‘Longisi Omanu Oku Linga Ovina Viosi Ndo Kundiki’

“Kuendi, ka tavisi olofeka viosi oco va linge olondonge. . . .Va longisi oku linga ovina viosi ndo kundiki.”​—⁠MATEO 28:​19, 20.

1. Ombangulo yipi ya kala pokati kulume u Etiopia la Filipu?

ULUME umue u Etiopia, wa enda ungende unene toke ko Yerusalãi. Eci a pitilako, wa fendela Yehova. Eye wa solele calua Yehova. Kuenda wa solelevo Ondaka Yaye yi kola. Poku tiuka, wa tumãla vekãlu liaye, kuenje wa fetika oku tanga ocisonehua cuprofeto Isaya. Filipu wa katuka oku ka ñualehela laye. Eci o sanga, wo pula hati: “Eci o kasi loku tanga hẽ, ca ku lomboloka?” Ulume wa tambulula hati: “Ci ndomboloka ndati nda lomue o ndomboluila?” Noke Filipu wa likolisilako oku u kuatisa oco a linge ondonge ya Kristu.​—⁠Ovilinga 8:​26-39.

2. (a) Nye tu popela hati etambululo lia eciwa lulume u Etiopia liwa? (b) Apulilo api atiamẽla kocikundi Kristu a eca kolondonge viaye tuka konomuisa?

² Ulume u Etiopia wa eca etambululo limue liwa hati: “Ci ndomboloka ndati nda lomue o ndomboluila?” Eye wa yonguile okuti umue u lomboluila eci a kala loku tanga. Olondaka evi vi lekisa esilivilo lionumbi yimue Yesu a kongela vocikundi a eca kolondonge viaye. Onumbi yaco hẽ yipi? Oco tu sange etambululo, tu konomusi olondaka via Yesu vi sangiwa kelivulu lia Mateo ocipama 28. Vocipama tua lilongisa tete tua konomuisa apulilo avali. Liatete lieli: Momo lie tu sukilila oku pokola kocikundi ca eciwa la Kristu? Liavali hati: Pi tu kundila? Kaliye tuka konomuisa apulilo a sialeleko. Liatete lieli: Nye tu kunda? Kuenda upange waco u kamamako toke otembo yipi?

“Va Longisi Oku Linga Ovina Viosi Ndo Kundiki”

3. (a) Omunu o linga ndati ondonge ya Yesu Kristu? (b) Voku longisa omanu oco va linge olondonge mua kongela nye?

³ Nye tu longisa komanu oco va linge olondonge via Kristu? Yesu wa handeleka olondonge viaye hati: “Kuendi, ka tavisi olofeka viosi oco va linge olondonge. Va papatisili vonduko ya Tate la Mõla, kuenda espiritu sandu. Va longisi oku linga ovina viosi ndo kundiki.” (Mateo 28:​19, 20) Omo liaco, tu sukila oku longisa omanu eci Kristu a tu kundika.a Oco hẽ, nye cika tu kuatisa oco omanu tu longisa eci Yesu a tu kundika vamameko loku pandikisa okuti ka va konyoha? Cimue cika tu kuatisa, oku konomuisa olondaka via Yesu. Yesu ka popele ño hati ‘va longisi ovina viosi ndo kundiki.’ Pole, wa popiavo hati: ‘Va longisi oku linga ovina viosi ndo kundiki.’ (Mateo 19:​17) Eci ci lomboloka nye?

4. (a) Oku longisa omunu oku linga cimue ci lomboloka nye? (b) Lombolola ndomo tu longisa omunu oku linga eci Kristu a tu kundika.

⁴ Oku longisa omunu oku linga cimue, ci lomboloka oku u kuatisa oku pokola oco ‘ovilinga viaye vi likuate’ leci a longisiwa. Oco hẽ, tu longisa ndati omanu oku pokola kovina Kristu a tu kundika? Tu konomuisi ndomo ulongisi wava va endisa ekãlu a longisa olondonge viaye. Kosikola eye o longisa olondonge viaye ovihandeleko vioku endisa. Pole poku kuatisa olondonge viaye oku linga eci a va longisa, eye enda lavo vetapalo oco va endise. Kuenje o likolisilako oku va kuatisa oku pokola kovihandeleko viatiamẽla koku endisa. Cimuamue haicovo tu sukila oku linga. Eci tu longisa Embimbiliya komanu, tu va longisa eci Kristu a tu kundika. Pole tu sukilavo oku va songuila osimbu va likolisilako oku pokola kolonumbi via Kristu. (Yoano 14:15; 1 Yoano 2:⁠3) Eci ci lekisa okuti oco tu tẽlise ciwa ocikundi cetu coku longisa omanu eci Kristu a tu kundika, tu sukila oku kala alongisi kuenda asongui. Nda tua ci linga, tu ka setukula ongangu ya Yesu kuenda ya Yehova Suku.​—⁠Osamo 48:14; Esituluilo 7:⁠17.

