Anga hẽ wa kuatele onjongole yoku tanga Embimbiliya pole wa liwekapo omo liovisimĩlo ndevi viomanu va tukuiwa ndeti? Komanu valua ka ca lelukile oku tanga Embimbiliya. Pole nye ci popiwa nda wa limbuka okuti Embimbiliya li pondola oku ku kuatisa oku kuata esanju kuenda ekalo liwa komuenyo? Nye ci popiwa nda wa sanga olonumbi vi ku kuatisa oku sola ovolandu a sangiwamo? O yongola hẽ oku kũlĩha ovina o pondola oku li longisa Vembimbiliya?

Tu konomuisi olondaka viomanu vana okuti va kuatisiwa eci va fetika oku tanga Embimbiliya.

Ezekiel, o kuete ci pitãhala 20 kanyamo, wa popia hati: “Kosimbu nda kala ndomunu o kasi oku endisa ekãlu limue pole, ka kũlĩhile oku a loña. Pole oku tanga Embimbiliya kua siata oku ñuatisa oku kuata esanju komuenyo. Vembimbiliya mu sangiwa olonumbi vi pondola oku ñuatisa eteke leteke.”

Frieda, okuti o kuetevo ci pitãhala 20 kanyamo wa lombolola ndoco: “Ame ndukuacinyeñowusa. Pole omo lioku tanga Embimbiliya, nda siata oku lilongisa ndomo ndi likandangiya konyeño. Oku ci linga, ci ñuatisa oku kala ciwa lavakuetu kuenda cilo ñuete akamba valua.”

Ukãi umue o tukuiwa hati Eunice o kuete ci pitãhala 50 kanyamo wa popia ndoco: Embimbiliya, “li kasi oku ñuatisa oku siapo ovituwa ka via sungulukile.”

Ndeci oku tanga Embimbiliya kua siata oku kuatisa omanu va tukuiwa ndeti kuenda omanu vakuavo va siata oku li tanga, Embimbiliya li pondolavo oku ku kuatisa oku kuata esanju komuenyo. (Isaya 48:17, 18) Ca litepa lovina vikuavo ceci okuti, Embimbiliya li pondola oku ku kuatisa (1) Oku nõla onjila yiwa, (2) oku nõla akamba vawa, (3) oku liyaka lasakalalo kuenda (4) ca velapo ceci okuti, olio li pondola oku ku kuatisa oku lilongisa ocili catiamẽla ku Suku. Alungulo Embimbiliya a tunda ku Suku, omo liaco ca sunguluka ove oku kuama olonumbi viaco. Suku lalimue eteke a ka ku ĩha olonumbi vina okuti ka via sungulukile.

Ci kuete esilivilo oku fetika oku tanga Embimbiliya. Olonumbi vipi vi pondola oku ku kuatisa oku fetika kuenda oku kuata esanju poku ci linga?

Nye ci ka ku kuatisa oku sanjukila oku tanga Embimbiliya kuenda oku sola ulandu u sangiwamo? Kulĩhĩsa olonumbi vitãlo via siata oku kuatisa omanu valua.

WSanda ocitumãlo cimue ca sunguluka. Sanda oku kala pocitumãlo cimue okuti pohã. Yuvula oku kala lovina vi ku tateka oku tiamisila utima kovina o kasi oku tanga. Oku tangela pocitumãlo pali ocinyi ciwa kuenda ofela ya talala ci ku kuatisavo oku

Kuata onjongole yoku lilongisa. Omo okuti Embimbiliya li tunda ku Isietu wokilu, o ka kuatisiwa nda wa kuata ocituwa ndeci comõla umue o yongola oku lilongisila kolonjali viaye. Nda o kuete ovisimĩlo ka via sungulukile viatiamẽla Kembimbiliya, yuvula ovisimĩlo viaco kuenda ecelela okuti Suku oku longisa.—Osamo 25:4.

Osimbu kua fetikile oku li tanga likutilila. Vembimbiliya mu sangiwa ovisimĩlo via Suku, omo liaco ka ci komõhisa okuti tu sukila ekuatiso liaye oco tu kuate elomboloko liwa. Suku o likuminya oku eca “espiritu sandu ku vana vo pinga.” (Luka 11:13) Espiritu Sandu li pondola oku ku kuatisa oku kuata elomboloko liovisimĩlo via Suku. Kuenje vokuenda kuotembo olio li ka ku kuatisa oku kũlĩha “ovina via longa via Suku.”—1 Va Korindo 2:10.

