Kilu kepĩli: Marek M. Berezowski/Anadolu Agency via Getty Images; bottom left: Halfpoint Images/Moment via Getty Images; center: Zhai Yujia/China News Service/VCG via Getty Images; kilu kondio: Ismail Sen/Anadolu Agency via Getty Images; pevindi kondio: E+/taseffski/via Getty Images
AMAMAKO OKU LAVULULA!
Unyamo 2023: Unyamo Umue Wasakalalo—Nye Embimbiliya li Popia?
Vokuenda kunyamo wo 2023, voluali mua pita ovina vialua vi lekisa okuti, tu kasi kotembo Embimbiliya li tukula okuti “oloneke via sulako.” (2 Timoteo 3:1) Limbuka okuti ovina vi kasi oku pita kolonepa viosi vi likuata levi Embimbiliya lia tukuile via laikele oku pita kotembo yetu.
Embimbiliya kuenda ovolandu a kasi oku pita voluali
‘Ovoyaki kuenda asapulo ovoyaki.’—Mateo 24:6.
“Ungangala wa livokiya calua kolonepa vialua violuali.”a
Tanga ovipama losapi “Helie o ka Popela Omanu Vana Okuti Hasualaliko?” kuenda “Olombongo vi Pesiwa Kasualali Voluali Luosi vi Pitahãla Eci ci Soka Olohuluwa Violohuluwa.”
“Ovilemawe kocitumãlo locitumãlo.”—Marko 13:8.
“Tunde kefetikilo liunyamo wo 2023, kua pita eci ci soka 13 kovilemawe vinene voluali luosi.”b
Tanga ocipama losapi “Ovilemawe vi Nyõla o Turkiya Kuenda o Suria.”
“Ovina vi yokokisa.”—Luka 21:11.
“Owuya u kasi oku livokiya voluali luosi.”—António Guterres, usonehi wavelapo wo UN.c
Tanga ocipama losapi “Owuya Walua Voluali Luosi Kunyamo wo 2023.”
“Ku ka kala onjala.”—Mateo 24:7.
“Unyamo wo 2023: Wa kala unyamo wasakalalo alua ku vana va kuete ocitangi coku sanga okulia oco va tekule apata avo.”d
Tanga ocipama losapi “Ovoyaki Kuenda Apongoloko Otembo a Kasi Oku Vokiya Ekambo Liokulia.”
“Ekalo li ka tĩla calua.”—2 Timoteo 3:1.
“Voluali luosi, pokati komanu ecelãla, omunu umosi, kuete uvei wovoño.”e
Tanga ocipama losapi “Ocitangi Cuvei wo Vowoño Kamalẽhe ci Kasi Oku Livokiya.”
Nye tu lavoka kunyamo wo 2024?
Ka tua kũlĩhĩle eci ci ka pita kunyamo wo 2024. Pole, ovolandu a kasi oku pita voluali a lekisa okuti, ndopo muẽle Usoma wa Suku ale uviali wokilu, u ka piñainya ovoviali omanu loku malako ovitangi viosi kuenda asakalalo.—Daniele 2:44; Esituluilo 21:4.
Osimbu tu kevelela ovina viaco, ndaño lasakalalo tu koleli kekuatiso lia Suku. Embimbiliya li popia okuti:
“Eci ñala lusumba, ndi kolela kokuove.”—Osamo 56:3.
Tu lekisa ndati ekolelo lietu ku Suku? Tu ku laleka oco o lilongise ovina vikuavo viatiamẽla kohuminyo Yembimbiliya yo kovaso yoloneke yokuti, ka ku ka kala vali ohali. Seteka esokiyo lietu lioku lilongisa Embimbiliya ocali oco o limbuke ndomo ove kumue lepata liove vu pondola oku kuatisiwa lolohuminyo Viembimbiliya.
a Relações Exteriores, “Oluali Lumue lu Kasi Vuyaki: Nye ci Kasi Oku Koka Ovitangi Viaco Viungangala Voluali?” wa lomboluiwa la Emma Beals kuenda Peter Salisbury, 30 ya Mbalavipembe, 2023.
b Asapulo a Tiamẽla Kovilemawe, “Unyamo wo 2023: Kua Pita Etendelo Lialua Liovilemawe,” Kupemba, 2023.
c Nações Unidas, “Olondaka Viohundo Viusongui wa Velapo Viatiamẽla Kekalo Liotembo.” 27 Yevambi Linene, 2023.
d Esokiyo Liokulia Voluali, “Ekambo Liokulia Voluali Luosi.”
e Ocisoko Cuhayele Voluali, “Eteke Liuhayele Wovisimĩlo Voluali Luosi 2023,” 10 ya Mbalavipembe, 2023.