Nye Ndi Sukila Oku Linga Nda Ndi Sole Calua Oku Tala Omanu va Kasi Epolõla Havo va Linga Ukahonga?

Ceci o sukila oku linga

Kũlĩha eci ci lomboloka omanu va kasi epolõla haivo va linga ukahonga. Oku tala omanu va kasi epolõla haivo va linga ukahonga, ocina cimue ka ci lekisa esumbilo kueci Suku a lulika oco ci sumbiwe. Oku tenda omanu va kasi epolõla haivo va linga ukahonga lonjila yaco, ci ku kuatisa oku “suvuka evĩho.”—Osamo 97:10.

Sokolola ovitangi vi yililako. Oku tala omanu va kasi epolõla haivo va linga ukahonga ka lekisa esumbilo komanu va kasi oku ci linga. Ka ci lekisavo esumbilo komunu o tala ovina viaco. Eli olio esunga Embimbiliya li popia hati: “Omunu wa lunguka o mõla ũvi kuenje o lisalamisa; omunu wa kamba olondunge enda ño kuenje o yambuka.”—Olosapo 22:3.

Linga ohuminyo yimue. Yovi wa popia hati: “Nda lisila lovaso ange, oco mbanja ndati ufeko?” (Yovi 31:1) Kũlĩhĩsa ‘olohuminyo vimue’ ove o pondola oku linga:

• Si iñila vovipama vio Internet osimbu ñasi lika liange.

• Ndi yika lonjanga ovipama viosi vi lekisa ukahonga.

• Nda nda tala ovina ka via sungulukile ndi sapela lekamba limue lia koleliwa

Tukula ocitangi caco vohutililo. Ukualosamo wa pinga ku Yehova hati: “Tiula ovaso ange, ka a ka talukile evi viesanda.” (Osamo 119:37) Suku o yongola okuti o kala ciwa, kuenje nda wa likutilila kokuaye, o ka kuata ongunsu yoku linga ovina via sunguluka!—Va Filipoi 4:13.

Sapela lomunu umue catiamẽla kocitangi caco. Oku nõla omunu umue oco o sapele laye, ci kuatisa oku liwekapo oku linga ovina ka via sungulukile.—Olosapo 17:17.

Ivaluka okuti: Olonjanja viosi o yuvula oku tala omanu va kasi epolõla havo va linga ukahonga, ci lekisa okuti wa yula uyaki umue. Likutilila ku Yehova catiamẽla koku yula kuaco kuenda eca olopandu kokuaye omo wa ku ĩha ongunsu yoku ci linga. Poku yuvula oku tala omanu va kasi epolõla havo va linga ukahonga, o sanjuisa utima waye.—Olosapo 27:11.