Ifelu Viondalu vi Kasiko Muẽle? Ndomo ci Lekisiwa Vembimbiliya Nye ci Lomboloka Ifelu Viondalu?
Etambululo Liembimbiliya
Ambimbiliya alua osimbu Ongelesi ndeci, Embimbiliya Rei Jaime, lia tukula ondaka “ifelu” vovinimbu vimue. (Olosamo 16:10; Ovilinga 2:27a) Ndomo ci lekisiwa vocipama cilo, ociluvialuvia cetavo limue, omanu valua va tava okuti, ifelu viondalu ocitumãlo cimue mu kangisiwila olondingaĩvi. Pole, eci hẽ oco Embimbiliya li longisa?
Vocipama cilo
Ifelu viondalu ocitumãlo cimue hẽ omanu va talisiwila ohali otembo ka yi pui?
Olusapo lua Yesu luatiamẽla kulume ohuasi kuenda Lasaru lu lomboloka nye?
Ifelu viondalu vi lomboloka hẽ okuti omunu ka kuete ukamba la Suku?
Ifelu viondalu ocitumãlo cimue hẽ omanu va talisiwila ohali otembo ka yi pui?
Sio. Kelimi liatete olondaka via pongoluiwa ndeci “ifelu,” Vambimbiliya amue osimbu, kelimi lio (Heveru, “Sheol”; lio Helasi, “Hades”) yi tiamisiwila “Konjembo” okuti, ocitumãlo mu kendiwa omanu va fa. Embimbiliya li lekisa okuti, omanu vana va kasi “Vonjembo,” ka va kuete vali omuenyo.
Vana va fa, ka va kũlĩhĩle lacimue kuenda ka va pondola oku yeva evalo. “Ka muli upange, ndaño esunga, ndaño olondunge, ndaño ukũlĩhĩso, vifelu.” (Ukundi 9:10 Embimbiliya Douay-Rheims) Vifelu ka mueyukile lonjuela yomanu va litetela omo lievalo. Pole, Embimbiliya liti: “Olondingaĩvi vi kutisiwe osõi, vi ũhile vonjembo [vifelu, Douay-Rheims].”—Olosamo 31:17; Embimbiliya Rei Jaime (30:18, Douay-Rheims); Olosamo 115:17.
Suku wa tumbika olofa ndonjila yoku kangisiwa omo liekandu, pole, ka tumbikile ifelu viondalu. Suku wa sapuila ulume watete Adama okuti, omo a lueya ocihandeleko caye, ekangiso liaco olofa. (Efetikilo 2:17) Suku ka popele cimue catiamẽla koku kangisiwa otembo ka yi pui vifelu viondalu. Noke eci Adama a lueya, Suku wo sapuila ekangiso liaye hati: “Omo ove wuneketela, o tiukila koneketela.” (Efetikilo 3:19) Eye ka laikele oku kala vali komuenyo. Nda okuti Suku wa kapele Adama vifelu viondalu, Eye nda wa ci popia. Suku ka pongoluile ekangiso lia Adama omo lioku sinĩla ovihandeleko viaye. Noke lia Adama oku lekisa esino, Suku pocakati cusonehi umue Wembimbiliya wa popia hati: “Onima yi fetiwa omo liekandu oku fa.” (Va Roma 6:23) Ka kuli esukila lioku vokiya vali kekangiso liaco omo okuti, “wosi wa fa wa yovuiwa kekandu liaye.”—Va Roma 6:7.
Ocisimĩlo cekangiso ka li pui ku Suku ca vĩha. (Yeremiya 32:35) Ocisimĩlo caco ka ci likuata leci Embimbiliya li longisa okuti, “Suku eye ocisola.” (1 Yoano 4:8) Eye o yongola okuti, tu u fendela omo liocisola okuti, ka tu ci lingi omo liusumba woku kangisiwa otembo ka yi pui.—Mateo 22:36-38.
Omanu vawa va enda vifelu. Ambimbiliya ana a tukula ondaka “ifelu,” a lekisa okuti, alume vakuekolelo ndeci, Yakoba la Yovi, va lavokaile oku enda vifelu. (Efetikilo 37:35; Yovi 14:13) Ndaño muẽle Yesu Kristu wa tukuiwavo okuti, o kasi vifelu vepuluvi liolofa viaye osimbu ka pinduiwile. (Ovilinga 2:31, 32) Omo liaco, Vambimbiliya aco polonepa vi tukula ondaka “ifelu,” vi tiamisiwila kondaka Onjembo.b
Olusapo lua Yesu luatiamẽla kulume ohuasi kuenda Lasaru lu lomboloka nye?
Olusapo olu, lua tiwa la Yesu kuenda lua sonehiwa velivulu lia Luka 16:19-31. Olosapo, ovindekaise vi tu longisa olonumbi viocili kuenda ndomo Suku a vi tenda. Olusapo wulume ohuasi kuenda Lasaru, ka lua kaile ulandu umue wa pitako muẽle. (Mateo 13:34) Oco o lilongise ovina vikuavo viatiamẽla kolusapo luaco, tala ocipama losapi: “Helie wa Kala Ulume Ohuasi Kuenda Lasaru?”
Ifelu viondalu vi lomboloka hẽ okuti omunu ka kuete ukamba la Suku?
Sio. Elongiso liokuti vana va fa va kũlĩha okuti ka va kuete ukamba la Suku, ka li likuata leci Embimbiliya li longisa, momo li popia okuti, ava va fa ka va kũlĩhĩle lacimue.—Olosamo 146:3, 4; Ukundi 9:5.
Kuli hẽ umue wa yovuiwa vifelu?
Oco. Embimbiliya li tukula ovolandu a suapo omanu ecea vana va kapiwa Vonjembo (okuti, “vifelu” ndomo ya pongoluiwa Vambimbiliya amue) kuenda va pinduiwile.c Nda ovo va kũlĩhĩle ovina vi pita vifelu va kala, nda va tẽla oku lombolola eci ca pita lavo. Vosi yavo, lomue wa popia okuti, wa kala vocitumãlo cekangiso, ale wa liyaka locina cimue. Momo lie? Ndeci Embimbiliya li longisa, ovo ka va kũlĩhĩle lacimue, va kala ndu okuti, va “pekela kolofa.”—Yoano 11:11-14; 1 Va Korindo 15:3-6.
a Ambimbiliya alua o koloneke vilo kelimi Liongelesi, ka a tukula ondaka “ifelu” kelivulu Liovilinga 2:27. Pole, amue a tukula ondaka ndeci, “onjembo,” (New Century Version); “vuviali wovivimbi,” (New International Version); “ocivimbi” (The Passion Translation). Vakuavo va pitiya lika ondaka yaco ndomo yi sonehiwa kelimi lio Helasi okuti, “Hades.”—Holman Christian Standard Bible, NET Bible, New American Standard Bible, English Standard Version.
b Tala okakasia losapi, “Olondaka Viembimbiliya Kelimi Liatete.”