Poku li tanga sanda oku kuata elomboloko. Ku ka tange lika locimãho coku tẽlisa ovipama. Sokolola ovina o kasi loku tanga. Lipula ndoco. ‘Ovituwa vipi omunu wa tukuiwa vulandu nda tanga a kuatele? Ndi kapako ndati ulandu waco komuenyo wange?’

Kuata ovimãho via sunguluka. Oco o kuatisiwe poku tanga Embimbiliya, kuata ocimãho coku lilongisa ocina cimue ci pondola oku ku kuatisa komuenyo wove. O pondola oku tumbika ovimãho ndevi: ‘Njongola oku lilongisa ovina vialua viatiamẽla ku Suku.’ ‘Njongola oku kala omunu umue uwa ale oku kala ohueli yimue yiwa.’ Nõla ovipama Viembimbiliya vi ka ku kuatisa oku tẽlisa ovimãho viaco.a

Olonumbi evi vitãlo vi ka ku kuatisa oku fetika. Pole, nye o sukila oku linga oco o sole ovina o tanga? Ocipama ci kuãimo ceca olonumbi vimue.

Lia tatama? Ale li kavuluisa? Oku tanga Embimbiliya oku tenda ndati? Cosi ca tamba lika kesokiyo wa linga lioku li tanga. Tu konomuisi ndomo o pondola oku vokiya onjongole yove yoku tanga Embimbiliya.

Nõla Embimbiliya li kuete upopi wa leluka oku kuata elomboloko. Nda okuti o kasi oku tanga elivulu limue li kuete olondaka vimue okuti kua vi kũlĩhĩle, ku kuata onjongole yoku tanga ulandu waco. Sanda Embimbiliya limue li kuete upopi wa leluka okuti u ka vetiya utima wove. Omo liaco, o sukila oku sandiliya lutate Embimbiliya lina okuti lia pongoluiwa ciwa.a

Talavaya lovoloño o kaliye. Koloneke vilo ka tu pondola lika oku tanga Embimbiliya peka ndelivulu limue. Ambimbiliya amue tu pondola oku a tangela vo Internet ale oku a tapa loku a tangela vo kombutador, vo tablet ale votelefone. Vambimbiliya amue mu sangiwa ovipama vi ku ecelela oku konomuisa ovinimbu vikuavo Viembimbiliya vosapi yimuamue ale oku a sokisa Lambimbiliya akuavo. Nda o yongola oku yevelela oku tangiwa kualio, okuti ku li kuata peka, kulivo Ambimbiliya a ngalavaliwa. Omanu valua va sanjukila oku yevelela osimbu va kasi vokalela oku linga ungende umue, oku sukula ale oku linga upange umue u va ecelela oku yevelela. Momo lie ku setekela onjila yi li kuata lekalo liove?

Talavaya lovimãleho vikuavo vioku lilongisa Embimbiliya. Ovimãleho vioku lilongisa Embimbiliya vi pondola oku ku kuatisa oku upa esilivilo kovina o tanga. Kuli olomapa vi lekisa olofeka via tukuiwa Vembimbiliya vi ku kuatisa oku limbuka ovitumãlo kua pita ulandu o kasi oku tanga. Ovipama ndevi via tukuiwa vorevista yilo ale vievi vi sangiwa vonumbi yetu yo Internet jw.org losapi hati, “Alongiso Embimbiliya,” vi pondola oku ku kuatisa oku kuata elomboloko liolonepa vialua Viembimbiliya.

Seteka Olonjila Vikuavo. Nda okuti ka ca lelukile kokuove oku tanga Embimbiliya oku upisa kefetikilo toke kesulilo lialio, momo lie ku fetikila lonepa yimue yi ku vetiya? Citava okuti o pondola oku fetikila oku tanga ovolandu omanu va kemãla va tukuiwa Vembimbiliya. Onumbi yimue ya leluka, yi sangiwa vokakasia losapi hati: “Kũlĩha Omuenyo Womanu va Kemãla va Tukuiwa Vembimbiliya.” Ale citava okuti o yongola oku tanga Embimbiliya osapi losapi ale ulandu lulandu Momo lie ku setekela onjila yaco?

