Momo Lie Olondonge Via Yesu Ka Vi likandangiyila Okulia?

Tunde eci Yesu a linga ocipito co Paskoa yunyamo 30 K.K., pa pita ale olosãi vimue kuenda Yoano Upapatisi haimo a kasilili vokayike. Yoano wa yonguile okuti olondonge viaye vi kala oloñame via Yesu. Pole, havosiko va ci linga.

Osimbu va kala oku panda ko Paskoa yunyamo 31 K.K., olondonge via Yoano vienda ku Yesu kuenje viu pula viti: “Momo lie etu la va Fariseo tu likandangiyila okulia, pole, olondonge viove ka vi likandangiya okulia?” (Mateo 9:14) Va Fariseo va likandangiya okulia ndociholo cetavo. Noke Yesu o tukula olusapo luatiamẽla ku Fariseo umue ukuepela o linga ohutililo yokuti: “A Suku nda pandula omo sia tuwile ndomanu vakuavo . . . Ndi likandangiya okulia olonjanja vivali vosemana.” (Luka 18:11, 12) Citava okuti, olondonge via Yoano vi kuetevo ocituwa coku likandangiya okulia. Ale citava okuti, via kala oku likandangiya okulia omo liesumuo va kuata lia Yoano wa kala vokayike. Kuenje ovio vi lipula esunga lieci olondonge via Yesu ka vi likandangiyila okulia okuti, vi likongele kokuavo kesumuo lieci ca pita la Yoano.

Yesu o va tambulula loku tukula ocindekaise cimue hati: “Akamba va sandombua va sumua hẽ osimbu va kasi la sandombua? Ku iya oloneke eci sandombua ambatiwa kuenje ovo va ka likandangiya okulia.”—Mateo 9:15.

Yoano wa tukula Yesu okuti sandombua. (Yoano 3:28, 29) Omo liaco, osimbu olondonge vi kasi la Yesu, ovio ka vi likandangiya okulia. Vokuenda kuotembo eci Yesu a ka fa, olondonge vi ka sumua kuenda ka vi ka kuata onjongole yoku lia. Pole, eci Yesu a pinduka ku ka pita epongoloko limue linene! Momo ka va ka kuata vali esunga lioku likandangiya okulia omo liesumuo.

Noke Yesu o tukula alusapo avali hati: “Lomue o tongela ocitetele conanga yokaliye kuwalo wosimbu, momo ocitetele cokaliye ci likonya kuenje epangu liaco li li vokiya. Kuenda omanu ka va kapi ovinyu yokaliye vonjeke yocipa ya kuka. Nda va ci linga, onjeke yaco yi tuika kuenda ovinyu yi peseka kuenje onjeke yaco yi nyõleha. Pole, omanu va kapa ovinyu yokaliye vonjeke yokaliye.” (Mateo 9:16, 17) Nye Yesu a yongola oku lombolola?

Yesu o yongola oku kuatisa olondonge via Yoano Upapatisi oco vi kuate elomboloko liokuti, ka vi ka lavoke okuti, olondonge viaye vi kuama vali oviholo viosimbu via va Yudea viatiamẽla koku likandangiya okulia. Yesu keyile oco a vetiye efendelo ka li kuete esilivilo, ale pamue oku li kuama otembo yalua. Efendelo Yesu a kasi oku vetiya, ka lia tiamẽlele konjila va Yudea va kuama koloneke viaco, ale koviholo via tumbikiwa lomanu. Eye ka kasi oku tongela ocitetele conanga yokaliye kuwalo wosimbu, pamue oku kapa ovinyu yokaliye vonjeke yocipa ca kuka.