Ociseleko Cimue Calivulu o Pondola Oku Kuata Povaka Ove

“Vanyamo a pita, ka ca lelukile oku sokolola oku tambuila alivulu etu pocakati co internet.” O tava hẽ kolondaka viaco? Ovio via panga onepa kohundo yevetiyo manji Geoffrey Jackson a linga kunyamo 2020 Vulandu #6 Wosungu Yolombangi Via Yehova. Eye wamisako ndoco: Citava okuti cilo tu lipula ndomo nda tua kala poku liyaka lefengi eli, nda ka tua kuatele ocimalẽho ndeci o JW Library. Yehova wa siata oku tu pongiya vokuenda kuanyamo oco tu tẽle oku liyaka locina ndeci.”

Yehova wa siata oku tu pongiya ndati? Upange upi wa lingiwa oco ku sovuiwe o aplikativo JW Library kuenda nye ci sukiliwa oco yamameko loku yi mioñolola?

Ocimalẽho Catete

Kosãi ya Kupemba yunyamo 2013, Osungu Yolombangi Via Yehova ya pinga ku vamanji va panga ocipama co MEPS oco va sovole o aplikativo yimue mu iñila Embimbiliya li Kola—Epongoluilo Lioluali Luokaliye mua lingiwa apongoloko. Paul Willies o talavaya locipama caco co MEPS wa popia hati: “Toke vepuluvi liaco, ka tua kuatele o aplikativo yimue volovenda violo aplikativo. Tua sokiya ocimunga cimue, tua liwekapo oku linga ovopange amue kuenje tua talavaya loloseketa vikuavo, oco tu sovole o aplikativo kuenda olonumbi vi kapiwamo. Tua enda oku likutilila, kuenje lekuatiso lia Yehova, o aplikativo ya sandekiwa kohongele yimue yunyamo, noke liolosãi vitãlo!”

Ocitangi ca kuamamo, oku pongolola o aplikativo yaco oco yi kale ociseleko calivulu okuti, ci kuata alivulu alua, valimi alua. Kosãi ya Susu yunyamo 2015, onepa yalua yalivulu etu kelimi Liongelesi, a kapiwile ale vo aplikativo, noke liolosãi epandu, omanu va ponduile ale oku tapa alivulu aco valimi alua.

Oku upisa kotembo yaco, vamanjetu va mioñolola o aplikativo volonjila via litepa poku vokiyamo olovideo, oku kongela alivulu osi, ovipama vioku yevelela via ngalavaliwa violohongele viekongelo vulala umuamue, loku ecelela okuti, vana va talavaya lo aplikativo yaco, va sanga olonumbi Velivulu Lioku Konomuisa vocinimbu cimue Cembimbiliya.

Oku Amamako Kuo Aplikativo Library

O JW Library yi yikuiwa leci ci soka 8 kolohuluwa viovimalẽho oloneke viosi kuenda eci ci pitahãla 15 kolohuluwa viovimalẽho olosãi viosi! Nye ci sukiliwa oco o aplikativo yamameko oku talavaya ciwa vovimalẽho viaco? Manji Willies wa lombolola ndoco: “O aplikativo yimue, lalimue eteke ya puile. Tu kasi oku amamako oku talavaya oco tu vokiyemo ovina viokaliye loku lingisa okuti, o aplikativo yaco yi kuata esilivilo kuenda oku leluka poku talavaya layo. Omo okuti volovenda violo aplikativo mua siata oku lingiwa apongoloko, tu sukila oku amamako oku semũlũla o aplikativo oco yi likuate lapongoloko olovenda viaco. Tu sukilavo oku amamako loku linga apongoloko vo software yetu ndomo ci likuata letendelo lialivulu etu kuenda ovina via ngalavaliwa vi sangiwa vo JW Library okuti, vi amamako oku livokiya.” Poku tenda alimi osi, cilo vo JW Library, mu sangiwa 200.000 kalivulu, leci ci pitahãla 600.000 kovipama via ngalavaliwa kuenda olovideo!

Oco o aplikativo yamameko oku tambula ekuatiso liaco, ku sukiliwa ovimalẽho vikuavo vio komputador. Va sukilavo oku feta oco va talavaye lovipama vimue vio komputador. Ocipama locipama, ondando yaco yi tẽla 1.500 kolondolale (okuti olombongo vio ko E.U.A) vokuenda kunyamo. Handi vali, unyamo lunyamo ku pesiwa 10.000 kolondolale vio ko (E.U.A) oco ku fetiwe ocipama co MEPS vovimalẽho violonoño via litepa, oco ocipama caco camameko oku talavaya ciwa volo komputador, volotablet kuenda volotelefone.

