Momo Lie Olombangi Via Yehova vi Lingila Ocipito Condalelo ya Ñala Lonjila ya Litepa Latavo Akuavo?

Etu tu kuãi olonumbi Viembimbiliya poku linga Ocipito Condalelo ya Ñala okuti, Onjivaluko yolofa via Yesu ca kũlĩhĩwavo okuti, ‘Ondalelo ya Sulako ya Ñala.’ (1 Va Korindo 11:20) Pole, ovina atavo akuavo a siata oku linga vepuluvi liaco, ka vi likuata leci Embimbiliya li longisa.

Ocimãho cocipito caco

Kua siata oku sambiliyiwa Ocipito Condalelo ya Ñala oco tu ivaluke Yesu kuenda oku lekisa olopandu omo liocilumba a tu lingila. (Mateo 20:28; 1 Va Korindo 11:24) Onjivaluko yaco osakramentuko, ale ocihilahila cimue cetavo cecelela omunu oku eca olopandu ku Suku, ale ongecelo yakandu aye.a Embimbiliya li longisa okuti, akandu etu ka a eceliwa pocakati cocihilahila cimue cetavo, pole, te lika poku kolela ku Yesu.—Va Roma 3:25; 1 Yoano 2:1, 2.

Ci sukila oku lingiwa olonjanja viñami?

Yesu wa popia okuti olondonge viaye vi sukila oku linga Ocipito Condalelo ya Ñala, pole, ka popele olonjanja via sukilile oku ci linga. (Luka 22:19) Omanu vamue va sima okuti, va sukila oku linga ocipito conjivaluko olosãi viosi; vakuavo va sima okuti, ci lingiwe onjanja yimosi vosemana, eteke leteke, ale olonjanja vialua veteke limuamue. Handi vali vakuavo, va popia okuti, omunu lomunu eye o nõla olonjanja a linga ocipito conjivaluko ya Ñala.b Pole, kuli ovina vimue vi sukiliwa oku kapiwako.

Yesu wa linga Ocipito Condalelo ya Ñala veteke limuamue va Yudea va enda oku linga ocipito Copaskoa kuenda eye wa fa muẽle veteke liaco. (Mateo 26:1, 2) Eci hacinacimueko lika ca likuata. Embimbiliya li sokisa ocilumba ca Yesu ndocilumba cokameme Kopaskoa. (1 Va Korindo 5:7, 8) Opaskoa ya enda oku lingiwa onjanja yimosi vunyamo. (Etundilo 12:1-6; Ovisila 23:5) Cimuamue haico okuti, Akristão vo kocita catete,c va enda oku linga Ocipito Conjivaluko Yolofa via Yesu onjanja yimosi vunyamo kuenda Olombangi Via Yehova vi kuãi ongangu yaco ya kunamẽla Vembimbiliya.

Eteke lipi kuenda elivala lipi?

Oku konomuisa eci Yesu a linga, poku linga Ocipito Conjivaluko, ci tu kuatisa oku nõla olonjanja ci lingiwa, eteke kuenda elivala ci sukila oku lingiwa. Eye wa tumbika Ocipito Conjivaluko noke yoku iñila kuekumbi, keteke 14 yosãi ya Nisana kunyamo 33 K.K., ndomo ci likuata lokalendaliu Kembimbiliya. (Mateo 26:18-20, 26) Etu tua siata oku linga Ocipito Conjivaluko yolofa viaye unyamo lunyamo, veteke liaco, poku kuama ongangu Yakristão vatete.d

Ndaño okuti eteke 14 yosãi ya Nisana yunyamo 33 K.K., lia kala Votãlo, eteke li li kuata lokalendaliu ketu, li pondola oku kala veteke likuavo liosemana. Oco tu kũlĩhe eteke li ka kala 14 yosãi ya Nisana, tu kuãi onjila yimuamue yotembo ya Yesu okuti, ka tu kuama okalendaliu ka va Yudea votembo yilo.e

Ombolo kuenda ovinyu

Kocipito Conjivaluko Yesu a tumbika, wa talavaya lombolo ka yi kuete etumbisa kuenda ovinyu ya supile kocipito Copaskoa. (Mateo 26:26-28) Etu tua siata oku kuama ongangu yaye. Tua siata oku talavaya lombolo ka yi kuete etumbisa lovina vikuavo. Ovinyu yaco, yi kusuka okuti, osumuko yayuva ale ovinyu ya tengiwa losuka, ale viovikũla viñi.

