Thomas Jackson/Stone via Getty Images
AMAMAKO OKU LAVULULA!
Sanga Elavoko Kunyamo 2024—Nye Embimbiliya li Popia?
Valua va sima okuti ka kuli onjila yoku potolola ovitangi vi keya voluali kunyamo wo 2024. Pole, tu pondola oku sanga elavoko kovaso yoloneke. Pi tu li sanga?
Elavoko Embimbiliya li eca
Vembimbiliya muli ohuminyo yokuti, Suku o ka malako ovitangi vi kasi oku pita koloneke vilo vi kasi ndu okuti ka kuli elavoko. Ndopo muẽle, Suku “o ka puenya asuẽlẽla osi vovaso [etu], oku fa ka ku ka kalako vali, ndaño oku lila loku liyula levalo ka vi ka kalako vali. Ovina viatete via pita.”—Esituluilo 21:4.
Oco o lilongise ovina viatiamẽla kolohuminyo Viembimbiliya vio kovaso yoloneke, tanga ocipama losapi “O Pondola Oku Kolela Kekalo Liwa Lio Kovaso Yoloneke.”
Ndomo Embimbiliya li pondola oku ku kuatisa cilo
Embimbiliya li eca elavoko lio kovaso yoloneke li pondola oku ku kuatisa oku yuvula ovisimĩlo ka via sungulukile kuenda oku kuata ovisimĩlo via sunguluka. (Va Roma 15:13) Alungulo a sangiwa Vembimbiliya, a pondolavo oku ku kuatisa oku yula ovitangi o kasi oku liyaka lavio cilo, ndeci uhukũi, ekambo liesunga kuenda uvei.
Limbuka ndomo elavoko Liembimbiliya lia kuatisa ulume umue oku sanga ombembua kuenda esanju ndaño luhukũi. Tala ovideo losapi Juan Pablo Zermeño: Yehova wa Nyĩha Omuenyo Umue Ukuete Esilivilo.
Limbuka ndomo Embimbiliya li pondola oku ku kuatisa oku liyaka lovisimĩlo vioku livetela evelo, esumuo, esakalalo kuenda eci umue ngandiove a fa. Tanga ocipama losapi “Anga hẽ Ndi Pondola Oku Sanga Olondaka Vielembeleko Vembimbiliya?”
Limbuka ndomo ukãi umue wa kala esualali a litukula eye muẽle okuti, “omunu umue wa sumua haeye ka kuatele esilivilo,” a sanga elavoko lekuatiso Liembimbiliya. Tala ovideo losapi Deixei as Armas Para Trás.
Likolisilako okuti unyamo 2024, u kala unyamo umue uwa kokuove kuenda kepata liove. Lilongisa ovina vikuavo vi lekisa ndomo Embimbiliya li pondola oku ku kuatisa. Seteke esokiyo lietu lioku lilongisa Embimbiliya ocali. Limbuka ndomo Suku a pondola oku ĩha “ovisimĩlo viombembua” cilo, oku kongelamo “ekalo liwa kuenda elavoko limue.”—Yeremiya 29:11.