Ndi Yongola Oku fa—Anga hẽ Embimbiliya li Ndi Kuatisa Nda Ndi Kasi Oku Kuata Ovisimĩlo Vioku Liponda?

Etambululo Liembimbiliya

Ocili! Embimbiliya lia tunda ku “Suku una o lembeleka vana va sumua.” (2 Va Korindo 7:6) Ndaño okuti Embimbiliya helivulu limueko li lombolola catiamẽla kuveyi wowoño, olio lia kuatisa ale omanu valua oku yuvula ovisimĩlo vioku li ponda. Olonumbi vi sangiwa Vembimbiliya vi pondolavo oku ku kuatisa.

• Olonumbi vipi viwa Embimbiliya lieca?

• Anga hẽ Embimbiliya li lombolola omanu vamue va yonguile oku liponda?

• Ovinimbu vipi Viembimbiliya vi pondola oku ku kuatisa oku yuvula ovisimĩlo vioku liponda?

• Nda ekamba limue li popia liti “ndi yongola oku fa”?

• Nda nda setekele ale oku liponda?

Olonumbi vipi viwa Embimbiliya lieca?

• ● Situlula ovisimĩlo viove.

  Ceci Embimbiliya li popia: “Ekamba liocili li lekisa ocisola otembo yosi, kuenda olio li linga manjove kotembo yohali.”—Olosapo 17:17.

  Elomboloko liaco: Tu sukila ekuatiso lia vakuetu, nda tu kasi oku liyaka lovisimĩlo ka via sungulukile.

  Nda okuti ku sapuilako vakuene ovisimĩlo viove, ku ka tẽla oku yula ovisimĩlo vĩvi lika wove. Pole, nda o sapuilako ekamba liove, citava okuti ku yuliwa lovisimĩlo viaco kuenda o kuata ovisimĩlo via sunguluka.

  

  Seteka ndoco: Etaili, sapela laumue ukuepata ale ekamba limue ove wa kolela.a Citava okuti o soneha ovisimĩlo viove.

• ● Sanda ekuatiso liolondotolo.

  Ceci Embimbiliya li popia: “Omanu va kuete uhayele ka va sukila ondotolo, te vana va vela.”—Mateo 9:12.

  Elomboloko liaco: Tu sukila oku sanda ekuatiso liolondotolo nda tu vela.

  Ovisimĩlo vioku lipond,a ondimbukiso yuvei wovowoño. Ndeci ci pita luvei umue vetimba, ka tu sukila oku kuata osõi. Uvei wovowoño kuenda woketimba u pondola oku sakuiwa.

  Seteka ndoco: Sanda lonjanga ekuatiso liondotolo ya loñoloha nda citava.

• ● Ivaluka okuti Suku wa ku kapako.

  Ceci Embimbiliya li popia: “Olongungu vitãlo ka vi landisiwa hẽ lovingangu vivali vi kuete esilivilo litito? Haimo lumue, layimue pokati kavio yi ivaliwa la Suku. . .. Ko ka kuati usumba; ene wa velipo okuti olongungu vialua vi sule.”—Luka 12:6, 7.

  Elomboloko liaco: Ove o kuete esilivilo lialua ku Suku.

  Pamue o sima okuti lomue wa kapako ovisimĩlo viove. Pole, Suku o lete ovina o kasi oku liyaka lavio. Eye wa ku kapako ndaño muẽle ceci okuti ku kuete vali onjongole yoku kala komuenyo. Osamo 51:17 yi popia ndoco: “A Suku, ove ku ka likala utima wa teka haiwo wa samba.” Suku o yongola okuti o kala komuenyo momo o ku sole calua.

  Seteka ndoco: Tala olonumbi Embimbiliya lieca vi lekisa okuti Suku o ku sole calua. Ndeci, tanga ocipama 24 celivulu Kuata Ukamba la Yehova.

• ● Likutilila ku Suku.

  Ceci Embimbiliya li popia: “Yeki kokuaye asakalalo ene osi, momo eye o vu tati.”—1 Petulu 5:7.

  Elomboloko liaco: Suku o yongola okuti u lomboluila ovisimĩlo viove kuenda ovina vi ku sakalaisa.

  Suku o ku ĩha ombembua yovutima kuenda ongusu yoku amamako. (Va Filipoi 4:6, 7, 13) Eyi oyo onjila a siata oku kuama poku kuatisa vana va likutilila kokuaye lutima wosi.—Osamo 55:22.

  

  Seteka ndoco: Likutilila ku Suku olonjanja viosi. Tukula onduko yaye, Yehova kuenda u lomboluila ovisimĩlo viove. (Osamo 83:18) Pinga kokuaye oco a ku kuatise oku liyaka lovitangi viove.

• ● Sokolola kelavoko Liembimbiliya liokovaso yoloneke.

  Ceci Embimbiliya li popia: “Tu kuete elavoko liaco ndonjundo kovimuenyo vietu, lina lia kolapo hailio lia pama.”—Va Heveru 6:19, etosi.

  Elomboloko liaco: Ovisimĩlo viove vi pondola oku pongoloka ndeci onaviyu yimue yi kundoka lofela. Pole, elavoko li sangiwa Vembimbiliya, li pondola oku ku kuatisa oku kolapo.

  Elavo liaco haliuhembiko, pole, olio lia kunamẽla kohuminyo ya Suku yoku malako ohali.—Esituluilo 21:4.

  Seteka ndoco: Lilongisa ovina vikuavo via tiamẽla kelavoko li sangiwa Vembimbiliya. Tanga ocipama losapi, “O Pondola Oku Kolela Kekalo Liwa Lio Kovaso Yoloneke”

• ● Linga ocina cimue ove o sole.

