Akristão va Pondola hẽ Oku Sanda Ekuatiso Liolondotolo?

Etambululo Liembimbiliya

Oco, citava. Yesu wa lekisa okuti olondonge viaye vi pondola oku sanda ekuatiso liolondotolo poku popia hati: “Omanu va kuete uhayele ka va sukila ondotolo, te vana va vela.” (Mateo 9:12) Ndaño okuti Embimbiliya elivuluko liolonumbi vioku sakuiwa, pole, mu sangiwa olonumbi vi songuila omanu vana va yongola oku sanjuisa Suku.

Lipula ove muẽle

1. Ndi kuete hẽ elomboloko lieci ca kongela voku sakuiwa? Embimbiliya li tu lungula okuti tu sukila oku sandiliya olonumbi via koleliwa okuti ka tu “tava ño viosi.”—Olosapo 14:15.

2. Ndi sukila hẽ oku sandiliya olonumbi vikuavo vioku sakuiwa osimbu sia nõlele onjila ndi kuama? Ci kuete esilivilo oku kuata ‘olondunguli via lua’ capiãla enene nda ocitangi cove cuhayele ca tatama calua.—Olosapo 15:22.

3. Anga hẽ voku sakuiwa mua kongela oku sinila ocihandeleko Cembimbiliya coku ‘likandangiya kosonde?’—Ovilinga 15:20.

4. Voku sakuiwa ale voku kũlĩhĩsa uvei u kasi vetimba, olonjanja vimue mua siata hẽ oku kongela umbanda? Embimbiliya li pisa ‘ovilinga viumbanda.’ (Va Galatia 5:19-21) Oco o kũlĩhe eci ca kongela vumbanda kũlĩhĩsa apulilo a-a:

• Omunu o sakula o talavaya lovina vimue viumbanda?

• Oku sakuiwa kuaco ku tiamisiwila hẽ koku tava okuti ovovei a siata oku kokiwa lolosuku via temisiwa ale lovanyali va ka sandiliyile ovimbanda?

• Kua siata hẽ oku eciwa ovilumba, oku linga olohutililo, oviholo vikuavo kuenda ovina viumbanda poku pongiya ale poku talavaya lovihemba?

5. Anga hẽ ame ndi kasi oku sakalala calua luhayele wange? Embimbiliya li eca elungulo poku popia hati: “Esunguluko liene li limbukiwe lomanu vosi.” (Va Filipoi 4:5) Oku kala omunu umue wa sunguluka ci ku kuatisa oku tiamisila utima ‘kovina via velapo’, ndeci otembo o pesila kupange wa Yehova.—Va Filipoi 1:10; Mateo 5:3.