Ocipama 4

Ndomo Opondola Oku Kũlĩha Eci Catiamẽla Ku Suku

Ove opondola oku kũlĩha Yehova velilongiso Liembimbiliya. Otembo yapita konyima Suku wanõla omanu vamue pokati kavalua oco vasonehe ovisimĩlo viaye. Ovisonehua viaco vitukuiwa okuti Embimbiliya. Otembo yilo tukũlĩha Suku omo liokutanga Embimbiliya. Omo okuti Embimbiliya likuete ondaka ya Yehova, ale asapulo, kuenje atukuiwavo okuti Ondaka ya Suku. Etu tupondola okutava eci Embimbiliya litusapuila omo okuti Yehova lalimue eteke akemba. “Suku ka tẽla oku kemba.” (Va Heveru 6:18) Ondaka ya Suku yikuete ocili.​—⁠Yoano17:⁠17.

Embimbiliya onepa yimue yalua yombanjaile Suku atuavela. Likasi ndukanda isia ukuacisola atumisa komõla waye. Litusapuila eci catiamela kohuminyo ya Suku yokupongolola oluali luosi vocitumalo cimue caposoka​—⁠okuti ofeka yelau. Litusapuila eci eye alinga konyima, leci akasi okulinga cilo, kuenda eci akalinga kotembo yo kovaso lomãla vaye vakuekolelo. Litukuatisavo okutetulula ovitangi kuenda okusanga esanju.​—⁠2 Timoteo 3:​16, 17.

Olombangi via Yehova akamba va Suku; ovo vaka kukuatisa okukuata elomboloko lieci Embimbiliya lilongisa. Cinene ño nda wa vangula lavo okuti ove oyongola elilongiso Liembimbiliya. Ovo kava kakupinga olombongo oco ocifetele. (Mateo 10:⁠8) Handi vali, citava okuti wendaendavo kolohongele Viakristão. Eci cilingiwila vovitumalo viefendelo vitukuiwa okuti Olonjango Viusoma. Nda ove wendaenda kolohongele Viakristão, cika kukuatisa okuamako lonjanga yalua ku kũlĩhiso wove watiamela ku Suku.

Ove opondola oku kũlĩha Suku kovilulikilo viaye. Ndeci Embimbiliya litusapuila okuti: “Suku wa sovola ilu losi.” (Efetikilo 1:⁠1) Eci Yehova alulika “ovailu,” eye wapanga ekumbi. Olio litusapuila nye catiamela ku Suku? Eci cilekisa kokuetu okuti Yehova okuete unene wapiãla. Eye lika opondola okupanga ovina viavelapo kunene ndeci ekumbi. Litusapuilavo okuti Yehova onoño, omo liaco te lika luloño okupanga ekumbi, lina lieca owuha lociñi kuenda lalimue eteke liatamele ondalu.

Ovilulikilo via Yehova vilekisa okuti eye otukuetele ocisola. Sokolola eci catiamẽla kapako añi añi asangiwa palo posi. Yehova wapondola lutate okusuisapo apako akahandangala alikasi omo lietu​—⁠ale lacimue akambisako. Puãi, Yehova watuiha apako añi añi alikasi okuti atepisiwa kovisetahãi, kunene, kavala kuenda vepepo. Eci cilekisa okuti Yehova eye Suku ka kuete lika ocisola pole okuetevo ocituwa cokueca kuenda ukuonate.​—⁠Olosamo 104:24.