• O Pondola Oku Kala Ekamba Lia Yehova
    Sanjukili Omuenyo Otembo ka yi Pui!—Elilongiso Liembimbiliya

    • O Pondola Oku Kala Ekamba Lia Yehova

      Yehova o yongola okuti, ove u kũlĩha ciwa. Momo lie? Eye o lavoka okuti, nda o lilongisa catiamẽla kovituwa viaye, kolonjila viaye kuenda kocipango caye, ove o ka sola oku kala ekamba liaye. O pondola hẽ oku kala muẽle ekamba lia Suku? (Tanga Olosamo 25:14.) Nye o pondola oku linga oco o kale ekamba liaye? Embimbiliya li tambulula apulilo aco kuenda li lekisavo esunga lieci ukamba la Yehova owo ukamba wa velapo o pondola oku kuata.

      1. Yehova oku laleka oku linga nye?

      “Ameli ku Suku kuenje eye amela kokuene.” (Tiago 4:8) Eci ci lomboloka nye? Ci lomboloka okuti, Yehova o kasi oku ku laleka oco o kale ekamba liaye. Komanu vamue, ka ca lelukile oku tava okuti, va pondola oku kala akamba va Suku omo okuti, ka va pondola oku u mola. Ocili okuti, Yehova Vondaka yaye Embimbiliya, o situlula ovina tu sukila oku kũlĩha catiamẽla kovituwa viaye oco tu amele kokuaye. Eci tu tanga esapulo lia Suku Vembimbiliya, ukamba wetu la Yehova u pama ndaño ka tu u moli.

      2. Momo lie Yehova eye ekamba lia velapo o pondola oku kuata?

      Yehova o ku sole vali okuti, omanu vakuavo ci sule. Eye o yongola okuti, ove o kuata esanju kuenda o sandiliya ekuatiso liaye vapuluvi osi o li sukila. O pondola oku ‘yeka kokuaye ovilemo viove viosi, momo eye oku tata.’ (1 Petulu 5:7) Yehova otembo yosi o lekisa onjongole yoku kuatisa, yoku lembeleka kuenda yoku yevelela akamba vaye.—Tanga Olosamo 94:18, 19.

      3. Oco tu kale akamba va Yehova eye o yongola okuti tu linga nye?

      Yehova o sole omanu vosi, “pole, Eye o kuete ukamba wocili lomunu wa suñama.” (Olosapo 3:32) Yehova o yongola okuti, akamba vaye va likolisilako oku linga eci ca sunguluka kuenda va yuvula ovina eye a tenda okuti, vĩvi. Vamue va sima okuti, lalimue eteke va ka linga eci Suku a pinga. Pole, Yehova wa ci kũlĩha. Omanu vosi vana vo sole lutima wosi kuenda va likolisilako oku U sanjuisa, va pondola oku kala akamba Vaye.—Olosamo 147:11; Ovilinga 10:34, 35.

      LILONGISA ONDONGOSI

      Lilongisa ndomo o pondola oku kala ekamba lia Yehova kuenda kũlĩhĩsa esunga lieci eye a ponduila oku kala Ekamba liove lia velapo.

      4. Avirahama wa kala ekamba lia Yehova

      Ulandu Wembimbiliya watiamẽla ku Avirahama (una o tukuiwavo okuti Avirama), u tu kuatisa oku kũlĩha eci ci lomboloka oku kala ekamba lia Suku. Tanga eci catiamẽla ku Avirahama kelivulu Liefetikilo 12:1-4. Noke konomuisa apulilo a kuãimo:

      • Nye Yehova a pinga ku Avirahama oco a ci linge?

      • Nye Yehova a likuminya ku Avirahama?

      • Nye Avirahama a linga?

      5. Ceci Yehova a lavoka kakamba vaye

      Ocili okuti, tua siata oku lavoka ovina vimue kakamba vetu.

      • Ovina vipi o yongola okuti akamba vove va ku vi pangela?

      Tanga 1 Yoano 5:3, noke konomuisa epulilo li kuãimo:

      • Nye Yehova a lavoka kakamba vaye?