Oku Tapiwa Kuovina vi Tetelẽla Olombanjaile Via Eciwa

O JW Library, ya tepulula calua olombongo via siata oku pesiwa koku panga alivulu, oku kongela amẽla okuti li kala elivulu limosi kuenda oku a tuma. Ndocindekaise, kũlĩhĩsa okalivulu Konomuisa Ovisonehua Eteke Leteke. Tua panga olokopia vieci ci panda 12 kolohuluwa viokalivulu Konomuisa Ovisonehua Eteke Leteke kunyamo—2013. Pole, kunyamo 2020 tua panga lika olohuluwa vitãlo violokopia viokalivulu kaco—ndaño voluali luosi tu kuete ci pitahãla 700.000 kakundi. Momo lie kua lingiwila epongoloko liaco? Valua pokati ka vamanjetu, va siata oku tanga ovisonehua vieteke leteke vo JW Library.a

“Ocili Okuti, ka yi Sokisiwa”

O JW Library yi kuatisavo volonjila via litepa vana va talavaya layo. Geneviève, o kasi ko Kanada, wa popia okuti, omo lio aplikativo, wa siata oku lilongisa otembo yosi. Wa popiavo ndoco: “Oku popia ocili, nda nda kuatele peka ondunda yalivulu oco ndi lilongise, ndi sima okuti, nda sia tẽlele oku lilongisa oloneke viosi komẽle. Pole, lo aplikativo, ndi kuata peka otablet yange muna muli ovina viosi ndi sukila. Elilongiso liaco, lia pamisa ekolelo liange kuenda ukamba wange la Yehova.”

O aplikativo yaco yi kuete esilivilo lialua ca piãla enene vokuenda kuefengi lio COVID-19. Charlyn, wo ko Estados Unidos wa lombolola ndoco: “Omo lio COVID-19 yi kasi oku lisanduila voluali luosi, sia tambuile peka lalimue pokati kalivulu etu lia sandekiwa ndopo. Pole, vo JW Library, muli cosi tu sukila oco tu amameko oku pamisa ekolelo lietu. Kuenje ndi pandula Yehova omo lieliangiliyo eli liocisola.”

Omanu valua va simavo ndeci Faye, o kasi kofeka yolo Filipina. Eye hati: “Nda siata oku talavaya lo aplikativo eyi yi pamisa oco ndi kuate ukamba wa pama la Yehova. Oco ocina catete ndi tanga lomẽle. Oco ocina ndi yevelela osimbu ndi linga ovopange ange. Oco ocina ndi talavaya laco poku pongiya ohongele. Oco ocina ndi talavaya laco, oco ndi lipongiyile elilongiso liange Liembimbiliya. Omo ndi talela olovideo vepuluvi si kasi oku linga cimue. Ndi tanga ovipama, ale Embimbiliya osimbu ndi kevelela kulala umue. Ocili okuti, ka yi sokisiwa.”

O aplikativo yi kuatisavo kupange woku kunda. Ndeci, manji umue ukãi ko Camarões osimbu a kala kupange woku kunda, wa yonguile oku longisa locisonehua cimue manji ukuavo ukãi a longisa laco olosemana vimue via pita. Pole, eye ka ivalukile ocinimbu caco. Eye wa lombolola ndoco: “Nda ivaluka ondaka yimue yocinimbu caco. Nda yikula o aplikativo, nda iñila ponepa Yembimbiliya loku sanda ondaka yaco. Vepuluvi liaco, nda sanga ocisonehua caco. Poku talavaya lo aplikativo, ndi tẽla oku sanga ovinimbu vialua ndi ivalako olonjanja vimue.”

Olombanjaile viove weca lutima wosi poku kuama olonjila vi lekisiwa vonumbi donate.jw.org, vi ecelela okuti o aplikativo JW Library yamamako loku mioñoluiwa oco yi kuatise vamanjetu voluali luosi. Tu pandula calua omo liocituwa cove coku eca.

Ulandu wo JW Library ka Wivaliwa

1. 

   Kosãi ya Mbalavipembe yunyamo 2013—Vo Aplikativo ya sandekiwa, ya kuatele Embimbiliya li Kola—Epongoluilo Lioluali Luokaliye mua lingiwa apongoloko.

2. 

   Kosãi ya Susu yunyamo 2015—Alivulu akuavo kelimi Liongelesi a kapiwilemo ale, kuenje mua kapiwa alivulu alimi akuavo.

3. 

   Kosãi ya Kuvala yunyamo 2015—Kua vokiyiwa ovimalẽho vioku taya.

4. 

   Kosãi ya Kupemba yunyamo 2016—Kua vokiyiwa onepa olohongele

5. 

   Kosãi ya Kupemba yunyamo 2017—Kua vokiyiwa onepa yoku sonehamo atosi

6. 

   Kosãi ya Cembanima yunyamo 2017—Kua vokiyiwa ekuatiso Liembimbiliya Lielilongiso

7. 

   Kosãi Yelombo yunyamo 2019—Kua vokiyiwa onepa yecelela oku tapa ovipama via ngalavaliwa, oku sika ovideo, kuenda oku iñila volonumbi Vielivulu Lioku Konomuisa.

8. 

   Kosãi ya Susu yunyamo 2021—Kua vokiyiwa ocimalẽho Sanjukili Omuenyo Otembo ka yi Pui!