5. Momo lie vamue tu kasi oku longisa Embimbiliya pamue ka va pokuila kocikundi ca Kristu coku kundila omanu?

⁵ Voku longisa omanu oku linga eci Kristu a tu kundika, mua kongela oku va kuatisa oku kapako ocikundi ca Yesu coku kundila omanu. Vamue tu kasi oku longisa Embimbiliya ca va tĩlila oku linga upange woku kunda. Valua okuti eci va kala ketavo Liakristão vesanda va kala vakuambili. Pole alongisi vetavo liaco, ka va va longisile oku kunda. Asongui vamue vetavo va li tavela okuti ka va siatele oku vetiya omanu vakuetavo liavo oku linga upange woku kunda. Ulume umue otukuiwa hati John R. W. Stott wa lombolola eci catiamẽla koku pokola kocikundi ca Yesu coku enda oku ka tavisa omanu vokolofeka viosi oco va linge olondonge. Eye wa popia hati: ‘Oku likala oku longisa omanu oco va pokole kocikundi ca Kristu coku kundila omanu, oco oku lueya kua velapo kua lingiwa lavakuetavo koloneke vilo.’ Eye wamisako hati: ‘Tua siata oku kundila ocipãla. Ka tuendi kolonjo viomanu. Tu kala ndomunu o lete ukuavo o kasi oku enda lovava. Pole ka endiko oku ko popela, omo liusumba woku wila vovava.’

6. (a) Poku kuatisa ondonge tu kasi oku longisa Embimbiliya, tu setukula ndati ongangu ya Filipu? (b) Eci ondonge yi fetika upange woku kunda nye tu sukila oku linga oco tu yi kuatise?

⁶ Omunu tu kasi oku longisa Embimbiliya pamue wa kala ketavo limue okuti omanu vaco va kuete usumba woku kunda. Kuenje pamue usumba waco u tateka oku pokola kocikundi ca Kristu coku kundila omanu. Omo liaco, tu sukila oku kala vakuepandi poku va longisa loku va vetiya oku linga upange waco. Tu sukilavo oku setukula Filipu okuti wa situluila ciwa ovisonehua ulume u Etiopia, okuti co vetiya oku papatisiwa. (Yoano 16:13; Ovilinga 8:​35-​38) Etu ka tu vetiya lika olondonge vietu oco vi pokole kocikundi ca Kristu coku kundila omanu. Pole tu sukilavo oku talavaya lavo eci va fetika oku kunda Usoma. Kuenda oku va songuila ndomo va linga upange waco.​—⁠Ukundi 4:​9, 10; Luka 6:⁠40.

‘Oku Linga Ovina Viosi Yesu a Kundika’

7. Voku longisa olondonge viokaliye“oku linga ovina viosi” mua kongela nye?

⁷ Etu ka tu longisa lika olondonge viokaliye oku kunda. Yesu wa handeleka hati, va longisi “oku linga ovina viosi” ndo kundiki. Vocikundi caco mua kongela ovihandeleko vivali via velapo. Catete, oku sola Suku. Cavali, oku sola vakuetu. (Mateo 22:​37-​39) Ndamupi olondonge viokaliye vi longisiwa oku pokola kovihandeleko viaco evi vivali?

