Yehova o tu Lembeleka Kohali Yetu Yosi

1, 2. Yehova o tu lembeleka ndati kohali yetu kuenda ohuminyo yipi tu pondola oku sanga Vondaka yaye?

MANJI umue umalẽhe, wa kala oku sokolola kolondaka vi sangiwa kukanda 1 Va Korindo 7:28, vi lekisa okuti “vana va kuela va laika oku tala ohali yoketimba.” Noke umalẽhe waco wa sapela lukulu umue wekongelo okuti, ohueli yimue ya kuka kuenje wa pula kokuaye hati: “Nye ci lomboloka ‘ohali’ yaco kuenda ndi ka liyaka ndati layo eci ndi ka kuela?” Osimbu ukulu wekongelo ka tambuluile epulilo liaco, wa sapela lumalẽhe waco oco a sokolole eci catiamẽla kolondaka viupostolo Paulu wa soneha hati: Yehova eye “Suku yelembeleko liosi, una o tu lembeleka kohali yetu yosi,” ale kovitangi.​—2 Va Korindo 1:3, 4.

² Tua kũlĩha okuti Yehova isietu, o tu kuetele ocisola kuenda o tu lembeleka eci tu liyaka lovitangi. Citava okuti, ivaluka otembo yimue eci Yehova a ku kuatisa kuenda wa ku songuila lekuatiso Liondaka yaye. Tu pondola oku kolela okuti, eye o yongola oku tu kuatisa ndeci a linga lafendeli vaye vo kosimbu.​—Tanga Yeremiya 29:11, 12.

3. Apulilo api tu tambulula vocipama cilo?

³ Ocili okuti, ca leluka oku pandikisa kovitangi kuenda kohali nda tua kũlĩha eci ca koka ovina viaco. Momo lie pamue tu liyakela lovitangi volohuela ale vepata lietu? Ovolandu api o kosimbu kuenda o koloneke vilo a pondola oku tu kuatisa oku sanga elembeleko tu sukila? Tu tambululi apulilo a lingiwa ndeti oco tu limbuke ndomo tu pondola oku pandikisa kohali.

OVITANGI VOLOHUELA

4, 5. Ovitangi vipi olohueli vi pondola oku liyaka lavio?

⁴ Eci Yehova a lulika ukãi watete, wo nena kulume oco a linge ukãi waye. Noke Yehova wa popia hati: “Oco ulume o sia isiaye la inaye hã ha litokeka lukãi waye, kuenje va linga etimba limuamue.” (Efetikilo 2:24) Ocili okuti, vosi yetu koloneke vilo ka tua lipuile. (Va Roma 3:23) Eli olio esunga lieci okuti, eci ulume lukãi va kuela va lavoka oku liyaka lovitangi. Ukãi osimbu ka kuelele, wa sukilile oku pokola kolonjali viaye. Pole, Ondaka ya Suku yi popia okuti noke yolohuela ulume o linga utue wukãi waye. (1 Va Korindo 11:3) Kefetikilo ka ci leluka kulume oku songuila ukãi waye. Omo okuti ukãi wa enda lika oku pokola kolonjali viaye, citava okuti ka ci leluka kokuaye oku tava oku songuiwa lulume waye. Handi vali, eci ulume lukãi va kuela citava okuti pokati kolohueli pa kala ovitangi omo liolondatembo kuenje ovina viaco vi pondola oku nena ohali.

⁵ Sokololavo ndomo ulume lukãi va li yeva eci va limbuka okuti va lavoka oku cita oñaña. Ndaño okuti va pondola oku kuata esanju lialua pole, ci pondolavo oku va nenela esakalalo. Citava okuti, ovo va kuata esakalalo nda oñaña yaco yi ka citiwa ciwa kuenda nda yi ka kuata uhayele. Ovo va kũlĩha okuti va ka sukila olombongo vioku tekula oñaña yaco. Eci omõla a citiwa, ohueli yi sukila oku linga apongoloko akuavo. Citava okuti, ina o pita otembo yalua poku tata oñaña. Kuenje ulume lukãi ka va kuata vali otembo yalua yoku sapela ndeci va lingaile kosimbu. Isia o ka kuatavo ovikele vialua. Eye o sukila oku eca kukãi kuenda komõlaye ovina viosi va sukila.

