“Akandu Ove A Ecelua”

Omanu vo kolonepa viosi va yeva ale ovina viatiamẽla ku Yesu. Valua va tunda kovitumãlo kupãla kuenje va linga ungende oco va yevelele Yesu kuenda oku mola ovikomo viaye. Noke yoloneke vimue Yesu o tiukila ko Kafarinau kuna a tiamisila upange waye. Ndopo esapulo liokuti Yesu wa tiuka, li lisandula lonjanga komanu va sangiwa valupale a kasi ocipepi Lokalunga ko Galilea. Omo liaco, omanu va enda konjo Yesu a sikĩla. Vamue pokati kavo va Fariseo lalongisi Vovihandeleko okuti, va tunda kolonepa viosi vio Galilea, vo Yudea oku kongelamo o Yerusalãi.

‘Omanu valua va liongoluila vonjo yaco kuenda ka kua kaile evelo ndaño muẽle pepito kuenje Yesu wa fetika oku va longisa olondaka viwa.’ (Marko 2:2) Pole, Yesu o laika oku linga ocina cimue ci komõhisa. Ocina caco ci tu kuatisa oku limbuka okuti Yesu o kuete unene woku malako ohali kuenda o ka eca vali uhayele komanu vosi eye a yongola.

Osimbu Yesu a kasi oku longisa owiñi u kasi vonjo, alume vakuãla vo nenela ulume umue wa fa ovolu okuti wambatiwa pociyalo. Ovo va yongola okuti Yesu o sakula ekamba liavo. Pole, omo liowiñi ovo ka va “tẽlele oku u tuala ku Yesu.” (Marko 2:4) Sokolola esumuo ovo va yeva. Omo liaco, va londa kilu lionjo kuenje va yambulula olusoka, pepangu liaco opo va lowila ociyalo culume wa fa ovimatamata ketimba.

Anga hẽ Yesu o tema omo lialume va tateka oku longisa kuaye? Sio, eye ka temi! Pole, o komõha omo liekolelo liavo kuenje o sapuila ulume wa fa ovolu hati: “Akandu ove a ecelua.” (Mateo 9:2) Anga hẽ Yesu o pondola muẽle oku ecela akandu? Loku lisiõsiõla vakuavisonehua la va Fariseo va livangula pokati vati: “Momo lie ulume u a vanguila ndoco? U wo popia etonãi. Helie o tẽla oku ecela akandu, nda ha Sukuko [umosi] lika?”—Marko 2:7.

Omo okuti Yesu wa kũlĩha ovisimĩlo viavo, o va pula ndoco: “Momo lie vu simĩla ovina evi vovitima viene? Nye ca leluka vali, oku popia kulume wa fa ovolu okuti, ‘Akandu ove a ecelua,’ ale oku popia hati, ‘Votoka, tikula ociyalo cove, enda’?” (Marko 2:8, 9) Omo okuti, Yesu o laika oku eca etimba liaye ndocilumba, eye o pondola oku ecela akandu omanu.

Omo liaco, Yesu o lekisa komanu kuenda kuava va kala oku u pisa okuti, eye o kuete omoko yoku ecela akandu palo posi. Eye o vandekela kulume wa fa ovolu kuenje u handeleka hati: “Ndu ku sapuila siti, Votoka, tikula ociyalo cove, kuende konjo yove.” Vepuluvi liaco, haico ulume a votoka, o tikula ociyalo caye, kuenje o pita kovaso yomanu vosi va kala vonjo. Omanu vosi va komõha kuenje va sivaya Suku, vati: “Ka tua la mola lacimue ca lisoka leci!”—Marko 2:11, 12.

Yesu o sokisa ekandu luvei kuenda ongecelo yakandu loku kuata uhayele. Embimbiliya li tu longisa okuti, isietu watete Adama wa linga ekandu kuenje vosi yetu tua piñala ovitangi vi tunda kekandu okuti, oku vela kuenda oku fa. Pole, Vusoma wa Suku, Yesu o ka ecela akandu omanu vosi va sole Suku la vana vo vumba. Omo liaco, oku vela lalimue eteke ku ka kalako vali.—Va Roma 5:12, 18, 19.