Anga hẽ Nda Sakalala Calua Leposo Liange?

Oseteko: Nda Sakalala Calua?

1. Pokati katosi akuãimo li pi li situlula ciwa ocisimĩlo cove?

   • Lalimue eteke nda sanjukilile eposo liange.

   • Olonjanja vimue ndi sanjukila eposo liange.

   • Olonjanja viosi ndi sanjukila eposo liange.

2. Nye o yongola oku pongolola ketimba liove?

   • Utunga

   • Olokilo

   • Etimba

   • Esinga

   • Ekova

   • Olonumba

   • Ovina vikuavo

3. Soneha ondaka ya kamba vocisimĩlo ci kuãimo

   Ndi liyeva okuti sia kolelepo eci mbanja ketimba liange . . .

   • eci ndi londa kombalansa.

   • eci ndi li litala volumũilo.

   • eci ndi lisokisa lavakuetu (akamba, vakuakulekisa ovowalo kuenda vana va molẽha volofilme)

4. Soneha ondaka ya kamba vocisimĩlo ci kuãimo

   Ame ndi lema eci ci soka . . .

   • eteke liosi.

   • osemana yosi.

   • hasemana yosiko.

5. Ondaka yipi yi situlula ciwa ovisimĩlo viove?

   • Ocisimĩlo ka ca sungulukile catiamẽla ketimba liange. (ndeci: “Olonjanja viosi eci ndi litala volumũilo ndi sima okuti nda lẽla calua kuenda etimba liange livĩ calua. Nda li wekapo okulia oco ndi tepulule olokilo viange.”—Serena.

   • Konomuisa eposo lietimba. (Ndeci: “Otembo yosi ku ka kala ovina o ka sukila oku pongolola keposo liove, pole olonjanja vimue ka ci ka tava oku ci linga. Uveke oku sakalala locina cimue okuti ku kuete epondolo lioku ci pongolola.”—Natanya.)

Embimbiliya li popia okuti “ko ka simi okuti wa velipo.” (Va Roma 12:3) Ocili okuti ca sunguluka oku lisakalaisa leposo lietu muẽle, momo olonjanja vimue ci sukiliwa. Eli olio esunga wa siatela oku sukuila ovayo ove kuenda oku liyelisa ketimba olonjanja viosi.

Pole nye ci popiwa nda olonjanja viosi o sumua omo lieposo liove, okuti cu ku sakalaisa calua? Citava okuti olipula ndoco . . .

‘Momo lie ndi kuetele ovisimĩlo ka via sungulukile viatiamẽla ketimba liange?’

Mua kongela asunga amue ndeci:

• Oku vetiyiwa lolono viasapulo. “Amalẽhe valua va siata oku vetiyiwa loviluvialuvia vi lekisa okuti tu sukila oku kuata etimba litito kuenda oku kuata eposo ketimba otembo yosi. Omo liaco, nda ove ku kuete etimba limue lia possoka, ku kala ciwa!”—Kellie.

• Evetiyo Liolonjali. “Nda limbuka okuti, nda ina yimue ya sakalala calua leposo, omõla ukãi o ka kuatavo ovituwa vimuamue. Cimuamue haico ca siata oku pita lomãla valume kuenda va isia.”—Rita.

• Ovisĩmilo viokuti sia velelepo. “Nda omunu umue wa sakalala calua leposo liaye, olonjanja viosi o sokolola ndomo a kasi. Helie o tẽla oku amamako locitangi eci?”—Jeanne.

Nda wa siata oku liyaka lovitangi viaco, pamue o pondola oku lipula ndoco . . .

‘Ndi sukila hẽ oku seteka oku pongolola eposo liange?’

Kũlihisa eci amãlehe vamue va popia.

“Omo okuti halonjanja viosiko citava oku pongolola ovina ku sole kokuove muẽle, ci kuete esilivilo oku tava oku hongua kuove. Nda wa ci linga omanu ka va ka tiamisila utima kovina viaco.”—Rori.

“Likolisilako oco o kuate uhayele uwa. Nda wa kuata uhayele uwa, eposo liove li ka kala ndomo o yongola. Ekamba liocili, lina okuti o ku sole ndomo o kasi, okuti eposo liove halioko.”—Olivia.

Oku malusula: Likolisilako oco o kuate eposo liwa. Pole ku ka sakalale calua leposo liaco. Momo ka ca sungulukile. (Tanga “Ulandu wa Julia”)

Oku kuata ocisimĩlo ca sunguluka ci ka ku kuatisa oku sanjukila ekalo liove, ndomo umãlehe umue o tukuiwa hati, Erin a ci limbuka. Eye wa popia hati: “Ocili okuti ndi kuete ovisimĩlo ka via sungulukile, pole, nda limbuka okuti ndi kuata lika ovisimĩlo viaco eci ndi tiamisila utima kovina ka via sungulukile. Nda siata oku pindisa etimba oloneke viosi kuenda ndi nõla ciwa ovina ndi lia. Ovina vikuavo vi enda ciwa.”

Epongoloko lia velapo!

Nda o kuete ovisimĩlo via sunguluka viatiamẽla ketimba liove, o liyeva ciwa kuenda eposo liove li livokiya. Embimbiliya li pondola oku ku kuatisa. Olio li tu vetiya oku kuata ovituwa ndevi:

• Oku sanjukila ekalo liove. “Ca sunguluka oku sanjukila ovina tu lete okuti ka tu sokolola ovina tu yongola. Ovina viaco, ka via sungulukile, vi lomboloka oku oku seteka oku kuata ofela.”—Ukundi 6:9.

• Oku kuata ovisimĩlo via sunguluka catiamẽla koku pindisa etimba. “Oku pokuisa etimba ku kuete esilivilo litito.”—1 Timoteo 4:8.

• Eposo liovutima. “Omunu o vanja okumõleha kuokilu, Yehova puãi o vanja vutima.”—1 Samuele 16:7.

“Ocipala cetu ci lekisa ndomo tu kasi. Nda omunu wa sanjukila ekalo liaye, omanu vakuavo va pondola oku ci limbuka kuenda va sanda oku linga ukamba laye.”—Sarah

Kefetikilo, eposo li pondola oku vetiya calua. Pole, ovina vi ka vetiya omanu oku ku ivailuka, ovituwa viove kuenda eposo liove liovutima.”—Phylicia

Tangavo Olosapo 11:22; Va Kolosai 3:10, 12; 1 Petulu 3:3, 4.