Helie o ka Yovola Ongongo?

Omanu valua va sakalala momo va tava okuti, omanu va kasi oku nyola oluali kuenda ovimuenyo vi kasimo. Ndomo ca lomboluiwa la vamue vakuoloño, ka kua la kala elinga lialua lĩvi liomanu lioku nyõla oviendalomuenyo via litepa kuenda oku kapa kohele ovimuenyo via lua okuti cilo ci sule.

Anga hẽ omanu va ka tẽla oku nyõla muẽle ongongo? Ale eteke limue omanu va ka tẽla oku kala lombembua?

Omanu va ka tẽla hẽ oku yovola ongongo?

Vakuoloño valua va tava okuti omanu va kuete epondolo lioku teyuila ongongo kuenda oku kalamo lombembua. Vamue vakuakukomuisa, va popia okuti oco ci tẽlisiwe, ci sukila oku linga apongoloko alua vepuluvi limuamue. Amue pokati ka pongoloka aco a-a:

• Oku mioñolola ndomo ku talavayiwa lolosi, lasisi, lovisave, kuenda lokalunga.

• Oku kuama olonjila via litepa vioku lima kuenda olono vi kuavo viocinyi.

• Oku pongolola onjila ndomo ku pangiwa ovikulia loku kuava, oco ku yuvuiwe epese, kuenda oku vetiya omanu okulia vali ovikũla lonjongo yitito yositu lombisi

• Oku limbuka okuti oku kuata ekalo liwa komuenyo ka kua tambele ko ku kuata ovipako vialua

Nye o sima? Ca sunguluka hẽ oku tava okuti, olombiali, olonjo vilomilu kuenda omanu va ka li kuata omunga kovina evi? Ale o sima okuti ka ci tẽliwa omo omanu vamue va kuacipululu, vakuepela kuenda ka va kapeleko ovina viokovaso yoloneke?—2 Timoteo 3:1-5.

Kuli Elavoko

Embimbiliya li tu likuminya okuti ka tu sukila oku kuata usumba wokuti ongongo yi ka nyõliwa. Olio li lombolola esunga lieci alikolisilo omanu ka ha sokelepo oco va yovole ongongo kuenda li lekisavo epongoloko liocili li sukula oku lingiwa. Handi vali li lombolola ndomo epongoloko liaco li ka pita.

Esunga lieci alikolisilo omanu ka ha sokelepo. YehovaaSuku wa lulika ongongo kuenda wa eca komano ocikele coku yitata. (Efetikilo 1:28; 2:15) Oco va ci linge, ovo va sukilile oku sanda olonumbi Viululiki wavo loku pokola kolonumbi viaye. (Olosapo 20:24) Pole, ovo va likala Yehova kuenda va nõlapo oku li songuila ovo muẽle. (Ukundi 7:29) Omanu ka va kuete epondolo lioku tata ongongo okuti ka va sukila ekuatiso lia Suku, eli olio esunga liokuti ndaño va likolisilako ka va kuata onima yiwa.—Olosapo 21:30; Yeremiya 10:23.

Epongoloko li Sukiliwa oku lingiwa. Suku o ka tateka omanu oku nyõla ongongo. (Esituluilo 11:18) Pole, eye o ka linga ovina vialua okuti oku linga lika apongoloko kolombiali kuenda komanu va kasi oku nyõla oluali ci sule; eye o ka va piñanya. (Esituluilo 21:1) Olio esunga lieci eye a popela Vembimbiya hati: “Tala! Ovina viosi ndi vi lingisa viokaliye.”

Ndomo epongoloko liaco li ka pita. Yehova o ka piñanya olombiali viosi viomanu luviali wokilu, u tukuiwa okuti Usoma wa Suku. Usoma waco u songuiwa la Yesu Kristu, u ka viala ongongo yosi. —Daniele 2:44; Mateo 6:10.

Usoma wa Suku u ka longisa omanu oku kala ndomo ci likuata lolonumbi via Suku, vina okuti olonjanja viosi via sunguluka. Eci omanu va ka limbuka Suku ndululiki wavo loku kuama olonumbi viaye, ovo vaka tẽla oku kala ndomo ci likuata lekalo lioluali. (Isaya 11:9) Embimbiliya li lekisa okuti usoma wa Suku u ka lingisa okuti vosi va pondola oku kuata omuenyo uwa, okuti ka va nyõla ongongo. Uviali waco uka linga ovina vikuãimo ndeci:

• U ka eca okulia kuvosi.—Olosamo 72:16.

• U ka tumbulula ovokuasi ongongo.—Isaya 35:1, 2, 6, 7.

• U ka vetiya omanu oku tata ciwa ovinyama kuenda oku vetiya ovinyama oku yuvula oku u ndumuhĩla omanu.—Isaya 11:6-8; Hosea 2:18.

• U ka tateka okuti ku pita ovilunga vi nyõla ongongo.—Marko 4:37-41.

Kua kambaño kamue oco Usoma wa Suku u ka linge apongoloko aco. Oco o kũlĩhe esunga lieci o ponduila oku ci kolela tanga ocipama “Otembo Yipi Usoma wa Suku u ka Viala Ongongo?”