6-8. Olohueli vi liyeva ndati nda vakuete ocitangi cuyali?

⁶ Olohueli vimue via siata oku liyaka lovitangi vikuavo. Ovo va yongola oku cita omãla pole, va kuete ocitangi cuyali. Nda ukãi ka mina, o sumua calua. (Olosapo 13:12) Kosimbu, ca kuatele esilivilo kakãi oku kuele kuenda oku cita omãla. Eli olio esunga lieci Rahele ukãi wa Yakoba a yevela esumuo lialua eci a limbuka okuti ka ponduile oku mina, pole, manjaye ukãi wa ponduile oku mina. (Efetikilo 30:1, 2) Kolofeka vimue koloneke vilo, omanu valua va tava kocisimĩlo cokuti okucita omãla valua ci kuete esilivilo lia velapo. Olonjanja vialua omanu va siata oku pula vamanji olomisionaliu va kasi volofeka viaco, esunga lieci ka va kuetele omãla. Ndaño okuti va likolisilako oku va lomboluila esunga lieci ka va kuetele omãla, omanu vamue va popia vati, “Nda oco ocitangi cene, tu vu kongeli volohutililo vietu!”

⁷ Konomuisa ulandu ukuavo. Manji umue ukãi kofeka yo Inglaterra wa kuatele onjongole yoku cita omãla. Eci a limbuka okuti lalimue eteke a ka cita omãla voluali lulo, wa yeva esumuo lialua. Noke eye lulume waye va nõlapo oku tekula omõla umue wokatumba. Pole, eye wa yeva esumuo vokuenda kuotembo yimue. Eye wa popia hati: “Nda limbuka okuti oku tekula omõla wokatumba ka ca li sokele loku tekula omõla wove muẽle.”

⁸ Embimbiliya li popia okuti ukãi “o popeliwa omo a cita omãla.” (1 Timoteo 2:15) Pole, eci ka ci lomboloka okuti ukãi o ka kuata lika omuenyo ko pui omo lioku cita omãla. Oco hẽ ocinimbu eci ci lomboloka nye? Onjali yukãi, yi kuete ovina vialua vioku linga omo lioku tata omãla kuenda onjo yaye. Oku li tumbika kovina viaco ci ko kuatisa oku yuvula oku popia olombonde kuenda oku litenga vovitangi viomanu vakuavo. (1 Timoteo 5:13) Ndaño wa yuvula oku linga ovina viaco citava okuti, o ka kuata ovitangi volohuela kuenda vepata.

9. Ovitangi vipi vikuavo omanu vana va kuele va pondola oku liyaka lavio?

⁹ Pokati kovitangi olohueli vimue via siata oku liyaka lavio, olofa viohueli yavo. Ndaño okuti ovo lalimue eteke va lavokaile oku liyaka locitangi caco pole, va sukila oku pandikisa poku liyaka locitangi caco. Akristão vocili va kolela kohuminyo yepinduko kuenje eci ca siata oku va lembeleka calua. (Yoano 5:28, 29) Isietu Yehova Vondaka yaye, wa linga olohuminyo vialua vi tu lembeleka kotembo yohali. Cilo tu konomuisi ndomo afendeli vamue va Yehova va lembelekiwa kuenda ndomo va siata oku kuatisiwa.

ELEMBELEKO POKU LIYAKA LOVITANGI

10. Hana wa lembelikiwa ndati? (Tala ociluvialuvia kefetikilo liocipama cilo.)

¹⁰ Konomuisa eci ca pita la Hana, ukãi wa soliwile calua la Elikana. Eye wa yonguile oku cita omõla pole, wa kuata ocitangi cuyali. Sepakãi yaye Penina wa kuata omãla valua. (Tanga 1 Samuele 1:4-7.) Omo liaco, Penina wa enda oku pembula Hana ‘ulima lulima’ omo liocitangi caco. Ovina viaco via sumuisa calua Hana. Nye linga oco a sange elembeleko? Eye wa enda oku likutilila ku Yehova. Handi vali, Hana wa enda kocitumãlo cimue coku fendela Yehova kuenda wa likutilila vokuenda kuotembo yalua. Eye wa pinga ku Yehova oco a ece kokuaye omõla kuenda wa kolelele okuti Yehova wa laikele oku u kuatisa. Eci a mala oku likutilila wa yeva ekavuluko kuenda ‘ocipala caye ka ca sumuile vali.’ (1 Samuele 1:12, 17, 18) Eye wa kũlĩhĩle okuti Yehova wa laikele oku eca kokuaye omõla ale oku u lembeleka lonjila yimue yikuavo.

