Momo Lie Omanu ka va Tẽlela Oku Nena Ombembua?—Nye Embimbiliya li Popia?

Olombiali violuali kuenda ovisoko via kũlĩhĩwa koluali luosi, ka vi tẽla oku nena ombembua. Koloneke vilo, ovoyaki alua calua okuti ovoyaki a pitako osimbu Uyaki II wa pita Voluali Luosi ka weyila, a sule. Ci soka olohuluwa vivali viomanu, va sangiwa kovitumãlo viaco ku kasi oku pita ovoyaki.

Momo lie omanu ka va tẽlela oku nena ombembua? Nye Embimbiliya li popia?

Asunga atatu lieci omanu ka va tẽlela oku nena ombembua

1. 1. Omo okuti omanu va siata oku lekisa ovituwa ka via sungulukile, ci tĩla calua oku kuata ombembua. Embimbiliya lia popele ale okuti koloneke vietu omanu va ka lisola lika ovo muẽle, vakuakusola olombongo, vakuakulipanda, vakuakulivelisapo, . . . havakuaciliko . . . , ka va ka kuata ocisola la vangandiavo, vakuamanya, . . . vakualundi, ka va ka tẽla oku likandangiya, . . . olongangala, ka va ka sola eci ciwa, olomakuli, vakualonamãlãla, vakuepela.”—2 Timoteo 3:2-4.

2. 2. Omanu ka va kuete epondolo lioku tetulula ovitangi viavo te lika lekuatiso Liululiki wavo Yehovaa Suku. Embimbiliya li popia okuti “omunu enda, ka ca tiamẽle kokuaye ndaño muẽle oku songuila oku enda kuaye.”—Yeremiya 10:23.

3. 3. Olualu lua vialiwa lombiali yimue yi kuete unene haeyo ongangala okuti Satana Eliapu, “una o kasi oku yapuisa ilu lieve liosi.” (Esituluilo 12:9) Osimbu “oluali luosi lu kasi povaka ondingaĩvi,” ku ka kala ovoyaki kuenda oku lisanumula.—1 Yoano 5:19.

Helie o ka nena ombembua?

Embimbiliya li likuminya okuti eteke limue tu ka kuata ombembua. Pole, omunu ka tẽla oku nena ombembua yaco, te lika Suku.

Suku o ka tẽlisa ndati ohuminyo yaco? “Suku una eca eca ombembua ndopo o ka sasõla Satana.” (Va Roma 16:20) Suku o ka talavaya luviali waye wokilu, una Embimbiliya li tukula okuti “Usoma wa Suku,” oco a nene ombembua voluali luosi. (Luka 4:43) Eci Yesu Kristu o Soma Yusoma waco a ka viala, omanu va ka lilongisa ndomo va ka kala lombembua.—Isaya 9:6, 7.