Upi Ongangu Kovaprofeto—Yoeli
1. Tu kuama ndati umbombe wa Yoeli poku kunda?
1 Helie wa kala uprofeto Yoeli? Eye wa li situlula hati, wa kala “omõla a Petueli.” (Yoeli 1:1) Omo okuti wa kala embombe, ka situluile esapulo liaye muẽle pole, wa situlula esapulo lia Yehova. Cimuamue haico tu sukila oku linga okuti, poku kundila omanu, tu tiamisila esapulo liaco ku Yehova kuenda Kembimbiliya. (1 Va Kor. 9:16; 2 Va Kor. 3:5) Handi vali, tu pondola oku pamisiwa lesapulo tu kunda. Ovina vipi viocitumasuku ca Yoeli vi tu kuatisa oku kuata ombili lelavoko koloneke vilo?
2. Oku iya kueteke lia Yehova ku tu vetiya oku linga nye?
2 “Eteke Lia Yehova li Kasi Ocipepi.” (Yoeli 1:15): Ndaño okuti tunde eci olondaka evi via sonehĩwa pa pita ale anyamo alua, pole, tu kasi kotembo yoku tẽlisiwa kuolondaka viaco. Ovina vĩvi tua siata oku mola voluali lulo, ndeci: Omanu vamue tu sanga vocikanjo cetu okuti ka va lekisa onjongole kesapulo tu kunda, kuenda vana va pembula esapulo liaco, vi lekisa okuti tu kasi koloneke via sulako. (2 Tim. 3:1-5; 2 Pet. 3:3, 4) Oku sokolola okuti tu kasi koloneke via sulako, ci tu vetiya oku velisapo upange woku kunda.—2 Pet. 3: 11, 12.
3. Momo lie upange woku kunda u kuetele esilivilo osimbu tu lavoka ohali ya piãla?
3 ‘Yehova o ka Kala Ocikolo Cafendeli Vaye’ (Yoeli 3:16): Ondaka ocikolo ya tukuiwa vocinimbu eci, yi lekisa enyolẽho Yehova a ka nena vokuenda kuohali ya piãla. Oku kũlĩha okuti Yehova o ka popela afendeli vaye vakuekolelo vokuenda kuotembo yaco, ci tu lembeleka calua. (Esit. 7: 9, 14) Nda tua li tumbika kupange woku kunda, tu limbuka ndomo Yehova a siata oku tu kuatisa loku pamisa ekolelo lietu vokuenda kuohali ya piãla.
4. Momo lie tu kuetele esanju omo liovina tu lavoka kovaso yoloneke?
4 Ndaño okuti esapulo lia Yoeli lia sumuisile omanu vamue, pole, lieca elavoko kafendeli va Suku. (Yoeli 2: 32) Omo liaco, tu lekisi epandi omo liovina vi keya kovaso yoloneke, kuenda tu kuati ombili kupange woku kunda Usoma wa Suku, ndomo ca tukuiwa kelivulu lia Yoeli 2:23 ku popia hati: “Sanjukili Yehova Suku yene.”