O Russia yi Linga Uyaki lo Ukrania

Kalivala atete komele keteke 24 ya Kayovo wo 2022, o Russia ya fetika uyaki lo Ukrania ndaño okuti olombiali voluali luosi, via li kolisilako oku tateka uyaki waco. Uyaki waco wa nena ndati ovitangi voluali? Usonehi watete wo lo Nações Unidas, António Guterres, wa popia okuti: “Uyaki waco wa nena ohali komanu, loku nyõla onepa yimue yo Europa okuti ka ci ka leluka oku yi semulula.”

Ovolandu a-a ndomo a tukuiwa Vembimbiliya a lomboloka nye?

• Poku popia catiamẽla koloneke via sulako Yesu hati: “Momo ofeka yi ka katukila ofeka kuenda usoma u katukila usoma.” (Mateo 24:7) Tanga ocipama losapi hati, Nye Ceca Uvangi Wokuti tu Kasi “Koloneke Via Sulako,” Ale “Kotembo ya Sulako”? oco o limbuke ndomo Embimbiliya li lekisa okuti ovoyaki a kasi oku tẽlisa ovina Yesu a popia.

• Elivulu Liesituluilo li tukula uyaki ndukuakuendela kokavalu ka kuete “evala liondalu” okuti “imũla ombembua kilu lieve.” (Esituluilo 6:4) Tanga ocipama losapi hati, “Olokavalu Vikuãla Via Tukuiwa Kelivulu Liesituluilo—Vi Lomboloka Nye?” Oco o limbuke ndomo ovitumasuku viaco vi kapiwako kovoyaki vokoloneke vilo.

• Elivulu lia Daniele li lombolola okuti pokati kosoma yo “kombuelo losoma yo konano” pa laikele oku kala ukuse. (Daniele 11:25-45) Tala ovideo losapi hati, Ocitumasuku ca Tẽlisiwa—Daniele Ocipama 11 oco o limbuke esunga lieci o Russia lava va likongela kokuayo, ya situluiwa ndosoma yo Konano.a

• Elivulu Liesituluilo li sitululavo “uyaki okuti, u ka pita keteke linene lia Suku Ukuonene Wosi.” (Esituluilo 16:14, 16) Pole, uyaki waco ka u lingiwa pokati kolofeka, ndomo u kasi oku lingiwa koloneke vilo. Tanga ocipama losapi hati: “Uyaki wo Harmagedo u Lomboloka Nye?” oco o sange olonumbi vikuavo viatiamẽla kovina vi ka pita kovaso yoloneke.

Momo lie o sukilila oku kuata elavoko lio kovaso yoloneke?

• Embimbiliya li popia okuti Suku o ka “nena esulilo liovoyaki kilu lieve liosi.” (Olosamo 46:9) Tanga ocipama losapi hati: “O Pondola Oku Kolela Kekalo Liwa Lio Kovaso Yoloneke” oco o lilongise vali ovina Suku a likuminya vio kovaso yoloneke.

• Yesu wa longisa olondonge viaye oku likutilila oco Usoma wa Suku wiye. (Mateo 6:9, 10) Usoma waco uviali wokilu u ka tẽlisa ocipango ca Suku palo posi. Pokati kovina vialua, usoma waco u ka nena ombembua voluali luosi. Oco o lilongise vali ovina usoma waco u ka ku lingila, tala ovideo losapi hati: Usoma wa Suku u Lomboloka Nye?

Ko Ukrania kuli eci ci soka 129.000 Kolombangi Via Yehova. Ndeci Olombangi Via Yehova vio kolofeka vikuavo, ovio vi setukula Yesu poku amamako oku yuvula oku panga onepa kopulitika kuenda kovoyaki. (Yoano 18:36) Olombangi Via Yehova voluali luosi vi kasi oku amamako oku “kunda olondaka viwa Viusoma” loku sandeka okuti Usoma wa Suku owo lika u ka malako ovitangi viomanu oku kongelamo ovoyaki. (Mateo 24:14) Tu ku laleka oku sandiliya Olombangi Via Yehova oco o lilongise vali catiamẽla kesapulo lielavoko li sangiwa Vembimbiliya.