Yesu wa setukula esunguluko lia Yehova. Eye wa tumiwa palo posi oco a kundile ‘olomeme via nyẽlela vionjo ya Isareli.’ Pole, Yesu wa lekisa esunguluko poku kundila omanu. Ndeci, eteke limue ukãi umue okuti ka kaile u Isareli wo livondela oco a sakule omõlaye ukãi wa kuatiwile “londele ya tema calua.” Yesu lohenda yalua wa linga eci ukãi o pingile kuenje wa sakula omõlaye. (Mat. 15:21-28) Kũlĩhĩsa ulandu ukuavo. Yesu kefetikilo liupange waye woku kunda, wa popia hati: ‘Wosi o ndi likala . . . , ndu ko likalelavo kovaso a Isiange.’ (Mat. 10:33) Anga hẽ wa likala Petulu una wo likalele olonjanja vitatu? Sio. Yesu wa kũlĩhĩle okuti Petulu wa livela omo liovina a lingile kuenda eye wa kala ulume umue ukuekolelo. Noke lia Yesu oku pinduiwa, wa molẽha ku Petulu kuenda citava okuti wo kolisa loku u sapuila okuti wo wecela kuenda u kuetele ocisola. (Luka 24:33, 34) Etu tua siata oku limbuka okuti Yehova Suku kuenda Yesu Kristu vakuesunguluko. Nye ci popiwa catiamẽla kokuetu? Yehova o yongola okuti tu kala vakuesunguluko. w23.07 21 ¶6-7

Nye tu pondola oku lomboluila komanu vakuavo oco va kolele okuti ci ka tẽlisiwa muẽle ocili? Catete, Yehova eye muẽle wa linga ohuminyo yaco. Kelivulu Liesituluilo ku lekisa ndoco: “Una wa tumãla kocalo wa popia hati: ‘Tala! Ovina viosi ndi vi lingisa viokaliye.’” Yehova o kuete olondunge, unene kuenda onjongole yoku tẽlisa ohuminyo yaye. Cavali, Yehova wa kũlĩha okuti eci eye a popia o ka ci linga muẽle. Oco eye a popela hati: “Olondaka evi via koleliwa kuenda viocili . . . Olondaka viaco via tẽlisiwa!” Catatu, lacimue ci pondola oku tateka Yehova oku malusula ocina eye a fetika. Eli olio esunga a popela hati, “Ame Alfa kuenda Ômega.” (Esit. 21:6) Yehova o ka situlula okuti Satana ohembi kuenda wa hongua. Kuenje umue o ku sapuila hati: “Ohuminyo eyi mbili nda yi ka tẽlisiwa,” o pondola oku tanga kuenda oku lombolola Esituluilo 21:5, 6. Lombolola ndomo Yehova a lisila okuti ondaka yaye ya koleliwa kuenda yocili.—Isa. 65:16. w23.11 7 ¶18-19.

Yehova wa linga ohuminyo ku Avirahama eci a kuata 75 kanyamo. Anga hẽ Avirahama wa mola oku tẽlisiwa kuohuminyo yaco? Konepa yimue, oco. Noke yoku yoka olui Ferati kuenda oku talamẽla 25 kanyamo, Avirahama wa mola oku citiwa kuomõlaye Isake. Ca kala ocikomo cimue cinene. Kuenda noke lioku pita vali 60 kanyamo, wa molavo oku citiwa kuolonekulu viaye Esau la Yakoba. (Va Hev. 6:15) Pole, Avirahama ka muile ocitumbulukila caye oku linga ofeka yinene kuenda oku piñala Ofeka Yohuminyo. Ndaño ndoco, ulume waco ukuekolelo wamamako oku kuata ukamba wa pama Lululiki waye. (Tia. 2:23) Eci Avirahama a ka pinduiwa, o ka komõha calua poku kũlĩha okuti, omo liekolelo liaye kuenda epandi, olofeka viosi viokilu lieve via sumũlũisiwa! (Efet. 22:18) Nye tu lilongisilako? Pamue ka tu moli olohuminyo viosi via Yehova oku tẽlisiwa cilo lonjila ya suapo. Pole, nda tua kala vakuepandi ndeci Avirahama, tu koleli okuti Yehova o ka tu sumũlũisa cilo kuenda voluali luokaliye.—Mar. 10:29, 30. w23.08 24 ¶14