8. Lombolola ndomo ondonge yokaliye yi longisiwa ocihandeleko coku lekisa ocisola.

⁸ Tu sokololi vali ulongisi wava va endisa ekãlu. Osimbu ondonge yendisa, ulongisi o kala ponele yaye. Ondonge ka yi li longisila lika koku yevelela ulongisi waye. Pole, yi li longisilavo koku tala vakuavo va kasivo oku endisa. Ulongisi pamue o lekisa kondonge ndomo ukuavo o kasi oku endisavo ekãlu a pitisa ukuavo una okuti ka kuete omoko yoku pita. Ale o lekisa umue wa tepulula ocinyi cekãlu liaye oco ka ka lingise ahuku vakuavo va kasi okuiya. Ulongisi ci tava okuti u lekisavo umue o kasi oku kuatisa ukuavo o kuete ekãlu liaye lia nyolehẽla vonjila. Ovindekaise viaco, vi longisa kondonge ongangu a sukila oku kuama poku endisa. Cimuamue haico, ondonge yokaliye yi kasi vonjila yomuenyo. Kuenje ka yi lilongisila lika kulongisi. Pole yi lilongisilavo kongangu yiwa ya vamanji vekongelo.​—⁠Mateo 7:​13, 14.

9. Ondonge yokaliye yi lilongisa ndati ocihandeleko coku lekisa ocisola?

⁹ Ondonge pamue yi mõla yimue onjali yi kasi likaliayo yi likolisilako oku iya vonjango Yusoma lokamõla kaye peka. Pamue o mõla umue o kasi oku liyaka lesumuo lialua pole o likolisilako oku iya kolohongele. Ale o mõla umue cimbumba wa kuka o kopilila vakuavo va kukavo oco veye kolohongele. Ale o mõla umue umãlehe o yelisa Vonjango Yusoma. Pamue o mõla umue ukulu wekongelo okuti ndaño o kuete ovikele vialua, o likolisilako oku pita kovaso kupange woku kunda. Ale o mõla umue manji okuti omo lioku vela ka tẽla oku tunda konjo, pole o likolisilako oku kolisa vamanji vo pasuisa. Ale o mõla olohueli vimue vi linga apongoloko anene vomuenyo wavo oco va kuatise olonjali viavo via kuka. Poku tala ongangu yaco yiwa ya vamanji, ondonge yi lilongisa eci ci lomboloka oku pokola kocihandeleko ca Kristu coku sola Suku loku solavo omanu vosi. (Olosapo 24:32; Yoano 13:35; Va Galatia 6:10; 1 Timoteo 5:​4, 8; 1 Petulu 5:​2, 3) Omo liaco, omunu lomunu vekongelo o sukila oku kala ulongisi kuenda usongui.​—⁠Mateo 5:⁠16.

“Toke Kesulilo Lioluali”

10. (a) Toke otembo yipi tu kamamako lupange woku longisa omanu oco va linge olondonge? (b) Ongangu yipi Yesu a tu sila yatiamẽla koku tẽlisa upange tua kundikiwa?

¹⁰ Toke otembo yipi tu kamamako lupange woku longisa omanu oco va linge olondonge? Toke kesulilo lioluali. (Mateo 28:​20) Anga hẽ tuka pondola oku tẽlisa ocikundi Yesu a tu ĩha? Omo tu kasilili vakongelo osi voluali, tua nõlapo muẽle oku ci linga. Vanyamo a pita, tua pesila otembo yetu longusu yetu kuenda ovipako vietu koku sandiliya omanu vana va ‘yongola oku kuata omuenyo ko pui.’ (Ovilinga 13:​48) Koloneke vilo, Olombangi via Yehova via siata oku pesela eci ci pitãhala olohuluwa vitatu kolowola veteke koku kundila omanu oco va linge olondonge. Etu tu kasi oku ci lingila omo okuti tu kuãi ongangu ya Yesu. Eye wa popele hati: “Okulia kuange oku linga ocipango cu wa numa kuenda oku suisapo upange waye.” (Yoano 4:​34) Eyi yi kalevo onjongole yetu. (Yoano 20:​21) Etu ka tu yongola ño oku fetika upange tua kundikiwa. Pole tu yongola oku u tẽlisa.​—⁠Mateo 24:13; Yoano 17:⁠4.

11. Vamue vamanjetu va kasi ndati kespiritu? Kuenda epulilo lipi tu sukila oku lipula?

¹¹ Ci tu sumuisa calua oku limbuka okuti vamue vamanjetu cilo va hongua kespiritu. Kuenje va liwekapo oku pokola kocikundi ca Kristu coku longisa omanu oco va linge olondonge. Kuli hẽ onjila yimue tu kuama oco tu va kuatise oku likongela vali kekongelo loku litumbika vali kupange woku kunda? (Va Roma 15:1; Va Heveru 12:​12) Kosimbu, Yesu wa kuatisile olondonge viaye eci via honguele kespiritu. Kuenje etu ci tava okuti tu kuama ongangu yaye.

