Wa Ci Kũli̇̃ha?

Omanu vo kosimbu va enda oku siakãla ndati ondalu eci va lingaile ovongende?

KELIVULU Liefetikilo kocipama 22, Embimbiliya li lekisa okuti Suku wa sapuila Avirahama oco a ende kocitumãlo cimue ca kala ocipãla lonjo yaye oco a ece ocilumba. Olio li lekisa okuti: “Avirahama wa yelula olohui viocilumba coku pia elisi, wa vi tuika omõlaye Isake; eye wa yenjeka peka liaye ondalu lomoko yaco; kavali kavo va endela pamosi.”—Efetikilo 22:6.

Embimbiliya ka li lombolola ndomo omanu vo kosimbu va enda oku siakãla ondalu. Avirahama la Isake va siakãla ndati ondalu loku yi ambata? Ulume umue ukuakukonomuisa Embimbiliya wa popia hati, citava okuti ondalu yaco ka ya kalele “lulienge vokuenda kungende waco.” Pole, Avirahama lomõlaye va ambatele ovina viosi va sukilile oco va siakãle ondalu.

Pole, omanu vakuavo va popia vati, ka ca lelukile oku siakãla ondalu kotembo yaco. Olonjanja vimue, omanu va ponduile oku siakãla ondalu lekuatiso liekãla limue lia sanya ya kala vulienge wondalu, citava okuti liopiwa pondalu liomunu va lisunguile lavo. Olonoño vialua va sima okuti Avirahama wambataile akãla limue lia sanya olonjanja viosi a enda oku linga ovongende. Citava okuti, ovo va ambatele ondalu yaco vombia yimue yitito yi kuete ukolo umue kuenda wa enda oku ambata ombia yaco osimbu a lingaile ungende. (Isaya 30:14) Noke eci a yonguile oku siakãla, wa enda o kupa akãla aco a sanya loku a kongela lolohũi.