Eteke Lipi Esulilo Lioluali Liya?
Etambululo Liembimbiliya
Oco tu kuate elomboloko liotembo esulilo lioluali lulo liya, tu sukila oku kuata elomboloko ndomo ondaka “oluali” ya tukuiwa Vembimbiliya. Kelimi lio Helasi ondaka kósmos, ya pongoluiwa okuti, “oluali,” oluo lu tiamisiwila koluali mu sangiwa omanu okuti ci likuata locipango ca Suku. (Yoano 15:18, 19; 2 Petulu 2:5) Olonjanja vimue ondaka kósmos yi tiamisiwila komanu vosi.—1 Va Korindo 7:31; 1 Yoano 2:15, 16.a
Nye ci lomboloka “esulilo lioluali”?
Ondaka “esulilo lioluali,” ya pongoluiwa olonjanja vialua Vembimbiliya, ondaka yaco yi tiamisiwilavo ‘kesulilo liovina vi kasi voluali,’ ale “esulilo lioluali.” (Mateo 24:3) Eci ka ci lomboloka oku kunduiwa kuongongo ale kuomanu vosi, pole, ci lomboloka oku kunduiwa kuolondingaĩvi viosi.—1 Yoano 2:17.
Embimbiliya li longisa okuti “ondingaĩvi ka yi kalapo” kuenje omanu vawa va kuata ekalo liwa palo posi. (Osamo 37:9-11) Enyolẽho li ka pita vokuenda “kuohali ya piãla,” kuenda li ka sulila vuyaki wo Harmagedo.—Mateo 24:21, 22; Esituluilo 16:14, 16.
Oluali lu ka sulila otembo yipi?
Yesu wa popia hati: “Catiamẽla keteke lowola yaco, lomue wa yi kũlĩha, ndaño ovangelo kilu, ndaño Omõla, te lika Isia.” (Mateo 24:36, 42) Eye wa amisako loku popia okuti esulilo lioluali li keya ocipikipiki, “momo owola vu sima okuti Mõlomunu keya, eye iya.”—Mateo 24:44.
Ndaño okuti ka tua kũlĩhĩle eteke kuenda owola, Yesu wa eca “ondimbukiso,” ale ovolandu alua a tu kuatisa oku limbuka otembo yoku iya kuesulilo lioluali. (Mateo 24:3, 7-14) Embimbiliya li tukula otembo yaco okuti, ‘otembo yesulilo,’ kuenda ‘oloneke via sulako.’—Daniele 12:4; 2 Timoteo 3:1-5.
Ku ka kala hẽ ovina vi ka supuluka noke liesulilo lioluali?
Oco ku ka supuluka. Ongongo yi ka amamako, momo Embimbiliya li popia hati: “Ka lu sengiwa vali.” (Osamo 104:5) Ongongo yi keyuka lomanu, ndomo Embimbiliya li ci likuminya poku popia okuti: “Olondingesunga vi piñala ofeka, vi tungamo oloneke ka vi pui.” (Osamo 37:29) Suku o ka tẽlisa ovina a likuminya viokuti:
Oluali luokaliye.—Isaya 35:1; Luka 23:43.
Oku kolapo kuenda ekalo liwa.—Mika 4:4.
Vosi va ka kuata upange uwa.—Isaya 65:21-23.
Oku vela loku kuka ka ku kalako vali.—Yovi 33:25; Isaya 33:24.
a Kelimi lio Helasi ondaka aión ya pongoluiwavo olonjanja vimue Vembimbiliya okuti, “oluali.” Ondaka aión yi kuete elomboloko limuamue londaka kósmos okuti yi tiamisiwila komanu vosi.