Tu Kuatisi Vakuetu

12. (a) Eci olofa via Yesu via kala ocipepi, olondonge viaye vio linga nye? (b) Ndaño okuti olondonge via lekisa ehonguo, lopo Yesu wa va tata ndati?

¹² Eci olofa via Yesu via kala ocipepi, olondonge viaye ‘vio siapo. Kuenje via tila.’ Ndomo Yesu a ci popele, ovo va ‘li sandula. Omunu koliaye, omunu koliaye.’ (Marko 14:50; Yoano 16:​32) Oco hẽ Yesu wa tetulula ndati ocitangi eci coku hongua kuakamba vaye? Eci Yesu a pinduka, wa sapuila vamue pokati kolondonge viaye hati: “Kuendi, ka pañinyi [vamanjange] okuti va ende ko Galilea, kuenje oko va ka muila.” (Mateo 28:​10) Ndaño okuti olondonge via lekisa ehonguo, lopo Yesu wa va tukula hati “vamanjange.” (Mateo 12:​49) Eye ka liwekelepo oku va kolela. Yesu wa setukula Isiaye Yehova. Kuenje wa va linga ohenda kuenda wa va ecela. (2 Olosoma 13:​23) Tu setukula ndati ongangu ya Yesu?

13. Tu sukila oku tenda ndati vana va hongua kespiritu?

¹³ Etu tu sukila oku kuatisa vakuetu vana va kasi lowesi ale vana va liwekapo oku kunda. Handi tu ivaluka ovopange ovo va linga vokuenda kuanyamo. (Va Heveru 6:​10) Kuenda tu kasi longeva yalua lavo. (Luka 15:​4-7; 1 Va  Tesalonike 2:​17) Oco hẽ tu va kuatisa ndati?

14. Tu kuama ndati ongangu ya Yesu poku kuatisa vana va hongua?

¹⁴ Yesu wa sapuila olondonge viaye via sumuile calua hati, kuendi ko Galilea, oko u ka muila. Eye wa va laleka oco va ende kohongele yimue yinene ya kalako. (Mateo 28:​10) Koloneke vilo, etu tu sukilavo oku laleka vana va hongua kespiritu oco va ende kolohongele viekongelo. Nda ka va endele, te tua tiukilako vali toke eci va enda. Ovapostolo va tavele kelaleko lia Yesu. Momo Embimbiliya li tu sapuila hati: “olondonge ekui la mosi via enda ko Galilea toke komunda yina Yesu a va tukuila.” (Mateo 28:​16) Ci tu sanjuisavo calua eci tu laleka umue wa hongua kespiritu kuenje o tava oku iya kolohongele.​—⁠Luka 15:⁠6.

15. Tu kuama ndati ongangu ya Yesu eci umue manjetu wa hongua kespiritu eya vekongelo?

¹⁵ Nye tu sukila oku linga eci vekongelo muiya umue manjetu wa hongua kespiritu? Tu sukila oku kuama ongangu ya Yesu. Eci Yesu a limbuka okuti ovapostolo vana va lekisa ehonguo kespiritu veya pocitumãlo a va tukuilile, “weya kokuavo, wa popia lavo.” (Mateo 28:​18) Eye ka va vanjelele ocipãla. Pole weya ocipepi lavo. Ocili okuti ovapostolo ca va sanjuisa calua eci va limbuka okuti Yesu eye wa fetikako oku vangula lavo. Etu tu sukilavo oku yolela vamanjetu vana va hongua kespiritu eci va likolisilako oku tiuka vekongelo.

16. (a) Nye tu lilongisila kongangu ya Yesu ndomo a tata olondonge viaye eci a li sanga lavio? (b) Tu lekisa ndati ocituwa ndeci ca Yesu coku tata ciwa ava va hongua? (Tala pombuelo yemẽla.)

