Ulume umue o kasi oku eca ombanjaile yimue ya muñiwa vokasia yimue

“Nye Embimbiliya li Popia Catiamẽla Kocituwa Coku Eca”?

Etambululo Liembimbiliya

Embimbiliya li tu vetiya oku eca ovina ku vakuetu lutima wa sunguluka okuti, ka tu kisikiwa. Handi vali, olio li popia okuti ocituwa coku eca cimue komunu umue, ka ci kuatisa lika omunu o tambula, pole, ci kuatisavo una eca. (Olosapo 11:25; Luka 6:38) Yesu wa popia hati: “Esanju li tunda koku eca olio lia velapo, li tunda koku tambula li sule.”—Ovilinga 20:35.

Vepuluvi lipi ocituwa coku eca ci sanjuisa Suku?

Suku o sanjuka eci tu eca cimue komunu umue okuti ka tu kisikiwa. Embimbiliya li popia hati: “Omunu lomunu a linge ndeci a sokiya vutima waye, halocikukũiko pamue oku kisikiwa, momo Suku o sole omunu eca lesanju.”—2 Va Korindo 9:7.

Oku eca lutima wosi ku panga onepa ‘ketavo’ li taviwa la Suku. (Tiago 1:27, etosi) Omunu una o kuatisa lutima wosi ukuavo, o kasi oku talavaya la Suku una o tenda ocituwa caco ndu a levalisa Kokuaye. (Olosapo 19:17) Embimbiliya li longisa okuti Suku o ka sumũlũisa omunu ukuacali.—Luka 14:12-14.

Vepuluvi lipi ocituwa coku eca ci sumuisa Suku?

Ceci ci lingiwa lovisimĩlo ka via sungulukile. Ndeci:

Oco ku komõhisiwe omanu vakuavo.—Mateo 6:2.
Oco ku tambuiwe cimue ndofeto.—Luka 14:12-14.
Oco ku landiwe epopelo.—Olosamo 49:6, 7.

Nda ci kuatisa kovopange amue, ale kovituwa Suku a suvuka. Ndeci: Ka ca sungulukile oku eca olombongo komunu umue o ka linga lavio omapalo yoku nganyala olombongo, oku sipa eliamba ale oku landa ovinyua vi koluisa. (1 Va Korindo 6:9, 10; 2 Va Korindo 7:1) Ka ca sungulukilevo oku eca ovina komunu umue o kuete olohõlo vioku talavaya oco a litekule, pole, o likala oku ci linga.—2 Va Tesalonike 3:10.

Nda ka ci kuatisa koku tẽlisa ocikele cimue ca eciwa la Suku. Embimbiliya li longisa okuti asongui vepata va sukila oku eca kepata liavo ovina vi sukiliwa. (1 Timoteo 5:8) Ocili okuti, nda ka ca sungulukile kusongui umue wepata, oku eca ovina vialua komanu vakuavo osimbu okuti, epata liaye li tala ohali. Yesu wa pisa vana ka va endaile oku kuatisa olonjali viavo via kuka haivo va enda oku popia okuti, ovina viosi va kuatele via kala “ombanjaile yeciwa ku Suku.”—Marko 7:9-13.

Ovinimbu vimue Viembimbiliya viatiamẽla kocituwa coku eca

Olosapo 11:25: “Omunu ukuacali o ka sumũlũisiwa, kuenda wosi o kavuluisa vakuavo o ka kavuluisiwavo.”

Ceci ocinimbu eci ci lomboloka: Ocituwa coku eca, ka ci kuatisa lika omunu o tambula, pole, ci kuatisavo una eca.

Olosapo 19:17: “Omunu wosi o lekisa ohenda kohukũi o kasi oku undika ku Yehova, kuenje Eye o ko tiuwila omo lieci a linga.”

Ceci ocinimbu eci ci lomboloka: Omunu o kuatisa ukuavo o kala ndu a kasi oku levalisa Suku kuenje eye wa likuminya oku u tiuwila.

Mateo 6:2: “Poku eca oviali viove viohenda, ku ka sike olumbeta ndeci vakuambambe va lingainga . . . oco va sivayiwe lomanu.”

Ceci ocinimbu eci ci lomboloka: Ka tu sukila oku eca oco tu komõhise omanu.

Ovilinga 20:35: “Esanju li tunda koku eca olio lia velapo, li tunda koku tambula li sule.”

Ceci ocinimbu eci ci lomboloka: Oku eca lutima wosi ku nena esanju.

2 Va Korindo 9:7: “Omunu lomunu a linge ndeci a sokiya vutima waye, halocikukũiko pamue oku kisikiwa, momo Suku o sole omunu eca lesanju.”

Ceci ocinimbu eci ci lomboloka: Suku o sanjuka eci tu eca cimue komunu umue lutima wosi.