Atavo amue a siata oku talavaya lombolo yi kuete etumbisa, pole, Vembimbiliya, etumbisa li lomboloka ekandu kuenda ovitukiko. (Luka 12:1; 1 Va Korindo 5:6-8; Va Galatia 5:7-9) Omo liaco, ombolo ka yi kuete etumbisa lovina vikuavo, yi pondola oku lomboloka etimba ka li kuete ekandu lia Kristu. (1 Petulu 2:22) Ocina cikuavo ka ci likuata Lembimbiliya, oku talavaya losumu yayuva ka ya felele okuti, ovinyu haiyoko. Atavo amue a linga ovina viaco omo okuti, a kisika oku yuvula oku nyua ovinyua vi koluisa. Pole, episo liaco ka lia kunamẽlele Vembimbiliya. —1 Timoteo 5:23.

Ombolo kuenda ovinyu, ovindekaise ño

Ombolo ka yi kuete etumbisa kuenda ovinyu yi kusuka, vina via siata oku aviwa Kocipito Conjivaluko, ovindekaise viositu kuenda osonde ya Kristu. Ovio ka vi li pongolola locikomo ndaño oku tengiwa lositu kuenda osonde yocili ya Yesu, ndeci vamue va siata oku sima. Tala eci Embimbiliya li popia catiamẽla kondaka eyi.

• Yesu ka tumile olondonge viaye oku nyua osonde yaye. Eye wa kũlĩhĩle okuti, ocihandeleko ca Suku ci pisa oku lia osonde, momo osonde yi kola. (Efetikilo 9:4; Ovilinga 15:28, 29) Ocili okuti, Yesu lalimue eteke a ponduile oku vetiya umue oku lueya ocihandeleko ca Suku. —Yoano 8:28, 29.

• Ovapostolo, nda ka va nyuile osonde ya Yesu osimbu eye a kasi lomuenyo. Momo, osonde yaye handi ka ya ‘pesiwile,’ ci lekisa okuti, ocilumba caye ca laikele oku lingiwa. —Mateo 26:28.

• Ocilumba ca Yesus ca eciwa “onjanja yimosi lika.” (Va Heveru 9:25, 26) Ombolo kuenda ovinyu vi aviwa Kocipito Condalelo ya Ñala, nda via li pongoluile ositu kuenda osonde ya Yesu, vana va lia kocipito caco, nda va pitolola ocilumba caye ndu okuti, va pesela vali osonde yaye.

• Yesu hati: “Ci lingaili onjivaluko yange.” Ka popele hati: “Ci lingaili oku pitolola ocilumba cange.” —1 Va Korindo 11:24.

Vamue va tava kelongiso liokuti, ombolo kuenda ovinyu, vi li pongolola etimba kuenda osonde ya Yesu. Ovo va kunamisila ovisimĩlo viavo kovinimbu vimue Viembimbiliya. Ambimbiliya alua a lekisa olondaka via Yesu kuna a popia hati: “Eyi osonde yange.” (Mateo 26:28) Pole, olondaka evi vi pondola oku pongoluiwa hati: “Eci ci lomboloka osonde yange.”f Yesu wa kuama upopi wocindekaise woku sokisa, ndeci a enda oku linga poku longisa. —Mateo 13:34, 35.

Helie o pondola oku lia kombolo kuenda oku nyua kovinyu?

Olombangi Via Yehova poku linga Ocipito Condalelo ya Ñala, omanu vamue ovo lika va pondola oku lia kombolo kuenda oku nyua kovinyu. Momo lie?

Osonde ya pesiwa ya Yesu, ya tumbika “ocisila cokaliye,” cina ca piñainya ocisila Yehova Suku a lingile lonjo ya va Isareli yosimbu. (Va Heveru 8:10-13) Vana va kongeliwa vocisila cokaliye, va lia ombolo loku nyua ovinyu Kocipito Conjivaluko. Vocimunga caco ka mua kongelele Akristão vosi, pole, te lika “vana va kovongiwa” la Suku lonjila yilikasi. (Va Heveru 9:15; Luka 22:20) Omanu vaco, va ka viala la Kristu kilu kuenda Embimbiliya li popia okuti, va soka lika 144.000 komanu va ka kuata esumũlũho liaco. —Luka 22:28-30; Esituluilo 5:9, 10; 14:1, 3.

Vana va ka viala la Kristu, va tukuiwa hati, ‘okacunda.’ Pole, valua pokati ketu, tu kuete elavoko lioku panga onepa ‘kowiñi wakahandangala’ womanu va ka tambula omuenyo ko pui palo posi. (Luka 12:32; Esituluilo 7:9, 10) Vana va kuete elavoko lioku kala palo posi, ka va li kombolo kuenda ka va nyui kovinyu Kocipito Conjivaluko, pole, veya kocipito caco oco va lekise olopandu kocilumba Yesu a lingila vosi. —1 Yoano 2:2.