Olomisionaliu “Toke Kasulilo o Kilu Lieve”

Yesu wa sapuila olondonge viaye hati: “Vu ka linga olombangi viange . . . toke kasulilo o kilu lieve.” (Ovilinga 1:8) Koloneke vilo, Olombangi Via Yehova via siata oku likolisilako oku tẽlisa upange waco. Pole, handi kuli olonepa vimue vinene okuti, kuli omanu valua va sukila oku kundiliwa olondaka viwa. Kolofeka vimue ka kuli Olombangi vialua Via Yehova. (Mateo 9:37, 38) Nye tu kasi oku linga oco tu kundile omanu valua?

Oco tu kuatisiwe oku pokola kocikundi ca Yesu, Ocimunga Cupange Cosungu Yolombangi Via Yehova, ca siata oku tuma olomisionaliu kolonepa vialua violuali kuli esukila liakundi Vusoma. Cilo, voluali luosi muli 3.090 kolomisionaliu vovikanjo.a Valua pokati kavo va pindisiwa kosikola yimue ndeci, Osikola Yakundi Vusoma. Olomisionaliu vi lekisa onjongole poku sia olonjo viavo loku ilukila kolofeka vikuavo. Omo lioku kũlĩha ocili osimbu haivo va loñoloha kuenda omo liepindiso va tambula, olomisionaliu viaco vakuekolelo, vi kuatisa koku kunda olondaka viwa loku eca ongangu yiwa kolondonge viokaliye.

Olomisionaliu vi Tambula Ekuatiso Oco vi Kuatise Vakuavo

Kofiliale lofiliale, Oseketa Yupange okuti yi kuatisa Olondingupange Viotembo Yosi vi Kasi Vovikanjo, yi talavayela kumosi Locisoko Cakulu vo Filiale, oco va kuatise kueci olomisionaliu vi sukila ndeci, ocitumãlo cimue coku kala, oku tata uhayele wavo kuenda ekuatiso limue litito oco va li tekule. Vokuenda kunyamo wupange 2020, Olombangi Via Yehova via pesela 27 kolohuluwa violondolale oco vi kuatise olomisionaliu. Omo liekuatiso liaco, olomisionaliu via tiamisila utima kuenda ongusu yavo kupange woku kunda loku pamisa ekongelo va tumiwa.

Olomisionaliu vi kasi vovikanjo, vi kuatisa ndati kupange woku kunda? Frank Madsen o panga onepa Kocisoko Cakulu vo Filiale ko Malawi wa popia hati: “Olomisionaliu lutõi kuenda uloño wavo, va kuatisa akongelo oku fetika oku talavaya vovikanjo ka via lelukile. Ndeci, kolokondominiu kuna ka kua lelukile oku iñilako kuenda komanu vo kolofeka va vangula alimi akuavo. Alikolisilo ovo va linga oco va lilongise elimi likuavo kuenda ovituwa viomanu vo pocitumãlo, vi vetiya vakuavo. Ongangu yavo yiwa, yi vetiya amalẽhe oku litumbika kupange wotembo yosi. Tu pandula calua Yehova omo liolomisionaliu via tumiwa vovikanjo.”

Manji umue wo kofeka yikuavo o panga onepa Kocisoko Cakulu vo Filiale wa popia hati: “Olomisionaliu uvangi wokuti, afendeli va Yehova va li kuete omunga voluali luosi. Ndaño muẽle omanu vana okuti Halombangiko Via Yehova, va tẽla oku limbuka okuti etu, ka tu kuete olonepele viapata, pole, alongiso Embimbiliya a tu kuatisa oku kala epata limue li likuete omunga.”

Olomisionaliu vi kasi vovikanjo vi kuatisa ndati akundi vo pocitumãlo? Paulo, wo ko Timor-Leste, o pandula calua omo liohueli yimue yolomisionaliu vi kasi vekongelo liavo. Eye hati: “Vocivanja cetu mu linga owuya walua. Ndaño olomisionaliu viaco via tunda kuna ku linga ombambi, ovio ka vi liwekapo oku kunda omo liowuya. Ovio olonjanja viosi komẽle, viya kohongele yupange woku kunda. Nda siata oku va mola okuti va kasi oku linga apasu ekumbi pongunji, eci ku linga owuya walua kuenda koñolosi. Ovio vi kuatisa omanu valua oku kũlĩha ocili, oku kongelamo ame. Ovo vakuambili, va sanjuka kuenda va tumbika omuenyo wavo wosi koku vumba Yehova; kuenje eci ci vetiya vamanji vosi vekongelo oku linga eci va tẽla kupange wa Yehova.”

Ketti okuti ukundi wotembo yosi wo ko Malawi, o lombolola ndomo ohueli yimue yolomisionaliu ya kuatisa epata liaye ndoco: “Eci ovo va tumiwa vekongelo lietu, ame lika nda kala Ombangi ya Yehova vepata liange. Pole, ohueli yaco ya ñuatisa calua kuenda va linga ukamba lepata liange. Ongangu yavo yiwa ya kuatisa omãla vange oku limbuka ndomo tu kuata esanju eci tu vumba Yehova. Ongangu yiwa yolomisionaliu ya vetiya omãla vange vatatu oku litumbika kupange wakundi votembo yosi kuenda ulume wange wa fetika oku endaenda kolohongele.”

Nye ci lingiwa oco ku tatiwe olomisionaliu vi kasi vocikanjo? Vi tatiwa pocakati colombanjaile vi eciwa kupange woku longisa Embimbiliya u kasi oku lingiwa voluali luosi. Oco ku eciwe olombanjaile viaco, kua siata oku kuamiwa olonjila vialua vi sangiwa vonumbi donate.jw.org. Tu pandula calua omo liolombanjaile vi eciwa lutima wosi.