Momo Lie Olombangi Via Yehova ka vi Lingila Ocipito Ceteke Lioku Citiwa?
Olombangi Via Yehova ka vi lingi ocipito ceteke lioku citiwa omo vi tava okuti, Suku o tenda ovipito viaco ndocina cimue ca vĩha. Ocili okuti, Vembimbiliya ka mu sangiwa onumbi layimue yi pisa ovipito viaco, pole, olio li tu kuatisa oku sokolola kovina via kongela vovipito viaco, loku kuata elomboloko ndomo Suku a vi tenda. Kũlĩhisa ovina vikuãla via kongela vovipito kuenda olonumbi Viembimbiliya.
Ovipito vieteke vioku citiwa via tunda katavo esanda. Ndomo ca lomboluiwa vo Dicionalio yimue, ocipito caco ca fetika oku lingiwa omo okuti, omanu va tavele okuti keteke liocipito coku citiwa kuomunu umue, “olondele via kuatele epuluvi lioku linga eci cĩvi komanu vana va tẽlisa unyamo” kuenda oku molẽha kuakamba kumue lovilamo viesanju, via enda oku kuatisa oku teyuila vana va tẽlisa anyamo. Elivulu liokuti, (A Tradição dos Aniversários Natalícios,) li lekisa okuti kosimbu, ulala mua enda oku sonehiwa ateke oku citiwa, “wa kuatele esilivilo lialua koku sokiya uloño woku kũlĩhĩsa olombungululu.” Elivulu liaco li popiavo okuti, “ndomo omanu valua va tava, olovela vi kapiwa keteke liocipito coku citiwa, vi kuete unene woku tẽlisa olonjongole.”
Pole, Embimbiliya li pisa oku tãha, umbanda “ale ovina vikuavo via li soka lavio.” (Esinumuĩlo 18:14; Va Galatia 5:19-21) Esunga limue lieci Suku a pisila olupale luo Bavulono kosimbu lieli liokuti, olonungi vialio via enda oku fendela olombungululu okuti, onjila yimue yoku tãha. (Isaya 47:11-15) Olombangi Via Yehova ka vi pesela otembo poku kũlĩhĩsa ono viovihilahila viaco; pole, eci Embimbiliya li eca olonumbi via suapo ndevi viatiamẽla kumbanda, tu vi kuama.
Akristão vokocita catete ka va endaile oku linga ovipito vieteke lioku citiwa. Elivulu limue lia lekisa okuti, Akristão vokocita catete, “va enda oku tenda ovipito vieteke lioku citiwa ndocina cimue ca tunda katavo esanda.” Embimbiliya li lekisa okuti, ovapostolo kuenda omanu vakuavo va longisiwa la Yesu, va tumbikile ocihandeleko cimue okuti akristão vosi va sukilile oku ci kuama.—2 Va Tesalonike 3:6.
Ocipito cimue Embimbiliya li popia okuti oco lika Akristão va sukila ci linga, ka ca tiamisiwilile koku citiwa, pole, kolofa vimue okuti, olofa via Yesu. (Luka 22:17-20) Eci ka ci tu komohĩsa omo Embimbiliya li popia okuti, “eteke lioku fa lia velapo okuti eteke lioku citiwa li sule.” (Ukundi 7:1) Yesu kesulilo liomuenyo waye palo posi, wa lingile onduko yiwa ku Suku kuenje eteke liolofa viaye lia velelepo okuti eteke liaye lioku citiwa li sule.—Va Heveru 1:4.
Embimbiliya ka li popi okuti umue pokati kafendeli va Suku wa lingile ocipito ceteke lioku citiwa. Ka ci lomboloka okuti ulandu waco wopiwamo, momo olio li tukula ovipito vivali viomanu ka va fendelele Yehova. Pole, ovipito viaco via tukuiwa lonjila yimue ka ya sungulukile.—Efetikilo 40:20-22; Marko 6: 21-29.
Anga hẽ omãla Volombangi Via Yehova va liyeva okuti va kasi oku pumba cimue omo ka va sambiliya eteke lioku citiwa?
Ndomo ca siata oku pita lolonjali viwa, Olombangi Via Yehova vi lekisa okuti vi sole omãla vavo kuenda ka va ci lingi lika vepuluvi limosi vunyamo, pole, va ci linga vokuenda kunyamo wosi. Ovio vi solevo oku eca olombanjaile komãla vavo, loku linga ovipito vimue. Olonjali viaco, vi seteka oku kuama ongangu ya Suku, una wa siata oku eca ovina viwa komãla vaye lutima wosi. (Mateo 7:11) Omo liaco, omãla Volombangi Via Yehova ka vi simi okuti vi kasi oku pumba cimue. Kũlĩhĩsa olondaka vi kuãimo:
“Ci sanjuisa calua oku tambula ombanjaile yimue nda omunu ka ci lavokaile.”—Tammy, o kuete 12 kanyamo.
“Sia siatele oku tambula olombanjaile keteke liange lioku citiwa, pole, olonjali viange, via siata oku nyĩha olombamjaile vapuluvi akuavo. Ndi ci sole calua omo okuti, ocina cimue si ci lavoka.”—Gregory, o kuete 11 kanyamo.
“O sima hẽ okuti, akukutu ekũi, ekende limue kuenda ocisungo cimue ci lomboloka ocipito? Ove o sukila oku enda konjo yange oco o ka mole eci ci lomboloka ocipito cimue.—Eric, o kuete 6 kanyamo.