Ceci ku Kala Ovisimĩlo Via Litepa

Omanu va kuete ovituwa kuenda olonjongole via tepa kuenje kaci leluka kohueli oku liyaka lovina viaco. Pole kolonepa vimue ovisimĩlo via litepa ci pondola oku koka ovitangi vinene volohuela ndeci:

• oku sokiya otembo yoku kala lepata liove

• ndomo o talavaya lolombongo

• Nda vu yongola oku kuata omãla

Nye o pondola oku linga nda ove kumue lohueli yove vu kuete ovisimĩlo via litepa?

• Ceci o sukila oku kũlĩha

• Ceci o pondola oku linga

Ceci o sukila oku kũlĩha

Oku li tava tava ka ci lomboloka oku kuata ovisimĩlo vumuamue. Olohueli vina vi litava tava olonjanja viosi, ka va ka kuata ovisimĩlo vimuamue, ndaño kovina vi kuete esilivilo lialua.

“Nda kulila vepata limue lia likuatele omunga. Kasulilo osemana tua enda oku nyula olosekulu vietu, va inanu, va pahãi kuenda va palume. Epata liulume wange ka liakuatele ocituwa caco. Omo liaco, tu kuete ovisimĩlo via litepa viatiamẽla kotembo tu pita lepata lietu ale oku sapela lepata li kasi ocipãla.”—Tamara.

“Ame kumue lukãi wange tu kuete ovisimĩlo via litepa catiamẽla koku talavaya lolombongo. Vokuenda kuolosãi viatete tua lihoya omo liolombongo. Oco ci potoluiwe tua sukilile oku sapela calua.”—Tyler.

Ovitangi vimue ka vi leluka oku vi potolola. Ndeci, nda umue pokati kohueli yi yongola oku kuata omãla, pole, ukuavo ka yongola? Ale nda umue pokati kolonjali o vela kuenda o sukila oku tatiwa?a

“Ame kumue lukãi wange tua sapela calua catiamẽla koku kuata omãla. Eye wa siata oku ci sokolola calua kuenda ovisimĩlo vietu viatiamẽla kondaka yaco, via li tepa. Si tẽla oku tetulula ocitangi caco.”—Alex.

Oku kuata ovisimĩlo via litepa ka ci lomboloka okuti olohuela viene vi nyõleha. Olonoño vimue vi popia okuti eci olohueli ka vi litava kondaka yimue yi kuete esilivilo, va sukila oku tetulula ocitangi caco ndaño okuti mua kongela oku litepa. Pole, nda wa kuata ovisimĩlo viaco, ci lekisa okuti kua kapeleko ohuminyo wa linga kovaso a Suku yokuti: oku kakatela kohueli yove ndaño kueya ovitangi.

Ceci o pondola oku linga

Ñolapo oku sumbila olohuela viove. Eci ci ka ku kuatisa oku tetulula ovitangi ndu okuti vu kasi oku lingila kumosi omapalo yimue.

Onumbi Yembimbiliya: “Ca tokekisa Suku, lomue ka ka ci tepe.”—Mateo 19:6.

Sokolola lutate ovina via kongelamo. Ndeci, nda umue pokati kohueli o yongola oku kuata omãla pole ukuavo ka yongola, kuli ovina vu sukila oku sokolola ndeci:

• Nda olohuela viove via pama.

  Omãla va pondola oku nena ovitangi vepata. Anga hẽ vu ka tẽla oku liyaka lovitangi viaco?

• Ovikele via kongela koku kala onjali.

  Mua kongela ovina vialua okuti, oku eca kokuavo okulia, uwalo kuenda onjo yimue yoku kala ci sule.

• Ceci catiamẽla kolombongo.

  O tẽla hẽ oku tepisa otembo yoku enda kupange, oku tata epata ale ovina vikuavo?

Onumbi Yembimbiliya: “Helie pokati kene okuti o yongola oku tunga osapalalo ka tumãla tete oku kũlĩhĩsa epese liaco, nda o kuete eci ci tẽla coku yi malusula?” —Luka 14:28.

Sokolola ovina viosi via kongeliwamo. Vu pondola oku tetulula ovitangi vimue okuti ka vu kuete ovisimĩlo vimuamue. Ndeci, sokolola eci catiamẽla koku kuata omãla. Nda pokati kene ove ku yongola oku kuata omãla lipula ndoco:

• ‘Eci mopia okuti si yongola oku kuata omãla cilomboloka hẽ okuti lalimue eteke ndi ka kuata, ale cilo lika si yongola?’

• ‘Anga hẽ si yongola oku kuata omãla omo ndi sima okuti si ka kala onjali yiwa?’

• ‘Ñuete hẽ usumba wokuti ohueli yange ka yi ka ndi kapako?’

Nda pokati kene ove o yongola oku kuata omãla lipula ndoco:

• ‘Tua lipongiya hẽ oku tẽlisa ovikele via kongela voku kala onjali?’

• ‘Anga hẽ olombongo tu kuete vitu ecelela oku tata omãla’?

Onumbi Yembimbiliya: “olondunge vi tunda kilu . . . via sunguluka.”—Tiago 3:17.

Lekisa esunguluko poku Kapako ovisimĩlo viohueli yove. Omanu vavali va pondola oku luluvala kocina cimuamue, pole, va mola ovina via litepa. Cimuamue haico okuti ohueli yi pondola oku sokolola kocina cimuamue, pole, va kuata ovisimĩlo via litepa ndeci, ndomo va tenda olombongo. Poku sapela catiamẽla kocitangi cimue okuti vu kuete ovisimĩlo via litepa, fetikili kolondaka vina okuti vu kuete ovisimĩlo vimuamue.

• Kovina vipi okuti ovisimĩlo viene vimuamue?

• Esilivilo lipi likasi kovisimĩlo viomunu lomunu?

• Oco olohuela viende ciwa anga hẽ umosi lika ale kavali kene vu pondola oku likolisilako oku kapako ovisimĩlo viomunu lomunu?

Onumbi Yembimbiliya: “Omunu lomunu ka ka sande eci caye muẽle, te cukuavo.”—1 Va Korindo 10:24.