  Ceci Embimbiliya li popia: “Utima umue wesanju u kasi ndovihemba vi kayisa.”—Olosapo 17:22.

  Elomboloko liaco: Oku linga ovina vi tu kokela esanju ci tu kuatisa kuhayele ale ketimba kuenda ci tu sanjuisa.

  

  Seteka ndoco: Linga ocina cimue o sole calua. Ndeci, yevelela ovisikilo vina vi ku sanjuisa, tanga ulandu umue u vetiya ale oku linga omapalo yimue. O pondolavo oku kuata esanju lialua poku kuatisa vakuene, ndaño kovina vitito.—Ovilinga. 20:35.

• ● Tata uhayele wove.

  Ceci Embimbiliya li popia: “Oku pokuisa etimba ku kuete esilivilo.”—1 Timoteo 4:8.

  Elomboloko liaco: Oku pindisa etimba, oku pekela kuenda oku lia ciwa, ci tu kuatisa kuhayele.

  Seteka ndoco: Seteka oku endela posi ndaño ceci ci soka akukutu 15.

• ● Ivaluka okuti ovisimĩlo kuenda ekalo liove vi pondola oku pongoloka.

  Ceci Embimbiliya li popia: “Ka wa kũlĩhĩli ndomo omuenyo wene u ka kala hẽla.”—Tiago 4:14.

  Elomboloko liaco: Ocitangi cimue o sima okuti cinene calua, ci pondola oku tetuluiwa.

  Ndaño okuti kua kũlĩhĩle nda ovitangi o kasi oku liyaka lavio vi kasi ndu okuti ka vi kuete esulilo, pole, eteke limue vi kapuako. Omo liaco, sanda oku tetulula ocitangi caco. (2 Va Korindo 4:8) Citava okuti, ocitangi caco ci pongoloka vokuenda kuotembo, pole, nda wa liponda ku tẽla oku pongolola ovisimĩlo viaco.

  Seteka ndoco: Tanga Vembimbiliya ovolandu omanu vamue va sumuile calua okuti, va yonguile oku fa kuenda kũlĩhĩsa ndomo omuenyo wavo wa pongoloka vokuenda kuotembo okuti, olonjanja vimue ka va ci lavokaile. Kũlĩhĩsa ovolandu amue.

Anga hẽ Embimbiliya li tukula omanu vamue va yonguile oku fa?

Ocili. Embimbiliya li tu sapuila omanu vamue va popele vati, “njongola oku fa.” Suku ka pisile omanu vaco, pole, wa va kuatisa. Eye o pondolavo oku linga ovina vimuamue love.

Eliya

• ● Wa kala elie? Wa kala uprofeto umue ukuotõi. Pole, olonjanja vimue wa endavo oku yeva esumuo. Elivulu lia Tiago 5:17 li popia ndoco: “Eliya wa kalavo omunu umue ndetu.”

• ● Momo lie a yonguilile oku fa? Onjanja yimue, Eliya wa simĩle okuti o kasi ulika, wa kuata usumba loku sima okuti ka kuete esilivilo. Eye wa pinga ndoco: “A Yehova upa omuenyo wange.”—1 Olosoma 19:4.

• ● Nye co kuatisa? Eye wa sapuila Yehova ovisimĩlo viaye. Suku wo lembeleka ndati? Suku wa lekisa okuti wa kapeleko Eliya kuenda wa lekisa kokuaye ovindekaise viunene Waye. Eye wa vetiya Eliya poku u sapuila okuti handi o kuete esilivilo. Handi vali, Suku wa eca kokuaye oñuatisi yimue ukuacisola haeye wa loñoloha.

• ▸ Read about ElijahTanga eci catiamẽla ku Eliya: —1 Olosoma 19:2-18.

Yovi

• ● Wa kala elie? Yovi wa kala usongui umue wepata okuti ohuwasi kuenda wa kala ufendeli wa Suku ukuekolelo.

• ● Momo lie a yonguilile oku fa? Omuenyo wa Yovi wa pongoloka vocipikipiki kuenda wa pita lovina vialua vĩvi. Eye wa pumba ukuasi waye wosi. Omãla vaye vosi va fa locilunga cimue. Eye wa kuatiwa luvei umue uvĩ. Noke, wa lundiliwa okuti eye muẽle o kuete eko, omo liovitangi a kala oku pita lavio. Yovi hati: “Nda suvuka omuenyo wange; si yongola vali oku kala lomuenyo.”—Yovi 7:16.

• ● Nye co kuatisa? Yovi wa likutilila ku Suku kuenda wa sapelavo lomanu vakuavo. (Yovi 10:1-3) Eye wa lembelekiwa calua lekamba limue ukuacisola Elihu, una wo kuatisa oku limbuka ocitangi caye lonjila yimue ya sunguluka. Handi vali, Yovi wa tava ekuatiso kuenda elembeleko lia Suku.

• ▸ Tanga eci catiamẽla ku Yovi: Yov 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mose

• ● Wa kala elie? Mose wa kala usongui wa va Isareli kuenda uprofeto umue ukuekolelo.

• ● Momo lie a yonguilile oku fa? Mose wa kuata upange walua woku linga, va enda oku u popia lãvi kuenje co sumuisile calua. Noke wa pinga ku Suku hati: “Hĩse oku ndi ponda cilo.”—Atendelo 11:11, 15.

• ● Nye co kuatisa? Mose wa lomboluila Suku ovisimĩlo viaye. Suku wo kuatisa poku leluisa ocikele caye cupange kuenda oku tepulula esakalalo liaye.

• ▸ Tanga eci catiamẽla ku Mose: Atendelo 11:4-6, 10-17.