¹⁶ Nye vali Yesu a linga? Tete wa va sapuila hati: ‘Uviali wosi wa nyihiwa.’ Cavali, wa va ĩha ocikundi hati: “Kuendi, ka tavisi olofeka viosi oco va linge olondonge.” Catatu, wa va likuminya hati: ‘Ame ñasi kumue lene oloneke viosi.’ Ove hẽ o tẽla oku limbuka eci Yesu ka lingile? Yesu ka vetelele evelo olondonge viaye omo lioku hongua kuavo pamue atatahãi avo. (Mateo 28:​17) Oco hẽ eci Yesu a linga ca eca onima yiwa? Ca eca. Momo ka pa pitile otembo yalua ovapostolo va fetika vali oku ‘kunda loku longisa olondaka viwa.’ (Ovilinga 5:​42) Nda tua kuama ongangu ya Yesu yoku tata ciwa ava va hongua kespiritu, tuka mõlavo onima yiwa yi iyililako.b​—⁠Ovilinga 20:⁠35.

‘Ame Ñasi Kumue Lene Oloneke Viosi’

17, 18. Yesu wa popia hati, ‘ame ñasi kumue lene oloneke viosi.’ Elembeleko lipi tu sanga volondaka evi?

¹⁷ Olondaka via sulako via Yesu poku eca ocikundi kolondonge viaye, vievi: ‘Ame ñasi kumue lene oloneke viosi.’ Olondaka evi vi kolisa calua vana va likolisilako oku tẽlisa ocikundi ca Kristu coku kundila omanu. Ndaño ovanyali vetu va katangisa upange wetu woku kunda ale va tu sanguila, ka tu sukila oku kuata usumba. Momo Usongui wetu Yesu, una wa tambula “uviali wosi wokilu lowu wokilu lieve” o kasi letu.

¹⁸ Ohuminyo ya Yesu yokuti ‘ame ñasi kumue lene oloneke viosi’ yi tu lembelekavo eci tu sangiwa lovitangi. Osimbu tu likolisilako oku tẽlisa ocikundi Kristu a tu ĩha, ka tu sangi lika esanju. Puãi tu sangiwavo lovina vi tu sumuisa. (2 Asapulo 6:​29) Vamue pokati ketu va siata oku pita lesumuo lialua omo lioku fisa vangandiavo. (Efetikilo 23:2; Yoano 11:​33-​36) Vakuavo va kasi oku liyaka lolongembia viyilila koku kuka. (Ukundi 12:​1-6) Vamue va kasi oku liyaka lutima wa teka. (1 Va  Tesalonike 5:​14) Kuenda kulivo valua va kasi oku liyaka luhukũi. Pole ndaño lovitangi viaco, upange wetu uka enda ciwa, momo Yesu o kasi kumue letu “oloneke viosi.” Ndaño muẽle koloneke vina viesumuo vomuenyo wetu.​—⁠Mateo 11:​28-30.

19. (a) Vocikundi ca Yesu mua kongela alomboluilo api? (b) Nye ci tu kuatisa oku tẽlisa ocikundi Kristu a tu ĩha?

¹⁹ Ndomo tua mõla ale vocipama ca pita, vocikundi ca Yesu mua kongela alomboluilo akuãla. Eye wa tu sapuila esunga lieci tu sukilila oku pokola kocikundi a tu ĩha. Wa tu sapuilavo oku tu sukila oku kundila. Kuenda eci tu longisa komanu. Wa tu sapuilavo otembo tu sukila oku linga upange waco. Ocili okuti, oku tẽlisa ocikundi eci ka ca lelukile. Pole, omo okuti Kristu, una wa tambula uviali wosi o kasi letu, etu tuka pondola oku tẽlisa ocikundi eci. Ove hẽ wa ci kolela?

[Atosi pombuelo yamẽla]

[Apulilo Elilongiso]

• Tu longisa ndati omanu oku linga eci Yesu a tu kundika?

• Ondonge yokaliye yi lilongisa nye kongangu yiwa ya vamanji vekongelo?

• Nye tu sukila oku linga oco tu kuatise vana va hongua kespiritu?

• Elembeleko lipi tu sanga volondaka via Yesu viokuti, ‘ame ñasi kumue lene oloneke viosi’?

[Elitalatu kemẽla 26]

Tu sukila oku kala alongisi kuenda asongui

[Elitalatu kemẽla 28]

Ondonge yokaliye yi lilongisilavo kongangu yiwa ya vamanji vekongelo