwa caco ci ka ku kuatisa calua.

Esapulo limue liwa lieli liokuti ku sukila oku kuata usumba woku sapela polo la polo. Ove o pondola oku lilongisa ndaño okuti wumunu umue ka vangula calua.

“Olonjanja vimue omanu vosi va siata o ku vangula ovina ka via sungulukile kuenje va kutisiwa osõi. Ku sukila oku lavoka oku lipua.”—Neal.

Ku fetikiwa ndati ombangulo yimue?

• Linga apulilo. Sokolola kocina cimue omanu va sole kuenda talavaya locina caco oco o fetike ombangulo yimue. Ndeci:

  “Anga hẽ keteke lia sulako liowusa wandele kocitumãlo cimue?”

  “Tala ño onumbi eyi! Anga hẽ wa iñililemo ale?”

  “Wa yevele ale okuti. . . ?”

  Ku sukila o ku fetika ombangulo yimue noke o pongolola ombangulo yaco lombangulo yikuavo. Sokolola kocina cimue o sole kuenda omunu waco a solevo. Ndeci, anga hẽ vu tangela kosikola yimuamue ale vu talavayi kupange umuamue? Seteka oku tiamisila apulilo kovina viaco.

  

  “Sokolola kapulilo ove nda wa tambulula kuenda pulisa ocisimĩlo comanu catiamẽla kondaka yaco.”—Maritza.

  Utate o sukila oku lekisa: Ku ka linge apulilo alua ndu okuti o kasi oku sombisa. Kuenda yuvula oku pulisa ovina vi kutisa osõi komunu waco, ndeci: “Usumba we ove o kuete?” ale “Momo lie wa siatela oku wala calua uwalo levala lionoloti?” epulilo eli lia vali li kasi okuti o kasi oku pisa.

  Oco o yuvule oku linga apulilo ndu okuti o kasi oku sombisa, ove o pondola oku situlula ocisimĩlo cove kefetikilo ale noke liomunu oku tambulula epulilo liove. Nda wa ci linga, ka ci ka molẽha ndesombiso, pole, ci ka kala ombangulo.

  

  Onumbi Yembimbiliya: “Ovisimĩlo viutima womunu vi kasi ndovava a longa, pole, omunu ukuelomboloko o a tapamo.”—Olosapo 20:5, Embimbiliya li Kola.

• Lilongisa oku yevelela lutate. Oco o kuate ombangulo yiwa, ci kuete esilivilo oku yevelela lutate ovina omunu o kasi oku vangula okuti ku vangula calua.

  “Olonjanja viosi ndi sapela lomunu umue, ndi seteka oku kũlĩha ocina cimue cokalie catiamẽla komunu waco. Noke ndi sokolola kovina eye a vangula oco ndi kuate epulilo limue lioku linga kombangulo yikuavo.”—Tamara

  Utate o sukila oku lekisa: ku ka sakalale lovina o ka vangula noke. Nda wa yevelela lutate omunu o kasi oku vangula laye, ove o kamamako lombangulo poku yi tiamisila kovina eye a vangula.

  Onumbi Yembimbiliya: “Omunu lomunu a kale ukuanjanga koku yevelela, a livale koku popia.”—Tiago 1:19.

• Lekisa okuti wa kapako ovina omunu a kasi oku vangula. Ombangulo yi ka enda ciwa nda okuti ove wa kapako omunu ukuavo.

  

  “Nda omunu ukuavo wa limbuka okuti wa kapako ovina eye a kasi oku vangula, ombangulo yi ka enda ciwa ndaño okuti olonjanja vimue ku kuata eci o vangula.”—Marie.

  Utate o sukila oku lekisa: Ku ka linge apulilo atiamẽla komuenyo womunu waco! Yuvula oku popia hati: “Nda sola ocikutu cove. Wa ci landa ciñami?”

  Onumbi Yembimbiliya: “Ko ka sokololi lika ovina viene muẽle, pole, sokololivo ovina via vakuene.”—Va Filipoi 2:4.

O pondola oku malusula ndati ombangulo? “Ukuenje umue o tukuiwa Jordan wa popia hati: Seteka oku malusula ombangulo lonjila yimue ya sunguluka.” “Nda wa popia hati: ‘Nda sola calua oku vangula love’ ale ‘Owusa uwa,’ ci ka leluka oku kuata ombangulo yiwa onjanja yikuavo vu ka lisanga.”