Vosunangonga Ko Nasara

Omanu ko Nasara va komõha calua. Yesu wa kala kalupindelu vokuenda kueci ci pitãhala unyamo umosi osimbu ka papatisiwile la Yoano. Pole, cilo wa kulĩhĩwa okuti ulume umue o kasi oku linga ovilimbu vialua. Omanu va sangiwa volupale luaco, va yongola okuti, Yesu o linga ovilimbu viaco pokati kavo.

Onjongole yomanu yoku mola ovilimbu viaco, yi livokiya eci Yesu a enda vosunangonga ndeci ca kala ocituwa caye. Keteke liaco, ku lingiwa ohutililo loku tanga alivulu a Mose ndeci ca enda oku lingiwa “volosunangonga kasambata osi.” (Ovilinga 15:21) Handi vali, ku tangiwa olonepa vimue vialivulu ovitumasuku. Eci Yesu a votoka oco a tange, citava okuti o limbuka vamue pokati komanu va endaile kumosi laye vosunangonga. Eye o tambula ociña cuprofeto Isaya. Kuenje o sandiliya apa pa sonehiwa eci catiamẽla Komunu wa wavekiwa lespiritu sandu lia Yehova. Koloneke vilo, olondaka viaco vi sangiwa kelivulu lia Isaya 61:1, 2.

Yesu o tanga eci catiamẽla ku Una wa likuminyiwa ndomo a laikele oku yovola olohute, oku sakula olomeke kuenda oku iya kunyamo wocali ca Yehova. Eye eca ociña koñuatisi kuenje o tumãla. Omanu vosi va vandekela kokuaye kuenje Yesu o fetika oku vangula. Citava okuti, o vangula vokuenda kuotembo yalua kuenda volondaka viaye mua kongela esapulo liokuti: “Etaili kua tẽlisiwa ocisonehua wa yevi ndeti.”—Luka 4:21.

Omanu va komõha “olondaka via posoka via tunda vomela waye” kuenje va popia vati: “U siti omõla a Yosefe?” Pole, eci Yesu a limbuka onjongole yomanu yokuti o linga ovilimbu vialua ndevi va yeva, o popia hati: “Ene vu tiamisila olusapo olu kokuange hoti, ‘A ndotolo, lisakula ove muẽle. Ovina tua yeva okuti wa vi linga ko Kafarinau, vi lingavo mulo vimbo liove.’” (Luka 4:22, 23) Citava okuti, omanu va li sunguile la Yesu va yongola okuti, ovikomo vioku sakula vi lingiwa vimbo liavo, oco tete a kuatise omanu vovimbo liaye. Omo liaco, va sima okuti Yesu ka va kapeleko.

Yesu poku limbuka ovisimĩlo viavo, o lombolola ovolandu amue a pita vo Isareli. Eye o popia okuti, koloneke via Eliya kua kala ovimbumba vialua vo Isareli. Pole, Eliya ka tumiwile kovimbumba viaco. Eye wa tumiwa kukãi umue ocimbumba okuti ka kaile u Isareli ko Sarepata, imbo li kasi ocipepi lo Sitono, kuna a lingila ocikomo kuenje ca yovola ovimuenyo. (1 Olosoma 17:8-16) Handi vali, koloneke via Elisia kua kala omanu valua va kuatiwile lovilundu ko Isareli, pole uprofeto wa sakula lika Namana wo ko Suria.—2 Olosoma 5:1, 8-14.

Citava okuti, omanu vo volupale Yesu a citiwila, va sima okuti ulandu waco, ka u va kuatisa, momo u situlula ocipululu cavo kuenda ekambo liekolelo. Nye va yeva vutima? Omanu va kasi vosunangonga va tema, va votoka kuenje va kokela Yesu kosamua yolupale. Ovo vo wambata kohulo yomunda kuna kua tungiwa o Nasara kuenje va seteka oku u nyuñila vombuelo. Pole, Yesu o tila kuenje enda lonjila yaye. Noke eye enda ko Kafarinau konano Yokalunga ko Galilea.