Oku Pangiwa Kuolovideo Viohongele Yofeka Yunyamo 2020 Losapi Hati: “Sanjuki Olonjanja Viosi”!

Olovideo violohongele vietu viofeka vi vetiya ovitima vietu kuenda vi tu kuatisa oku kuata elomboloko liwa lialongiso Embimbiliya. Kohongele Yofeka yunyamo 2020 losapi hati: “Sanjuki Olonjanja Viosi”! kua lekisiwa eci cisoka 114 kolovideo oku kongelamo 43 kolohundo via lingiwa lavamanji va panga onepa Kosungu Yolombangi Via Yehova loloñuatisi viavo. O yongola hẽ oku kũlĩha upange lolombongo via pesiwa koku pangiwa kuolovideo viaco?

Oco ku pangiwe olovideo viaco ci, cisoka 900 via vamanji va sangiwa koluali luosi va eca olumue otembo yavo, lovoloño avo. Ovo va pesela eci cipanda 100. 000 kolowola vokuenda kuotembo yanyamo avali, kupange waco. Vupange waco mua kongela 70.000 violowola viupange woku pangiwa kuovideo ya velapo yakukutu 76 losapi hati: “Nehemiya: ‘Esanju li Tunda ku Yehova, Olio Ongusu Yene.’

Ndomo wa ci kũlĩha, oku tata asukila a vana va lieca o lumue, oku kuata ocitumãlo caco, ovimalẽho kuenda ovitumãlo via sunguluka mua kongela olombongo vialua.

“Manji Jared Gossman okuti wa tiamẽla Koseketa Yoku Ngalavala” wa popia hati: “Ocisoko Celongiso Cosungu Yolombangi Via Yehova” yi yongola oku lekisa ovituwa kuenda ovitumãlo via litepa volovideo vietu. Eci ci tu kuatisa oku limbuka okuti ongongela yetu ya vamanji yi sangiwa koluali luosi. Oco ku tẽlisiwe ocimãho caco, cisoka 24 kovimunga vokolofeka 11 va talavayela kumosi kupange waco. Upange wasoka ndowu, u kisika olombongo vialua esokiyo kuenda oku likuatisa pokati.”

Vialua pokati kolovideo vietu vi sukila ovimalẽho kuenda ovolandu a teta onimbu. Ndeci, ovina via lekisiwa vovideo ya velapo Nehemiya: ‘Esanju li Tunda ku Yehova, Olio Ongusu Yene’ via tungiwa koseketa yoku ngãlavala yo Monte Ebo, yi kasi ocipepi lo Patterson, Nova York, Estados Unidos. Ovina viaco via sukilile oku setukula ovimbaka viosimbu vio Yerusalãi. Handi vali, vamanji va yonguile oku talavaya lolombanjaile lonjila ya velapo. Eli olio esunga va tungila ovimano viavaya vi kuete olometulu epandu kokulepa loku vi yambela letutumo kuenda oku vi kapa ohalo oco vi lisetahãle lovawe. “Ovimano” viaco via ponduile oku sondoluiwa loku talavayiwa lavio kovina via litepa. Eci ca tepulula etendelo liovina vi tungiwa okuti vi panga onepa kulandu. Ndaño ndoco, kua pesiwa eci ci soka 100,000 kolondolale oco ku tungiwe ovina vi talavayiwa lavio vovideo ya velapo.a

Oku kũlĩha ovina viaco ci vokiya onjongole yetu yoku sola ohongele yofeka yunyamo ulo. Tua kolela okuti upange wosi wa kongelamo ko ku linga ohongele yaco yi ka eca esivayo ku Yehova koluali luosi. Tua pundula calua omo liolombanjaile viene via eciwa kupange u lingiwa voluali luosi pocataki conumbi donate.jw.org kuenda lolonjila vikuavo.