O Harmagedo yi ka Fetikila hẽ ko Isareli?—Nye Embimbiliya li Popia?

Embimbiliya ka li lombolola okuti o Harmagedo uyaki umue u lingiwa pocitumãlo cimue lika, pole uyaki umue u ka pita voluali luosi okuti, mu ka kongela Suku kuenda olombiali viosi violuali.

• “Asapulo aco a tunda kolondele kuenje olosoma vio kilu lieve liosi vi . . . ongoluiwila uyaki okuti, u ka pita keteke linene lia Suku Ukuonene Wosi. . . . Asapulo a vĩha ongoluila olosoma pamosi pocitumãlo okuti kelimi lio Heveru, ci tukuiwa Harmagedo.”—Esituluilo 16:14, 16.

Ondaka “Harmagedo,” yo piwa kelimi lio Heveru Har Meghid·dóhn, yi lomboloka o “Munda yo Megido.” O Megido, ya kala olupale lumue luo ko Isareli yosimbu. Eli olio esunga lieci omanu valua va simĩla okuti o Harmagedo yi ka fetikila ko Isareli. Pole, ci kaile ocikanjo co Megido ale ocikanjo cikuavo co kutundilo, lacimue pokati kavio ci kuete ocitumãlo cimue cinene oco “olosoma viosi vio kilu lieve” kuenda asualali avo, vi liongoluilepo.

Elivulu Liesituluilo lia sonehiwa vupopi “wocindekaise.” (Esituluilo1:1) O Harmagedo hacitumãlo cimueko, pole ekalo limue okuti, olosoma vi ka liongolola oco vi linge uyaki wavo wa sulako lusoma wa Suku.—Esituluilo 19:11-16, 19-21.