Mateo O Lalekiwa

Pa pita ale otembo yimue tunde eci Yesu a sakula ulume wa fa ovimatamata ketimba kuenje Yesu handi o kasi vimbo lio Kafarinau ocipepi Lokalunga ko Galilea. Owiñi wiya vali kokuaye kuenje o fetika oku va longisa. Osimbu a kala oku enda, o mola Mateo una o tukuiwavo hati Lewi okuti, wa tumãla ponjo yoku fetela elisimu. Yesu u linga elaleko limue lilikasi poku u sapuila hati: “Linga ondonge yange.”—Mateo 9:9.

Ndeci Petulu, Andereu, Tiago kuenda Yoano va kũlĩhĩle amue pokati kalongiso a Yesu kuenda ovilimbu a linga vimbo liaco, citava okuti Mateo wa kũlĩhĩlevo ovina viaco. Mateo lonjanga yalua o tava kelaleko liaco. Eye o lombolola ulandu waco Vevanjeliu liaye poku popia hati: ‘Eye [Mateo] o votoka kuenje o kuama’ Yesu. (Mateo 9:9) Omo liaco, Mateo o siapo ocikele caye coku tambula elisimu kuenje o linga ondonge ya Yesu.

Noke yotembo yimue, citava okuti Mateo poku eca olopandu omo lielaleko lilikasi a tambula ku Yesu, o linga ocipito cimue konjo yaye. Omanu vapi vakuavo va lalekiwa oku kongelamo Yesu kumue lolondonge viaye? Eye o lalekavo vamue pokati kakamba vaye vakuakutambula elisimu. Ovo va enda oku tambula elisimu komanu oco olombongo viaco va viece kasualali vo ko Roma, vana ka va soliwile lomanu. Vupange waco, mua kongelele oku pinga elisimu petapu liolonaviyu, vakãlu ana a enda oku ambata ovina via vakualomĩlu okuti vi pita vatapalo a velapo. Handi vali, va enda oku pinga elisimu kovina via tunda kolofeka vikuavo. Va Yudea va tenda ndati omanu vaco vakuakutambula elisimu? Ovo va va popia lãvi, momo va enda oku nyana omanu, poku va pinga olombongo vialua vielisimu. Pocipito caco pa sangiwavo omanu vakuakandu okuti, va kũlĩhĩwa calua omo liovina vĩvi va lingainga.—Luka 7:37-39

Eci va mola okuti Yesu o kasi lomanu vaco, va Fariseo vamue vakuambambe va pula kolondonge viaye vati: “Momo lie ulongisi wene a lila la vakuakutambula elisimu kuenda vakuakandu?” (Mateo 9:11) Eci Yesu a yeva olondaka viaco o tambulula hati: “Omanu va kuete uhayele ka va sukila ondotolo, te vana va vela. Kuendi, lilongisi eci ci lomboloka: ‘Ndi yongola ohenda ovilumba havioko.’ Momo sieyilile vakuesunga, pole, ndeyilila vakuakandu.” (Mateo 9:12, 13; Hosea 6:6) Va Fariseo ka va kaile vakuacili poku tukula Yesu okuti “ulongisi.” Pole, ndaño ndoco, va pondola oku lilongisa ovina via sunguluka ku Yesu.

Citava okuti, Mateo o laleka omanu vakuakutambula elisimu kuenda vakuakandu konjo yaye, oco va yevelele Yesu loku kuatisiwa londaka ya Suku kuenje “valua pokati kavo vo kuama.” (Marko 2:15) Yesu o yongola oku va kuatisa oco va kuate ukamba uwa la Suku. Ca litepa la va Fariseo ceci okuti, Yesu ka sepuile omanu vaco. Omo liohenda kuenda ocikembe; eye o pondola oku kuatisa vosi vana va vela konepa yespiritu.

Yesu o lekisa ohenda ku vakuakutambula elisimu kuenda ku vakuakandu. Ndaño ka ecelela akandu avo, pole, o lekisa ohenda yimuamue ndeyi a lekisa komanu vana va kala oku vela ketimba. Sokolola ohenda a lekisa eci a lamba ulume wa kuatiwile lovilundu loku u sapuila hati: “Nda panga! Kaya.” (Mateo 8:3) Ka tu sukila hẽ oku setukula ongangu ya Yesu yoku lekisa ohenda poku kuatisa omanu konepa yespiritu?