Olonoño vi Kasi Oku Yayuisa Otembo Yoloneke Via Sulako—Nye Embimbiliya li Popia?

Keteke 24 ya Susu 2023, olonoño via yayuisa otembo Yololosio Yoloneke Via Sulakoa, ci lomboloka okuti esulilo lioluali.

• “Ololosio Yoloneke Via Sulako, yi tiamisiwila kovitangi omanu va kasi oku liyaka lavio poku liponda ovo muẽle. Vovali, olonoño via yayuisa oku livokiya kuotembo yaco okuti, kosimbu ci sule omo liovitangi viuyaki ko Ukrania, usumba watenda kuenda oku nyõliwa kuongongo.”—AFP International Text Wire.

• “Vovali, olonoño via sutulula okuti “Ololosio Yoloneke Via Sulako,” va yi yayuisa eci ci soka 90 kolosengundu osimbu oñolosi yeteke liaco ka ya pitĩlile oco omanu va li ponde ovo muẽle elisi.”—ABC News.

• “Ocimunga cimue colonoño voluali luosi, ca siata oku eca elungulo liokuti, ekalo liomanu valua li kasi kohele okuti kosimbu ci sule.”—The Guardian

Anga hẽ esulilo liomuenyo womanu kuenda liongongo li kasi muẽle ocipepi? Tu sukila hẽ oku kuatela usumba ovina vi kapita kovayo yoloneke? Nye Embimbiliya li popia?

Ceci ci ka pita kovaso yoloneke

Ndomo Embimbiliya li popia, “ongongo yamamako otembo ka yi pui” kuenda omanu “va ka kalamo otembo ka yi pui.” (Ukundi 1:4; Olosamo 37:29) Omo liaco, omanu ka va ka kundula ongongo ale oku ecelela okuti lacimue ci kalamo.

Ocili okuti, Embimbiliya li tukula esulilo limue. Ndeci, olio li popia okuti “oluali lu kasi oku pita.”—1 Yoano 2:17.

• Oco o limbuke eci Embimbiliya li popia poku tukula ovina vi ka pita kovaso yoloneke, tanga ocipama losapi “Anga hẽ Esulilo Lioluali li Kasi Ocipepi? Nye ci Lomboloka Esituluilo?”

• Oco o lilongise eci Embimbiliya li popia catiamẽla kovolandu a ka tẽlisiwa ndopo, tanga ocipama losapi “Eteke Lipi Esulilo Lioluali Liya?”

Oku amamako locituwa ca sunguluka

Embimbiliya li tu kuatisa oku amamako oku kuata ocituwa ca sunguluka ndaño lovitangi violuali lulo. Ndamupi?

• Embimbiliya lieca elungulo limue liwa. (2 Timoteo 3:16, 17) Ndeci, tanga ocipama losapi “Como Controlar As Preocupações” oco o limbuke ndomo Embimbiliya li pondola oku tu kuatisa oku amamako locituwa ca sunguluka ndaño lovitangi violuali lulo.

• Embimbiliya lieca elavoko liwa lia koleliwa lio kovaso yoloneke. (Va Roma 15:4) Olio li lekisa eci tu kasi oku lavoka cilo kuenda kovaso yoloneke okuti, ci tu kuatisa oku amamako oku pandikisa kovitangi violualu lulo.

Oco o kuatisiwe Lembimbiliya, tu ku laleka oku seteka oku lilongisa ocali Embimbiliya.