11. Ohutililo yi pondola oku tu lembeleka ndati?

¹¹ Omo okuti ka tua lipuile kuenda tu kasi voluali lua Satana, tu ka amamako oku liyaka lohali. (1 Yoano 5:19) Pole, tu kuete ekuatiso. Tu pondola oku likutilila ku Yehova, “Suku yelembeleko liosi.” Eci oco Hana a linga. Eye wa sapuila ku Yehova ndomo a kala oku liyeva kuenda wa pinga oco o kuatise. Cimuamue haico okuti, eci tu liyaka lovitangi ka tu sukila lika oku sapuila Yehova ovitangi tu kasi oku liyaka lavio. Pole, tu sukilavo oku pinga kokuaye ekuatiso kuenda loku u sapuila ovina vi tu sakalaisa.​—Va Filipoi 4:6, 7.

12. Nye ca kuatisa Hana oku kuata esanju ndaño lohali a kala oku liyaka layo?

¹² Ocili okuti tu sumua calua nda tu kuete ocitangi cuyali ale tu kasi oku liyaka lesumuo omo liolofa viomunu umue tu sole. Pole, ndaño lovitangi viaco tu pondola oku sanga elembeleko. Konomuisa ulandu wa Hana wa kala kotembo ya Yesu. Eci pa pita epandu vali kanyamo noke liolohuela viaye, ulume waye wa fa. Citava okuti, eye ka kuatele omõla. Nye co kuatisa? “Eye wa kala kala vonembele otembo yosi.” Eci a kuata 84 kanyamo lopo wa amamako oku endaenda vonembele oku likutilila kuenda oku fendela Yehova. (Luka 2:37) Oku linga ovina viaco co lembeleka kuenda co kuatisa oku kuata esanju ndaño lovitangi a kala oku liyaka layo.

13. Akamba vetu vocili va pondola oku tu lembeleka ndati nda vakuepata lietu va tu sumuisa?

¹³ Tu pondolavo oku lembelekiwa lakamba vocili tu sanga vekongelo. (Olosapo 18:24) Eci manji Paula a kuata ci soka anyamo atãlo ina yaye wa liwekapo oku vumba Yehova. Manji Paula wa sumuile calua kuenda ka ca lelukile kokuaye. Pole, manji umue ukãi ukundi wotembo yosi o tukuiwa hati, Ann wo vetiya kuenda wa lekisa onjongole kokuaye. Manji Paula wa lombolola ndoco: “Ndaño okuti, manji Ann ka kaile epata liange, pole, nda limbuka okuti eye wa ndi solele calua omo lioku nyĩha ekuatiso liaco. Ekuatiso liaco lia ndi vetiya oku amamako oku vumba Yehova.” Noke ina ya manji Paula wa fetika vali oku vumba Yehova kuenje eci ca sanjuisa calua manji Paula. Manji Ann o kuetevo esanju lialua omo lioku kuatisa manji Paula oku amamako oku vumba Yehova.

14. Tu kuatisiwa ndati eci tu lembeleka vakuetu?

¹⁴ Eci tu amamako oku lingila ovina viwa vakuetu, olonjanja vialua tu ivalako ovitangi vietu. Vamanji valua akãi, cikale vana va kuele ale vana ka va kuelele, va kũlĩha okuti eci va kasi oku kunda olondaka viwa Viusoma, va kasi oku talavaya la Yehova kuenda va kasi oku linga ocipango caye. Eci ci va nenela esanju lialua. Ocili okuti, vosi yetu tu pondola oku lekisa okuti tua kapako omanu vakuavo poku va kundila olondaka viwa. Poku lingila vamanjetu ovina vialua, tu pamisa ukamba wetu lavo. (Va Filipoi 2:4) Eci oco upostolo Paulu a linga. Eye wa tata omanu vakuavo “ndeci ina a tata locikembe omãla vaye.” Paulu wa lembeleka kuenda wa vetiyavo vamanji ndeci “isia a linga lomãla vaye.”​—Tanga 1 Va Tesalonike 2:7, 11, 12.