Embimbiliya elivulu limue li kuete esilivilo. Mu sangiwa olonumbi Viululiki wetu. (2 Timoteo 3:16) Esapulo liaco li pondola oku vetiya utima wetu. Omo liaco, Embimbiliya li popia hati: “Ondaka ya Suku yi kasi lomuenyo kuenda yi kuete unene.” (Va Heveru 4:12) Olio li kuete unene woku pongolola ekalo liomuenyo wetu volonepa vivali: Poku tu ĩha olonumbi vi songuila omuenyo eteke leteke, kuenda li tu kuatisa oku kũlĩha Suku kuenda olohuminyo viaye.—1 Timoteo 4:8; Tiago 4:8.

Oku pongolola ekalo liomuenyo wove cilo. Embimbiliya li pondola oku kuatisa kovina omunu lomunu a sukila. Olio li eca olonumbi viwa viatiamẽla.

• Koku kuata ukamba lomanu vakuavo. —Va Efeso 4:31, 32; 5:22, 25, 28, 33.

• Koku kuata uhayele kovisimĩlo kuenda ketimba.—Osamo 37:8; Olosapo 17:22.

• Kovituwa.—1 Va Korindo 6:9, 10.

• Koku kuata olombongo.—Olosapo 10:4; 28:19; Va Efeso 4:28.a

Ohueli yimue kofeka yo Asia okuti ndopo via kuela, via sanjukila esilivilo liolonumbi vi sangiwa Vembimbiliya. Ndeci ca siata volohueli vina okuti ndopo via kuela, ovo va liyaka lovituwa via litepa va kuata, kuenda ndomo va pondola oku kuata ocituwa ciwa coku sapela. Pole ovo va fetika oku kapako ovina va tanga Vembimbiliya. Onima yipi va kuata? Ulume o tukuiwa hati Vicent, wa popia hati: “Ovina nda tanga Vembimbiliya via ndi kuatisa oku lekisa ocisola poku liyaka lovitangi volohuela vietu. Oku kapako olonumbi Viembimbiliya, ca tu kuatisa oku kuata omuenyo umue wesanju.” Ukãi waye o tukuiwa hati, Annalou, wa popiavo hati: “Oku tanga ovolandu Embimbiliya ca tu kuatisa. Cilo ndi kuete esanju volohuela lovimãho vietu komuenyo.”

Oku kũlĩha Suku. Vicent ka lomboluile lika ovina viatiamẽla volohuela, pole, wa popiavo hati: “Poku tanga Embimbiliya, ndi kuete ukamba uwa la Yehova okuti kosimbu ci sule.” Olondaka via Vicent vi tiamisiwila ketosi limue li kuete esilivilo liokuti, Embimbiliya li pondola oku ku kuatisa oku kuata ukamba la Suku. Poku ci linga, ku ka kuatisiwa lika lolonumbi viaye pole, o ka limbuka okuti o pondola oku u kũlĩha ndekamba limue. Kuenda o ka limbukavo okuti eye o situlula ovina viatiamẽla kekalo liwa liokovaso yoloneke, kotembo yimue okuti o ka kuata ‘omuenyo wocili’ una u ka kala otembo ka yi pui. (1 Timoteo 6:19) Ka kuli elivulu limue likuavo li pondola oku lombolola ovina viaco.

Nda okuti wa fetika oku tanga Embimbiliya, ku ka liwekepo, momo poku ci linga o ka kuatavo asumũlũho aco ndeci, oku kuata ekalo liwa komuenyo cilo kuenda oku kuata ukamba uwa la Suku. Pole, osimbu o tanga Embimbiliya citava okuti o ka kuata apulilo alua. Nda wa kuata apulilo, sokolola ongangu yiwa ya kalei wo ko Etiopia wa kala komuenyo ci soka 2.000 kanyamo kosimbu. Eye wa kuata apulilo alua atiamẽla Kembimbiliya. Eci vo pula nda ovina a kala oku tanga vio lomboloka, eye wa tambulula hati: “Vi ndomboloka ndati nda ka pali laumue o ci ndomboluila?”b Eye wa tava ekuatiso lia Filipu omunu umue wa loñolohẽle koku longisa Embimbiliya okuti wa kala ondonge ya Yesu. (Ovilinga 8:30, 31, 34) Cimuamue haico okuti, nda o yongola oku kũlĩha ovina vialua viatiamẽla Kembimbiliya, tu ku vetiya oku linga epingilo liove vo www.pr418.com ale oku soneha vonumbi yi vorevista yilo. O pondolavo oku sanda Olombangi via Yehova vi kasi posongo yove ale oku enda Vonjango yimue Yusoma yi kasi ocipepi lonjo yove. Momo lie ku fetikila oku tanga Embimbiliya etali loku ecelela okuti li ku kuatisa oku kuata ekalo liwa komuenyo??