Apulilo Valingiwa Lavakuakutanga

Oku “likuatela omuenyo” ci lomboloka nye?

Embimbiliya lia siata oku lombolola eci catiamẽla ku Yesu Kristu ndomunu o “likuetele omuenyo” kuenda olondonge viaye ndomanu va “likuetele omuenyo.” (Yoano 5:26; 6:​53, NW) Pole, ovisonehua evi vivali ka vi kuete elomboloko limuamue.

Yesu wa lombolola hati, “ndeci Isia a likuetele omuenyo, haico a eca ku Mõla omoko yoku likuatela omuenyo.” Osimbu Yesu ka vanguile handi olondaka evi, eye wa popele hati: “Mopia lene siti, Ocili, ocili, u o yeva ondaka yange, kuenje o kolela u wa numa, o kuete omuenyo ko pui . . . [O] ola yiya kuenda yeya ale, okuti vakualufa va yeva ondaka ya Mõla a Suku, kuenje ava va yi yeva va mola omuenyo.” Kolondaka evi, Yesu wa kala loku vangula eci catiamẽla kunene wa velapo eye a tambula ku Isiaye okuti epondolo lioku eca komanu ekalo lia sunguluka oco va taviwe la Suku. Handi vali, Yesu o kuete epondolo lioku pindula omanu vana va pekela volofa kuenda oku va ĩha vali omuenyo. Omo liaco Yesu oku “likuatela omuenyo” ci lomboloka okuti eye o kuete unene woku linga ovina viaco evi viosi. Ndeci Isia, haico omõla a ‘likuetelevo omuenyo.’ (Yoano 5:​24-26) Nye hẽ ci popiwa kueci catiamẽla kolondonge viaye?

Noke yoku pita unyamo umosi, Yesu wa sapuila olonjeveleli viaye hati: “Mopia lene siti, Ocili, ocili, nda ka vu li etimba lia Mõlomanu, loku nyua osonde yaye, ka vu kuete omuenyo vovitima viene. U o lia etimba liange kuenda o nyua osonde yange o kuete omuenyo ko pui, kuenje ndu pindula keteke lia sulako.” (Yoano 6:​53, 54) Yesu wa sokisa oku “likuatela omuenyo” loku kuata “omuenyo ko pui.” Olondaka oku “likuatela omuenyo” tu pondola oku vi sanga olonjanja vialua Vovisonehua kelimi lio Helasi. Kuli ovindekaise vivali viondaka yimue yi sangiwa Vembimbiliya yi popia hati: “Kali lomongua vokati kene kuenda oku “limuisa onima.” (Marko 9:50; Va Roma 1:27) Kuenje, olondaka viaco evi ka vi lomboloka okuti ovo va kuete unene woku kapa omongua vatimba omanu ale pamue unene woku eca asumũlũho komunu umue. Pole, vi lomboloka lika oku kolapo otembo yosi. Omo liaco, ondaka oku “likuatela omuenyo” yina ya tukuiwa kelivulu lia Yoano 6:​53, yi lomboloka lika oku kuata cosi ci kuete esilivilo komuenyo kuenda omuenyo waco muẽle.

Yesu poku lekisa kolondonge viaye okuti ovo va likuetele omuenyo, eye wa vangula eci catiamẽla ketimba kuenda kosonde yaye muẽle. Kuenje, noke eci eye a tumbika Ondalelo ya Ñala, wa vangula vali eci catiamẽla ketimba kuenda kosonde yaye. Oku likuatela kuaco omuenyo eye a tukula, wa ku tiamisila kolondonge viaye vina vieya oku kuata onepa kocisila cokaliye okuti omanu vana va pondola oku lia ombolo yina ka yi kuete etumbisa kuenda oku nyua ovinyu. Anga hẽ eci ci lomboloka okuti ava va pondola oku kuata omuenyo waco te lika Akristão vana olombuavekua okuti vatiamẽla kocisila cokaliye cina Yehova Suku a linga lavo? Sio, hacoko. Momo volonjanja vivali eye a tukula olondaka evi, ca kala vanyamo a litepa. Omanu vana va yeva olondaka via Yesu vi sangiwa kelivulu lia Yoano 6:​53, 54 otembo yaco, handi ka va kuatele ukũlĩhĩso watiamẽla Kondalelo ya Ñala yi lingiwa vunyamo lunyamo lovindekaise viombolo lovinyu vina vi lomboloka etimba kuenda osonde ya Yesu Kristu.

Ndomo ca lekisiwa kocipama 6, Yesu tete wa sokisa etimba liaye lomana poku popia hati: “Vakukululu vene va lia mana vekalasoko kuenje va fa. Ombolo ya tunda kilu yeyi, omunu nda o liako, ka fi. Ame ndimbolo yi kasi lomuenyo ya tunda kilu. Umue nda o lia kombolo eyi, o kala ño-o hũ lomuenyo.” Etimba kuenda osonde ya Yesu ya velapo calua okuti o mana ci sule. Oco hẽ Ndamupi? Vonduko yetimba liaye kua eciwa ‘omuenyo komanu vosi voluali’ okuti omanu vaco va pondola oku kuata omuenyo ko pui.a Omo liaco, olondaka vina via tukuiwa kelivulu lia Yoano 6:53 viatiamẽla koku “likuatela omuenyo” via loña komanu vosi vana va tambula omuenyo ko pui kilu kuenda palo posi.​—⁠Yoano 6:​53, 48-51.

Oco hẽ eteke lipi olondonge via Kristu vi tambula, ale vi kuatela omuenyo kumosi lovina viosi ovo va sukila komuenyo wavo? Komanu vana va kuete elavoko lioku enda kilu, eci ca siata oku tẽlisiwa vepinduko liavo lioku kuata omuenyo ko pui kilu okuti lalimue eteke va pondola vali oku fa. (1 Va Korindo 15:​52, 53; 1 Yoano 3:⁠2) Ocili okuti, “olomeme vikuavo” via Yesu vi lavoka oku kuata omuenyo ko pui kesulilo liohũlũkãi yanyamo Yusoma wa Yesu. Kotembo yaco, ovo vaka kala omanu vana va pondola oku pita voseteko okuti va linga vakuekolelo kuenda vakuesunga vana va sesamẽla oku kuata omuenyo ko pui Vofeka Yelau palo posi.​—⁠Yoano 10:16; Esituluilo 20:​5, 7-10.

[Etosi pombuelo yemẽla]

[Elitalatu kemẽla 9]

Akristão vosi va pondola oku ‘likuatela omuenyo’ ovo muẽle