ELEMBELEKO VEPATA

15. Helie o kuete ocikele coku longisa omãla catiamẽla ku Yehova?

¹⁵ Tu lembeleka ndati apata tu kasi lavo vekongelo? Olonjanja vimue, vamanji vana va fetika ndopo oku kunda pamue va tu pinga oco tu va kuatise oku longisa Embimbiliya komãla vavo. Embimbiliya li lekisa okuti, Yehova wa eca kolonjali ocikele coku longisa kuenda oku pindisa omãla vavo. (Olosapo 23:22; Va Efeso 6:1-4) Ndaño okuti olonjanja vimue omanu vakuavo va pondola oku kuatisa pole, ci kuete esilivilo lia velapo olonjali oku pindisa omãla vavo. Olonjali vi sukila oku sapela lomãla vavo olonjanja viosi.

16. Nye tu sukila oku ivaluka poku longisa omãla?

¹⁶ Eci onjali yimue yi tu pinga oco tu longise Embimbiliya komõlaye, tu sukila oku ivaluka okuti ka tu kuete omoko layimue ndeyi yonjali yaco. Olonjanja vimue, ci tava okuti tu longisa Embimbiliya komãla vana okuti olonjali viavo Halombangiko Via Yehova. Eci tu longisa Embimbiliya komãla vana okuti havetuko, ca sunguluka oku va longisila kolonjo viavo vepuluvi lina okuti, olonjali vi kasi konjo ale tu ci linga lika nda pali omunu umue okuti ukulu, ale oku lilongisila pocitumãlo pali omanu valua. Handi vali tu ci lingavo pocitumãlo cimue pali omanu vakuavo. Nda tua ci linga, ka tu ka kokela ocilondokua omanu. Vokuenda kuotembo, pamue olonjali vi ka nõlapo oku longisa omãla vavo eci catiamẽla ku Yehova.

17. Omãla va pondola oku lembeleka ndati omanu vakuavo vepata?

¹⁷ Amalẽhe vana va kasi oku lilongisa oku sola Yehova va pondola oku lembeleka kuenda oku vetiya omanu vakuavo vepata liavo. Ovo va ci linga ndati? Va ci linga poku sumbila olonjali viavo kuenda oku likolisilako oku va kuatisa volonjila via litepa. Handi vali, eci omãla va lekisa ekolelo ku Yehova ci vetiya omanu vakuavo vepata. Osimbu etande ka lieyile, Lameke wa enda oku fendela Yehova. Eye wa popia eci catiamẽla komõlaye Noha hati: “Eye o tu kuatisa okuti posi yina Yehova a siñala pa tunda elembeleko liokupange wovaka etu.” Ocitumasuku eci ca tẽlisiwa noke lietande eci Yehova a malãko evĩho liosi vongongo. (Efetikilo 5:29; 8:21) Koloneke vilo, omãla vana va fendela Yehova va pondolavo oku lembeleka epata liavo. Ovo va kuatisa epata liavo oku pandikisa kovitangi va liyaka lavio cilo kuenda vio kovaso yoloneke.

18. Nye ci tu kuatisa oku pandikisa ndaño lovitangi?

¹⁸ Afedeli va Yehova koloneke vilo, va siata oku lembelekiwa lekuatiso liolohutililo, poku sokolola ovolandu Embimbiliya kuenda poku kuata ukamba uwa la vamanji. (Tanga Osamo 145:18, 19.) Tua kũlĩha okuti Yehova olonjanja viosi, o kuete onjongole yoku tu lembeleka kuenda o ka tu kuatisa oco tu pandikise kohali tua siata oku liyaka layo!