Momo Lie Olonjali Viange ka vi Yonguila Okuti Ñuata Elianjo Lialua?

Akamba vove va ku lalela oco wendi kocipito cimue kesulilo liosemana. Ove o pula kolonjali viove nda citava oku enda, pole, velivala liaco ovio vi tambulula hati, “Sio.” Eci ka ci ku komõhisa. Momo anjanja ya pita wa pinga kokuavo, via eca ale etambululo limuamue.

Vocipama eci

• Momo lie olonjali viange olonjanja viosi vi popela hati sio?

• Nye ndi linga oco olonjali viange vi popie hati oco?

• Ceci amalẽhe vakuavo va popia

Momo lie olonjali viange olonjanja viosi vi popela hati sio?

Nda olonjali viove olonjanja viosi vi ku sapuila hati sio, pamue o sima okuti, olonjali viove ka vi yongola okuti o kuata elianjo lialua.

Umalẽhe umue o tukuiwa Marie, wa kuatavo ovisimĩlo viaco eci volandela otelefone yaye yatete. Eye hati: “Isiange wa kapa olongave vialua viatiamẽla kovina nda yonguile oku tapa, omanu ndi sapela lavo kuenda alivala nda ponduile oku sapela lomanu vaco. Pole, akamba vange va enda oku linga ovina viosi va yonguile!”

Sokolola: Anga hẽ isia ya Marie wa yonguile lika oku u tateka oku kuata elianjo lialua? Ale wa kuata esunga lioku lekisa esakalalo liaco?

Seteka ndoco: Sokolola ndu okuti ove vu isia kuenda o kuete omõla umue umalẽhe okuti wolandela otelefone yimue. Asakalalo api ove nda wa kuata? Olongave vipi ove nda wa tumbika omo liasakalalo aco? Nye nda sapuila komõlove nda eye o ku sapuila okuti, ove ku yongola okuti eye o kuata elianjo lialua?

“Isiange olonjanja viosi wa enda oku popia hati: ‘Li kapa pomangu yange.’ Eci nda enda oku ci linga, nda enda oku limbuka okuti ci kuete esilivilo oku tumbika olongave kuenda esunga lieci via tumbikiwila. Nda ame nda kuatele omãla, ndi sima okuti nda yonguilevo okuti va linga ovina vimuamue ndevi isiange a yongola okuti ovio ndi linga.”—Tanya.

Nye ndi linga oco olonjali viange vi popie hati oco?

Ku ka linge ovina vi kuãimo: Oku itika pupolo, oku lisiõsiõla ale oku hoya.

“Oku hoya ka ciwako momo ci ku kokela lika ekavo kuenda ci kokelavo ekavo olonjali viove. Nda ove o fetika oku hoya, olonjali viove vi ka sima okuti ove handi kua kolele kuenda ku sesamẽla elianjo.”—Richard.

“Ocili okuti, olonjanja viosi kuli esunga lioku tumbika ocihandeleko cimue. Olonjali viange ka vi kasi oku seteka oku ndi tateka oku kuata elianjo. Pole, ovio vi yongola okuti ndi linga olomapalo lonjila yimue okuti, ka yi ñokela ovitangi.”—Ivy.

Onumbi Yembimbiliya: “Eveke li lekisa onyeño yaye yosi, pole, ukualondunge amamako oku likandangiya.”—Olosapo 29:11.

Ku ka linge ovina vi kuãimo: Oku lingila ovina vuyombi okuti olonjali viove ka via ci kũlĩhĩle.

“Ame nda enda oku seteka oku lueya ovihandeleko isiange a tumbikile, vi lekisa ndomo ndi talavaya lotelefone. Nda seteka oku sanda olonjila vioku tumisa asapulo kakamba vange vokati kuteke loku tapa ovipama isiange a ndi handelekele okuti, ka citava oku vi tapa. Pole, eye wa enda oku ci limbuka kuenda wa enda oku tõlisa vali ovihandeleko viaco, momo eye ka ndi kolelele vali. Oku seteka oku linga eci ove wa panga, hacisimĩlo ciwako.—Marie.

“Kuata epandi. Citava okuti pa pita otembo yalua toke eci olonjali viove vi pongolola ocihandeleko cimue. Pole, nda ovio via limbuka okuti ove o kasi oku pokola kovihandeleko viokaliye ovio via tumbika, ovio vi pondola oku eca elianjo kokuove.”—Melinda.

Onumbi Yembimbiliya: “Pokoli kolonjali viene kovina viosi.”—Va Kolosai 3:20.

Ku ka linge ovina vi kuãimo: Oku lipilika, ale oku popia eci olonjali viomãla vakuavo via siata oku ecelela okuti oco omãla va linga.

“Oku lipilika loku sakalaisa olonjali viove, ci koka lika ovitangi kuenda ka ci ku kuatisa oku kuata ovina o yongola.”—Natalie.

“Olonjali vi yongola oku limbuka nda ove o tẽla oku nõla olonjila via sunguluka. Omo liaco, eci ndi yongola oku vangula lolonjali viange, ndi vangula lonjila ya sunguluka okuti si yapuisiwa lovisimĩlo viange. Poku ci linga ca siata oku ndi kuatisa calua.”—Joseph.

Onumbi Yembimbiliya: “Sumbila isiove la ina yove.”—Va Efeso 6:2.