      Oco tu pokole ku Yehova, pamue tu sukila oku pongolola ovituwa vietu kuenda ekalo lietu. Tanga Isaya 48:17, 18, noke konomuisa epulilo li kuãimo:

      • Momo lie Yehova a pingila okuti akamba vaye va linga apongoloko komuenyo?

      Onalãvai yimue ukuakutunga yeca ocikoko coku liteyuila konalãvai yikuavo.

      Ekamba liwa li tu kuatisa kuenda li tu ĩha alungulo awa. Cimuamue haico Yehova a linga lakamba vaye

      6. Ceci Yehova a lingila akamba vaye

      Yehova o kuatisa akamba vaye oco va tẽle oku liyaka lovitangi. Tala OVIDEO, noke konomuisa epulilo li kuãimo.

      OVIDEO: Yehova wa Ndingila Ovina Vialua (3:20)

      • Yehova wa kuatisa ndati ukãi wa lekisiwa vovideo oco a tẽle oku liyaka lovisimĩlo ka via sungulukile?

      Tanga Isaya 41:10, 13, noke konomuisa apulilo a kuãimo:

      • Nye Yehova a likuminya oku lingila akamba vaye vosi?

      • O sima hẽ okuti Yehova o pondola oku kala ekamba limue liwa? Momo lie?

      Alitalatu: Akamba va li kuatisa. 1. Ekamba limue li kuatisa ukuavo oku sondoluila omesa yi lema pocitumãlo cikuavo. 2. Ukãi umue o situluila kukãi ukuavo ovisimĩlo viaye. 3. Ulume umue o kuatisa ulume ukuavo o kasi oku enda lomuleta.

      Akamba va eca ekuatiso vapuluvi osi o sukila. Yehova o ka ku kuatisavo

      7. Oco tu kale ekamba lia Yehova tu sukila oku sapela laye loku yevelela eci eye a popia

      Nda akamba vavali va sapela, ukamba wavo u pama. Tanga Olosamo 86:6, 11, noke konomuisa apulilo a kuãimo:

      • Tu pondola oku sapela ndati la Yehova?

      • Yehova o sapela ndati letu?

      Alitalatu: 1. Ukãi umue o kasi oku likutilila. Ondimbukiso yimue yi kasi kilu liutue waye, ya suñamisua kilu. 2. Ukãi umue o tanga Embimbiliya. Ondimbukiso yimue yi kasi kilu liutue waye, ya suñamisua vombuelo.

      Tu sapela la Yehova poku likutilila; eye o sapela letu eci tu tanga Embimbiliya

      OMANU VAMUE VA POPIA VATI: “Ka ci tẽliwa oku kala ekamba lia Suku.”

      • Ocisonehua cipi Cembimbiliya nda wa lekisa ceca uvangi wokuti tu pondola oku kala akamba va Yehova?

      NYE WA LILONGISA?

      Yehova o yongola oku kala ekamba liove kuenda eye oku kuatisa oku amela vali kokuaye.

      Oku Pitulula

      • Yehova o kuatisa ndati akamba vaye?

      • Momo lie Yehova a pingila okuti akamba vaye va linga apongoloko komuenyo?

      • O sima hẽ okuti ka ca lelukile oku kala ekamba lia Yehova? Momo lie o simĩla ndoco?

      Ocimãho

      OCO O KŨLĨHE OVINA VIKUAVO

      Oku kala ekamba lia Suku ci kuatisa ndati omuenyo wove?

      “Yehova—Osuku Yimue yi Sesamẽla Oku Kũlĩhĩwa” (Utala Wondavululi, 15 ya Kayovo  2003)

      Lilongisa ndomo o pondola oku kala ekamba lia Suku.

      “Ndi Pondola Oku Kala Ndati Ekamba Lia Suku?” (Amalẽhe va Pula—Atambululo a Kuatisa, Elivulu 2, ocipama 35)

      Tala ndomo ukamba wukãi umue la Yehova wa popela omuenyo waye.

      “Sia Yonguile Oku fa!” (Utala Wondavululi No. 1 2017)

      Yevelela eci amalẽhe vamue va popia catiamẽla ku Yehova.

      Nye ci Lomboloka Oku Kala Ekamba Lia Suku? (1:46)