Helie Wenda Kilu?
Etambululo Liembimbiliya
Suku wa nõla etendelo limue liomanu Akristão vakuekolelo okuti, noke lioku fa, va pinduiwa oco va ka kaile kilu. (1 Petulu 1:3, 4) Akristão vaco noke lioku nõliwa, va sukila oku amamako oku kala vakuekolelo loku kuata ekalo liomuenyo li sanjuisa Suku. Ovo va sukila oku ci linga oco ka va ka pumbe elavoko liavo lioku ka kala kilu.—Va Efeso 5:5; Va Filipoi 3:12-14.
Omanu vaco nye va ka linga kilu?
Akristão vaco va nõliwa va ka talavayela kumosi la Yesu ndolosamo kuenda ndovitunda vokuenda 1.000 yanyamo. (Esituluilo 5:9, 10; 20:6) Ovo va ka panga onepa ‘kovailu okaliye’ okuti, uviali wokilu kuenda va ka viala ‘ongongo yokaliye,’ yi lomboloka omanu va ka kala palo posi. Vana va ka viala kilu, va ka kuatisa omanu oco va lipue ndeci Suku a yonguile tunde kefetikilo.—Isaya 65:17; 2 Petulu 3:13.
Omanu vañami va ka pinduiwa oco va ende kilu?
Embimbiliya li lekisa okuti ci soka 144.000 komanu, va ka pinduiwa oco va ende kilu. (Esituluilo 7:4) Vocinjonde ci sangiwa kelivulu Liesituluilo 14:1-3, upostolo Yoano wa mola “Kameme o tãi Komunda Siono kumue 144.000.” Vocinjode eci “Kameme” o lomboloka Yesu noke liepinduko liaye. (Yoano 1:29; 1 Petulu 1:19) ‘Omunda Siono,’ yi lomboloka unene wa Yesu kuenda 144.000 va ka vialela kumosi kilu.—Osamo 2:6; Va Heveru 12:22.
Akristão vaco, “va kovongiwa kuenda va nõliwa,” oco va ka viale la Yesu kilu, va tukuiwa okuti ‘okacunda.’ (Esituluilo 17:14; Luka 12:32) Eci ci lekisa okuti ovo etendelo limue litito oku ci sokisa letendelo liosi liolomeme via Yesu.—Yoano 10:16.
Uhembi watiamẽla komanu va enda kilu
Uhembi: Omanu vosi vawa va enda kilu.
Ocili: Suku wa likuminya okuti onepa yalua yomanu vawa yi ka kala palo posi.—Osamo 37:11, 29, 34.
Yesu wa popia: “Lomue wa la londa kilu.” (Yoano 3:13) Eye wa lekisavo okuti omanu vawa va fa osimbu eye ka file ndeci Avirahama, Mose, Yovi kuenda Daviti, ka va endele kilu. (Ovilinga 2:29, 34) Ovo va kuata elavoko lioku pinduka oco va ka kaile otembo ka yi pui palo posi.—Yovi 14:13-15.
Epinduko lioku kuenda kilu li tukuiwa okuti, ‘epinduko liatete.’ (Esituluilo 20:6) Eci ci lekisa okuti ku ka kala epinduko likuavo mulo vongongo.
Embimbiliya li longisa okuti vemẽhi Liusoma wa Suku, “oku fa ka ku ka kalako vali.” (Esituluilo 21:3, 4) Ohuminyo eyi yi ka tẽlisiwa mulo vongogngo momo kilu ka kualakala olofa.
Uhembi: Omunu lomunu eye o nõla nda o kala palo posi ale enda kilu.
Ocili: Suku eye o nõla pokati Kakristão u o ka “tambula onima” yelavoko lioku kala kilu. (Va Filipoi 3:14) Ndaño okuti omunu o kuete onjongole yoku enda kilu, Suku eye o nõla oku omunu a ka kala.—Mateo 20:20-23.
Uhembi: Elavoko lioku kala palo posi ka liwako. Palo posi pa ka kala lika omunu ka sesamẽla oku enda kilu.
Ocili: Omanu va ka kala palo posi Suku o va tukula okuti “omanu vange” “vana nda nõla” kuenda “vana va sumũlũisiwa la Yehova.” (Isaya 65:21-23) Omanu vaco va ka kuata esumũlũlo lioku tẽlisa ocipango ca Suku catiamẽla ko manu okuti va lipua loku kala o tembo ka yi pui voluali luokaliye palo posi.—Efetikilo 1:28; Osamo 115:16; Isaya 45:18.
Uhembi: Etendelo 144.000 lia tukuiwa kelivulu Liesituluilo liocindekaise, haliociliko.
Ocili: Ocili okuti elivulu Liesituluilo li tukula atendelo alua ocindekaise, pole, atendelo amue ocili muẽle. Ndeci, Esituluilo li tukula “12 kolonduko viovapostolo 12 va Kameme.” (Esituluilo 21:14) Kũlĩhĩsa ovovangi a lekisa okuti etendelo 144.000 liocili muẽle.
Elivulu Liesituluilo 7:4 li tukula “etendelo lia vana va kapiwa olondimbukiso [okuti, va nõliwila oku enda kilu] 144.000.” Vonimbu vikuavo elivulu Liesituluilo li sokisa ocimunga 144.000 locimunga cikuavo: “owiñi wakahandangala okuti, lomue wa tẽlele oku u tenda.” “Owiñi wakahandangala” u tambulavo epopelo li tunda ku Suku. (Esituluilo 7:9, 10) Nda etendelo 144.000 lia kaile liocindekaise, okuti, li tiamisiwila komanu vosi, etepiso liovimunga vivali nda ka lia kuatele esilivilo.a
Elivulu Liesituluilo li lekisavo okuti, vana va tiamẽla ketendelo 144.000, “va landiwa pokati komanu ndapako atete.” (Esituluilo 14:4) Ondaka yokuti “apako atete,” yi tiamisiwila ketendelo limue litito lia nõliwa oco li linge ocindekaise. Ondaka yaco yi tiamisiwila ku vana va ka viala la Yesu kilu. Etendelo liaco litito calua oku li sokisa letendelo liomanu valua va ka kala palo posi.—Esituluilo 5:10.
a Catiamẽla ketosi eli ulongisi Robert L. Thomas wa popia ndoco catiamẽla ketendelo lio 144.000 lia tukuiwa kelivulu Liesituluilo 7:4: “Eli etendelo limue lia suapo lia litepa leli li sangiwa Kesituluilo 7:9. Nda olio lia kaile liocindekaise, nda ka kua kaile etendelo lalimue lielivulu li lomboloka ciwa.” —Esituluilo 1-7: Um Comentário Exegético, kemẽla 474.